Hugawng bu ni lamu ga bai lu la na lam, matut hpyi shawn

Mar-2 Yi Sun Hkauna Galaw Masha Nhtoi lamang, Wa Ra Zup

Jinghpaw mungdaw Hugawng Pa ginra Lidu lam Wa Ra Zup kahtawng kaw March shata praw 2 Yi Sun Hkauna Masha Nhtoi lamang galaw ai hta buga masha ni kawn asuya ahkaw ahkang lu ni de lawnglam 5 hpyi shawn mat ai.

Dai lawnglam ni hta hkauna galaw masha ni kawn ‘Hugawng Pa ginra na kahtawng shagu hta lu ging lu ang ai ra gadawn lamu ga ni atsawm lu la na lam, n tara zing da ai yi sun hkauna ni yawng bai lu la na lam, Yuzana Company jak rung kawn shapraw ai matsat shabat gung tsi ntsin hte manam shagram re hpe la kau ya na lam, Hugawng chyauman masha ni yi sun hkauna awngdang lam hte bawngring lam lamyan shatsaw ya na lam hte yi sun ni atsawm mai galaw hkra ra rawng ai madim, hka hte hka lawng ni matut gawgap ya na lam ni’ hpyi shawn mat ai lam rai nga ai.

Wa Ra Zup kahtawng e galaw ai yi sun hkuna masha nhtoi lamang hta chyauman buga masha ni marai 100 hkawt sa du nhtawm tara kasa Slg. Ma Hka kawn yi sun hkauna hte seng ai hpaji jaw ningmu jahpaw ai lam ni galaw mat ai.

Yi sun hkauna hte seng nna machye machyang hpungjat wa na matu hte shimlum ai hkai sun lamu ga, ra gadawn ai lamu ga lu nhtawm rawt jat galu kaba wa na matu yaw shada let galaw ai lam re nga Wa Ra Zup kawn yi sun masha lit hkam Lashi Awng Lat tsun ai.

2008 ning Hugawng Pa Lidu lam mayan Yuzana Company maden shang wa ai ten kawn chyauman masha ni a yi sun hkauna yawng zing hkrum mat nna yi sun hkuna ginlut hkrum nhtawm shani shagu yak hkak jamjau ai manghkang ni hkrum sha nga ai lam rai nga ai.

Hugawng Pa, Lidu lam nmaw mayan na kahtawng ningchyawng 10 hta nga ai yi sun masha ni gaw maning 2014 hta Yuzana Company ntsa ‘ra sharawng/ n ra sharawng’ myit-ra me hta shinggyin ai shaloi e, Yuzana hpe n ra sharawng ai me malawng lu la nhtawm shiga sanglang hpawng ni mung galaw wa sai rai nga ai.

Sum machyi mat sai yi sun hkauna ni bai lu la na matu tara masa lamyan hku nna daw 2 hte shakut nga dingyang re lam Amyu Sha Dimokaresi N-gun (NDF) pati kawn Jinghpaw Mungdaw ningbaw Jan. Bawk Ja kawn tsun ai.

“Moi na sum mat wa sai lamu ga ni hpe bai lu la hka shakut nga ten kaw tara ni grai galai shai mat ai hpe mu lu ai. Shawng e gaw lamu ga masat buk (pe tsa) n lu yang zing kau ai zawn re ni grai law ai. Raitim ya gaw lamu ga masat buk mi n lu tim pat tim ndai yi sun bungli hpe galaw lu galaw sha ai wa hpe tang ai shaloi, Gumsan Magam kawn kaja wa galaw sha nga ai grup yin na marai 4 madi shadaw ya jang bai mail u ai; nga ai majaw 1984 ning lamu ga zing tara hkrang hte bungpre n bungpre lam hpe shingdaw let hparan jasan ai nkau hpe mu lu ai. Masing hta hkan nna shata 6 laman hkrang n shapraw yang manan na sun madu hpe shaprai kau na ngu ai hte amyu sha lamu ga akyu jashawn hkrang nhprang hpe mung matut ninghkap taw ai” nga Jinghpaw Shiga Dap de tsun ai.

Yuzana Company nga taw ai lam a majaw Hugawng Pa Lidu lam mayan na chyauman buga masha ni gaw galaw lu galaw sha na shara n nga mat ai zawn dumsu yamnga ni mat mat nhtawm sum machyi ai lam hkrum sha nga ai majaw yi sun masha ni kawn yi sun hkauna masha nhtoi shani hpyi shawn ai lam galaw ai rai nga ai.

Posted in: SHIGA