Myen asuya dap ni htim gasat lam hpe gan jahkring nhtawm n-gun jat bang nga

 KIA dap 6 hpyenla ni, Ginsi Seng Ra, Hpakan

Jinghpaw Mungdaw Hpakan ginwang, Wunpawng Mungdan Shanglawt Hpyen Dap (KIA) Dap Ba (2) npu Masat Dap Dung (6) ginra kata Myen asuya dap ni htim gasat ai lam n nga ai majaw majan nhpan gan zim nga ai lam KIA Dung (6) Dap Up Dukaba Tang San tsun ai.

January 22 ya shani Hpakan ginwang KIA Dap Dung (6) ginra kata majan shara lahkawng kaw byin mat wa nna daini January 23 ya shani hta chyawm asuya dap kawn htim gasat ai lam n nga ai sha hpyen n-gun jat bang taw ai nga matut tsun ai.

“Daini chyawm zim taw ai masa re. Ya nsin sin ten du hkra hpa nna shi ai. Myen ni htu lung ai lam n nga ai majaw n byin ai. Mani mung Myen hpyenla ni Hupin hte Hpakan lam maga hku lung wa ai. Dap Dung 2 ram jat bang wa ma ai. Ya gaw dap dung 12 ting rai mat sai” nga shi kawn tsun ai.

Ya yang gasat gala lam n nga tim Myen asuya dap ni gaw January 22 ya shani hpyen n-gun dap dung 2 bai jat bang wa ai nga matut tsun ai.

January 15 ya shani kawn 22 ya du hkra majan laja lana byin mat nna ya yang KIA Dap Dung (6) dap jung ai Tang Gau (Awng Ba Le) mare hta Myen asuya dap dung 4 shara jahkrat da nga dingyang re nga tsun ai.

January 14 ya shani, Myen pyada masum hpe KIA dap rim da ai kawn Myen asuya dap gaw htim gasat bang wa ai. Dai pyada masum hpe Simsa Lam Akyu Galaw Hpung (PCG) kawn lit la nna January 19 ya shani Myen asuya de nhtang ap ya dat sai rai nga ai.

Posted in: SHIGA