Saturday, July 9, 2011

J.W hpyen hprawng lanu lahku jinghkri RANIR hpaw

Miwa ga jarit KIO uphkang ginra de du nga ai J.W hpyen hprawng masha ni a matu lanu lahku bungli jawm galaw sa wa na jinghkri RANIR hpe July praw 7, bat hpang mali ya shani, KIO ginjaw Laiza e hpaw dat sai re.

Jinghpaw hku “Hpyen Yen Lakawn Lanawn Jinghkri” ngu ai Relief Action Network for IDP (Internally Displaced Person) and Refugee, RANIR hpe KIO, Hkristan nawku hpung ni hte asuya n re ai uhpung ni jawm shanglawm hpaw ninghtan ai re.

Jinghkri (network) a lit nga hte coordianator-1 La Rip gaw jinghkri hpaw ra ai hte seng nna ndai zawn KNG de tsun ai, “Myen hte Shanglawt majan matut byin na, n byin na hkrak n chye ai kata, mare buga nhtang wa mat ai lam n nga KIO hpyen hprawng dabang ni hta jam jau hkrum nga ai mung shawa ni hpe lakawn lanawn na yaw shada let RANIR hpe hpaw ai re.”

KIO Laiza hpyen yen labang de sa du gawan ai J.W Hkalup Hpung Ginjaw, KBC sara ni

Thursday, July 7, 2011

Myen a laika KIO Ginjaw de WMR sa jaw

Myen a laika langai hpe Wunpawng Amyusha Mungbawng Rapdaw (WMR) kaw nna KIO Ginjaw Laiza de July praw 7, dai ni bat hpang mali ya shani sa jaw sai re.

KIO ginjaw Laiza.


Jinghpaw mungdaw Myen asuya a Shimlam hte Ga Jarit hte seng ai lithkam salang Lt-Col Than Aung a laika hpe WMR Ningbaw Tsumhpawng Sinwa Naw hte amumadu Slg. Labang Gam Awng yan sa jaw ai re lam, Laiza na KNG Jinghpaw Shiga Dap shi htawn tsun ai.

KIO maga mung laika langai hpe Myitkyina daju Myen asuya Dingdung Daw Daju (Ma-Pa-Hka) de WMR salang yan hku nna, shalai dat na re lam chye lu ai.

Tuesday, July 5, 2011

KIO Slg. La Nan a ga, shawnglam dap matsun hte shai

Nambat lahkawng lang Myen hte hkrum shaga ngut ai hpang, KIO N/T Ninggawn Amumadu Salang Kaba La Nan tsun wa sai ga gaw tinang shawnglam dap de matsun ai hte loi shai hkat ai hpe mu lu ai.

Myen hte hkrum ngut ai hpang Slg kaba La Nan tsun ai, “Myen hte simsa lam jahta ai kam mai ai shadang n nga shi ai majaw, shawnglam na KIA hpyendap ni hpe gap hkat jahkring na n matsun shi ai re” nga ai.

KIO N/T amumadu Salang Kaba La Nan.

N shawp n Kaja ai Simsa Lam gaw Hpyen Majan hta grau Sawng

Shaning 17 Ning Simsa lam laman hta W.P myusha ni dwi ai, hka ai, jap ai sha lai wa sai hte pyaw, yawn ai ni mung nga wa sai. Raitim amyat Lu ai n nga ai sha arang sum ai hpe mu lu ga ai. Grau na nni nkri, roi rip ai sat nat hkrum ai ni, lamu ga yisun kashun la hkrum ai ni a hkrap myi prwi hte madai nsen mung grau na lu wa sai re.

Bum ni krin, hka ni hket, ahkaw ahkang pat ram ram machyi mat sai re. W.P sha ni a buga gaw ana kaba lu na laswi lasa hkyet taw sai machyi masha hte bung taw sai re. W.P sha ni a prat mung Nga madim kata rawng ai Nga ni hte bung nga ai. Dai re majaw myusha yawng a lu la ging ai rap ra ai ahkaw ahkang hte tinang gam maka hpe tinang ran lu ai ahkang hpe hkrang shapraw ya na jet ai sim sa lam kaw na lai na laga gaw Myen hpyen a Mahkam sha re ngu mu mada ai.

1961 kawn 1975 du hkra, G.O.C Zau Seng gaw ahpraw achyang mungmasa hte laksan awmdawm mungdan lu hkra shakut wa sai.
Dai ni na W.P myusha yawng a mung masa gam maka gaw KIO/KIA a lata hta nga ai re majaw KIO/KIA hkrat sum yang anhte W.P sha yawng hkrat sum ai sha re, KIO/KIA lam woi shut yang anhte W.P myu mat na re. Ya na zawn Myen hpyen gumshem a KIO/KIA hpe majan baw ai lam gaw W.P sha yawng hpe majan baw ai lam re majaw anhte W.P sha ni yawng mung ladat amyu myu hku ninghkap kasat sa wa ra sai aten re ngu kam ai.

