Dai hpawt KIA Dapba 6 hte Myen, minit 30 gap hkat

KIA Dap Ba 6 Dazik

Dai hpawt, Lahta Sam mung Wunpawng Mungdan Shanglawt Hpyendap KIA Dapba 6 ginra hta Myen asuya dap hte aten minit 30 daram gap hkat wa sai re.

KIA Dung 36 hte 38 hpyen hpung ni nga nga ai, Munggu mare a sinpraw maga Loi Wing de Myen hpyen ni htu shang wa nna dai hpawt hkying 7 daram hta gap hkat wa ai re lam, Dapba 6 salang ni tsun shateng ai.

Myen maga marai 4 hkala hkrum ai lam, KIA maga masha hpa n byin tim laknak nkau tat kau ai lam, Dapba 6 salang langai KNG Jinghpaw Shiga Dap de tsun ai.

Dap mying n chye ai Myen hpyen ni gaw Munggu maga hku hpung mi hte Mung Ya, Man Kawng maga hku hpung mi lung wa nna, Loi Wing e nga ai KIA Dung 36 hte 38 pawng hpawng dap ni hpe mana de mung wa gap ai re hpe chye lu ai.

Ya ten Munggu na lung wa ai Myen dap ni Mung Ya, Loi Kang de du nga sai zawn Mung Ya, Man Kawng de na lung wa ai Myen dap ni gaw Munggu de du nga ai lam, sagawn chye lu ai.

KIA Dapba 4 nga ai Lahta Sam mung e Dapba 6 hpe shawng de Myen mung kummyunit pati (CPB) ginjaw Munggu ginra hta Feb. 26 ya tara shang hpaw dat ai nhtoi masum ya e ndai Loi Wing majan gaw shawng n’nan lang byin ai rai nga ai.

Maning October shata, Myen asuya hte UNFC amyusha hpyen masa mungmasa daphpawm, malawm nkau NCA simsa lam ga sadi sen htu ngut ai hpang, KIO/KIA a jinghku rawt malan hpung masum--- Sam SSA, Balawng PSLF/ TNLA hte Kokang MNDAA ni mung, Sakhkung Hka a sinna hkran Munggu ginra e shara la dap jahkrat bang wa ai re.

Maning November shata kaw nna Lahta Sam mung e Sam RCSS/SSA hte Balawng lapran laja lana gasat ai lam nga tim, KIA hte manghkang byin madang n nga shi ai re.

Posted in: