Munghpawm Simsa Lam Hkrang Shapraw Komiti (UPWC) hte Mungdan Ting Gap Hkat Jahkring Bawngban Jahkrup Hpung (NCCT) ni mungdan ting gap hkat jahkring lam a matu (7) lang ngu na bawngban hpawng hpe du na February (12) ya hpang Yangung mare daju e kalang bai hkrum shaga na matu myit hkrum ai lam lu tawn sai nga lahkawng maga na dat kasa ni tsun ai.
Htai Mungdan Chiangmai mare hta February praw (5) ya shana maga hkying 2:00 kawn hkying 5:00 du hkra hkrum shaga bawngban mat ai hta du na 68 lang na Munghpawm Nhtoi poi lamang hta sa du na matu mung amyu laknak hpai uhpung (16) hpe saw shaga da ai nga NCCT Ningbaw Nai Han Ta kawn tsun ai.
“Munghpawm Nhtoi poi lamang lung na matu saw shaga ai. Bai… langai gaw mungdan ting gap hkat jahkring lam hpe bai bawngban wa lu na matu munghpawm nhtoi lamang ngut ai hpang ntsa lam bai hkrum na. Bai bawngban mat na” nga shi kawn tsun ai.
Munghpawm Nhtoi ngut ai hpang daw UPWC hte NCCT dat kasa ni Htai Mungdan Chiangmai mare e kahtap hkrum shaga bawngban ngut ai hpang (7) lang ngu na hkrum shaga bawngban hpawng ninghtoi hpe masat mat na re lam matut tsun ai.
Dai hte maren bawngban hpawng e lahkawng maga na dat kasa ni hpaji myitchyan jaw laika ni shagun mat ai hta NCCT hku nna gaw jet ai federal munghpawm gawgap na matu myitchyan jaw da ai lam, Myen asuya a myitchyan shaw da ai daw ni hpe kalang bai bawngban jahkrup mat na re lam Slg. Nai Han Ta tsun ai.
“Federal munghpawm gawgap lam hpe mungmasa bawngban hpawng mahtai hta hkan nna gawgap mat na matu anhte numshawn shaw da ai. Shanhte maga chyawm lam masum, mali hkawt myitchyan jaw da ma ai. Mungdan ting gap hkat jahkring nhtawm mungmasa matut bawngban wa lu hkra, simsa lam hpe byin hkra gawgap na matu ga sadi jaw lu na hpe sha madung tawn ai re” nga shi kawn tsun ai.
Shata mi jan hkring mat sai mungdan ting gap hkat jahkring lam hkrum shaga bawngban jahkrup ai lam hpe kalang bai bawngban mat wa sana rai nhtawm daini hkrum shaga bawngban ai lam gaw rawt jat masan sa wa ai ngu maram lu ai lam Nai Han Ta kawn tsun ai.
Du na February 12 ya shani munghpawm nhtoi lamang de du lung na matu amyu sha laknak hpai uhpung (16) hpe sa du saw shaga mat ai lam rai nhtawm UPWC hte NCCT ni (7) lang ngu na hkrum shaga bawngban na matu myit hkrum ai lam lu mat ai nga Hkringmang Slg. Awng Min kawn shi htawn ni hpe tsun shana mat ai.
“UPWC zuphpawng galaw ai chyawm gaw ra rawng ai masa lamyan ni jaw ai re. Hpang kalang bawngban hpawng galaw na matu, hpang kalang na bawngban hpawng kaw kaning re lawnglam dawshan ni hpe bawngban mat wa na ngu ai dawdan manit ni hpe jahkrup ai bawngban hpawng re. Ya dai ni hpe la-kap nna ndai kaw sa jahkrup ai re. Shanhte mung dai hpe myit hkrum ai majaw she 12 ya hpang daw hpang na bat laman bawngban hpawng galaw na matu dai hpe myit hkrum ai lam lu hkra sa jahkrup mat ai lam re” nga Slg. Awng Min kawn tsun ai.
Bawngban hpawng hta UPWC maga kawn Hkringmang Slg. Awng Min, Masha Pru/Shang Makan Dap kawn Hkringmang Slg. Hkin Yi, Munghpawm Hkringmang Slg. Hkin Mawng Tsu hte MPC kwn Dr. Min Zaw U, Slg. Tin Mawng Tan, Slg. La Mawng Shwi hte Slg. Nyu Ung Myit ni hte hpawn malawm marai 8 hte NCCT maga kawn Nai Hkan Ta, Badu Koi Htu Win hte hpawn marai 5 ni sa du bawngban mat ai nga chye lu ai.
Hkringmang Slg. Awng Min hpung ni gaw daihpawt daw e Sam Mungdaw Bai Gawgap Lam/Sam Mung Hpyen Dap (RCSS/SSA) hte hkrum shaga bawngban mat ai zawn, hpawtde February praw (6) ya shani hta mung Wunpawng Mungdan Shanglawt Hpung (KIO) hte ntsa lam hkrum shaga bawngban mat na rai malu ai.
0 comments:
Post a Comment