“Pu gan yang sin machyi ai” myutsaw myit hte W.P myusha kaji kaba yawng gaw myusha lam hta lam woi nga ai KIO/KIA hpe aja awa madi shadaw n-gun jaw taw sai sha n-ga myit rum, myit hkrum ai lam hpe dan dan leng leng madun dan sai re. Myutsaw myit hte myit hkrum ai lam gaw hpyen yawng hpe gumlau kau lu na, awng padang lam de lam woi ya na n-gun re ngu kam ai.

Dai ni na byin nga ai manghkang a ningpawt gaw BGF n re nga ai anhte bum nga bawsang myu ni a lu ging ai rapra ai ahkaw ahkang hte tinang buga tinang uphkang lu ai ahkang (federal principle) hpe Myen asuya n hkap la ai majaw dai ni du hkra du daw sai hkaw taw ai re ngu mu mada ai. Dai re kawn Myen hpyen wa gaw W.P myusha ni hpe sha n-ga laga bawsang hpunau ni yawng hpe mung ladat amyu myu hku shamyit kau let Myen sha up sha na matsing (Burman nationalism) hku aja awa shakut taw ai hpe mu lu ga ai. Machyu pala n kapaw ra ai katsi majan hku kasat na ladat hte maren Myen wa gaw KIO/KIA hpe mung gap jahkring simsa lam ngu ai mahkam hpe kalang bai ladat shaw taw sai re.

Dai gaw UNFC (United Nationalities Dederal Council) ngu ai lapu a baw re nga ai KIO/KIA hpe tek jum kau let ngam nga ai laknak lang uhpung ni hpe shamyit agrawp kau na masing re ngu maram lu ai. Ya ten hta Myen hpyen wa gaw KIO/KIA du salang ni a lapran sha n-ga UNFC malawm bawsang uhpung ni a lapran sumprat dawk bang jaw na mahkrun lam tam taw ai re ngu mu ai. Myen hpyen wa gaw wuhpung hka ai wuloi hpe gyam sha na Sharaw zawn zai ladat hte la maja taw ai re majaw bum nga bawsang myusha laknak lang uhpung yawng gaw ya ten gahkyin gumdin let n-gun madun ra ai ten re ngu mu mada ai.

Hpyen majan gaw manghkang yawng hpe ran jaw na n re tim jet ai simsa lam lu na matu arang kaba langai re nga ai. Arang law yang she amyat law na re hpe mung dum ra ga ai. Greece hpaji ninghkring TACITUS tsun ai ga yan mi nga ai "N SHAWP N KAJA AI SIMSA LAM GAW HPYEN MAJAN HTA GRAU SAWNG AI---- A bad peace is even worse than war”.

Ga sadi n dung masu magaw pale palau chye ai Myen hpyen asuya gaw simsa lam hpe ninggang shatai let mung masa hte hpyen masa akyu amyat a matu ginsup ai lam re ngu mu mada ai. Myen hpyen gumshem woi galaw ai simsa lam gaw myusha ni hpe hten bya lam de woi ai lam sha re ngu mu mada ai. Dai re majaw jet ai simsa lam de du wa na matu gaw aten, masa hpe naw la ra na re ngu mu mada ai.

Bumshi n bung n du shi yang nbung laru ru ru ai ten hta n poi lawm mat na matu myit nden shaja let hpunau bawsang uhpung yawng hte nsen langai, ga hkaw langai, lahkrip ra ra rawt sa wa yang tinang gam maka tinang ran lu na padung lam de du na re ngu kam n’ngai.

By: Hkyihkang

Laiza tsinyam dabang de Kyat sen 10 KBC garum

Jinghpaw Wunpawng Hkalup Hpung Ginjaw, KBC gaw KIO Laiza Hpyen Hprawng Dabang ni de du nga ai tsinyam ni matu alu lap sen 10 garum jaw ai re.

Ndai alu hpe Laiza e hpaw tawn ai Hpyen Yen Lakawn Lanawn Komiti de July praw 3, lai wa sai bat kru ya shani ap jaw ai re.

KIO Laiza hpyen yen dabang de Myitkyina kaw na gan gawan du ai KBC ningbaw ni.

Tinang Gam Maka Tinang Ran

Moi lai sai aten Myen Hkawhkam U Aung Zeya gaw 1757 ning hta Mon Kingdom, Hongsawatoi hpe kasat zingla kau ai, Bodawpaya gaw Arakan Kingdom hpe 1785 ning hta kasat zing la kau sai. Dai aten kawn Mon Amyu hte Arakan Amyu ni ayai aya byin mat sai. Ya dai ni KIO/KIA Ginjaw Laiza hte Maijayang ni hpe Myen dap ni kasat zing la kau nna Jinghpaw W.P amyu ni hpe ayai aya di kau na hkyen lajang nga sai.

June 29 ya shani Muse jarit kaw Myen hpyenla ni Miwa hkran de rap na matu border passport galaw nga ai shiga ni mawng pru wa ai, dai hte maren n kau Myen hpyenla ni gaw Ga Du mare kaw du sai nga ai. (Miwa hkran rai nna Laiza kawn n law htum deng 100 grupyin tsan ai shara). Ndai zawn Myen ni gaw Jinghpaw W.P myu sha ni hpe Miwa hkran hpyen man, Lajayang hpyen man hku shakri na hkyen ai shiga ni mawng nga sai.

Hpakan Uru Hka makau e mu lu ai myutsaw hpyenla langai. Sumla: Kachin News Group

KIA, Myen kata de majan gan jahkring

Wunpawng Mungdan Shanglawt Hpung (KIA) gaw Myen asuya uphkang ginra de “bawm kapaw shang gap ai lam ni” gan jahkring sai hpe tinang shawnglam dap ni de matsun tawn sai re..

Ndai matsun hpe Myen-KIO datkasa ni Lajayang e June 30 ya shani “shawnglam simsa lam mahkrun” hte seng nna hkrum shaga ngut ai hpang shani, July praw 1 ya hta shale dat ai re lam, KIA shawnglam shiga lawk tsun ai.

KIA N/T Dap Awn Daju Du Up Daju Gun Maw woi awn ai hpung hte Myen, Jinghpaw Mungdaw asuya, Ga Jarit hte Shimlam Salang Lt-Col Tan Awng (ga-ang) woi awn ai hpung, Lajayang e June 30 ya shani hkrum shaga hkat ai lam.

Friday, July 1, 2011

Myen hpyen mawdaw hpe KIA Dung 9 ni gap

Lahta Sam mung e daju ai KIA Dapdung 9 gaw Myen hpyen mawdaw yan hpe June 30, bat hpang mali ya shani gap gasat ai lam galaw dat sai re.

Muse-Mandalay Miwa ga jarit hpaga lam kaba ntsa, Mandalay de yan yu wa ai hpyen mawdaw ni hpe Muse a dingda de deng 15 gang ai Homong makau hta buga ten hkying 2 grupyin e bawm, sinat kaji ni hte gap gasat ai re lam, myi-chyaw sakse ni tsun ai.


KIA/KIO Hkut Hkut Nai Nai Myit Ga!

Thein Sein wa President nbyin shi ai kawn nna KIA hpe Gum Lau Hpung nga masat let, shawng nnan gasat shamyit kau na lam tsun wa ai hta; Tar Hkaw hka madim shim lam hpe ninghpai let byin wa ai Sang Gang majan gaw, Jinghpaw W.P. myu sha ni yawng hpe lam amyu myu hku ahtu hkra taw sai hpe yawng gaw mu, na chye sai hkrai rai nga ai.

Shanglawt KIA hpe sa htim gap yu ai. Masan n sa nna, Mung masha ni hpe roi rip sat ai. Majan hta nau hkrat sum machyi wa ai majaw, Hpungkyi (monks) ni hpe kyu hpyi shangun ai. Bai Manmaw mare hta 26 June (Laban) shani Hkristan hpung woi ni hpe akyu bai hpyi shangun ai. Ndai lam ni gaw simsa lam hpe myit mada nna galaw ai n re, shanhte galaw chye ai Ya-Da-Ya bungli sha re. Simsa lam ra ai rai yang nnan kawn KIA hpe sa gap na lam n nga ai. Maga mi kaw gaw hpyen n-gun jat. Maga mi kaw gaw Myen Ginjaw kawn lit shatsam ai lam n-galaw ai sha U Thein Zaw hpe simsa lam tam masu shangun nhtawm dingbai ding-na jaw. Ndai hta KIO/KIA ningbaw ningla ni n mau nang ga. Hpu-nau baw-sang ni yawng mung KIO/KIA hpe kam hpa let yu nga ai hpe dum ga.

June 29 ya shani Miwa hkran Jegau de Myen mung hkran Muse kaw nna shang bang wa ai, mung shawa palawng hpun Myen hpyen ni.