No.2 Panglong zuphpawng hta Federal n mai byin

No.2 Panglong zuphpawng hta Federal n mai byin

Myen mung asuya woi galaw ai No.2 Panglong Zuphpawng kaw Jinghpaw hte kaga hpunau amyusha rawt malan hpung ni ra ai Federal Munghpawm, gaw sharawt na n mai byin ai hpe Htai mung Jinghpaw ni September praw 2 ya nhtoi hte ndau shabra dat sai.

August 31 ya shani Tsaban 21 Panglong Zuphpawng galaw hpang ai hta, gara hku mung Jinghpaw hte Myen mung ting na mung shawa yawng ra ai “Federal Munghpawm mungdan gaw sharawt lu na lam n nga ai hpe mu lu ai lam,” ndau hta tsun ai.

Dai re majaw, “anhte Jinghpaw Wunpawng amyusha ni gaw tinang mungdan hpe awmdawm shanglawt lu na lam hta ading tawk sa wa saga”.  “Jinghpaw Wunpawng mung shawa hte dap shawa yawng gaw, Tsaban 21 Panglong zuphpawng a majaw, myit ung ang ai lam n nga ai sha, tinang Mungdan Awmdawm lu na masa lam yan hta myit hkrum kahkyin gumdin let ngang ngang hkan sa wa saga,” nga ndau lajin tawn ai.

Naypyidaw e Tsaban 21 Panglong Zuphpawng galaw nga ten Chiang Mai mare hta, “Jinghpaw Wunpawng Mungdan Awmdawm Shanglawt lu na lam hta, hkan sa ra ai, Mung masa lam yan bawngban zuphpawng” hpe Htai mung Jinghpaw Wunpawng Amyusha Hpung KNO woi galaw ai shawa hpawng hta ndai ndau shapraw dat ai re.

Dai zuphpawng hta, KNO ningbaw Duwa Bawmwang La Raw, Howa Duwa Maran Ja La, Chiang Mai hte Ban Mai Sama Hki Jinghpaw kahtawng na KIO/KIA Ningbaw GOC Lahtaw Zau Seng prat magam gun hpyendu hpyenla ni, Htai Mung Jinghpaw Wunpawng Amyu Shayi Hpung (KWAT) hte nawku hpung woi ni, sa du shanglawm ai re.

Mungdan Hpaji Jaw Slg.jan Awng San Kyi woi awn ai No. 2 Panglong Naypyidaw zuphpawng de Wunpawng Mungdan Shanglawt Hpung KIO maga dat kasa 25 sha n ga Jinghpaw pati ningbaw nkau sa du shanglawm ai re.

“UNFC masing masa npu KIO gaw zuphpawng shanglawm ai re lam” KIO Ningbaw Malai-2 Du Kaba Sumlut Gun Maw a August 27 ndau hta sanglang tawn ai.

Asuya a Tsaban 21 Panglong Zuphpawng hkyen lajang komiti hte UNFC lapran, lang hte lang hkrum nna, UNFC ra ai jet ai Federal munghpawm hkrang hpe tang madun bawngban wa sai re. Raitim, asuya maga langai mung n hkap la ai lapran, UNFC ni zuphpawng lung na dawdan ai re.

Ya na zawn KIO woi ningbaw ai UNFC hku nna zuphpawng sa lung ai hpe UNFC a CEC Ginjaw Dinggrin Komiti Salang hte DPN mungmasa bawngban kaja hpung malawm, Duwa Bawmwang La Raw gaw n hkap la let ja ja ninghkap tawn ai re.

Zuphpawng hpaw poi shani, Myen hpyendap dap awn daju Du Kaba Min Aung Hlaing a mungga hta “laknak lang rawt malan wuhpung yawng hpe, laknak lang nna rawt malan ai myit masin hpe koi gam kau ra na lam” tsun wa sai re.

Naypyidaw zuphpawng hpaw poi shani, NCA simsa ga sadi sen rai n htu ai UNFC dapawm a ningbaw hte KIO Ningbaw Malai Du Kaba Nban La a mungga hta, Tsaban 21 Panglong Zuphpawng hpe mi na “1947 ning Panglong Myit Hkrum Ga Sadi” hta ningpawt nna galaw sa na matu aja awa tang madun sai re. Raitim, Dap Awn Daju Du Kaba Min Aung Hlaing hte Mungdan Hpaji Jaw Slg. Jan Suu Kyi yan a mungga hta gaw, “NCA simsa lam ga sadi” hta ningpawt nna matu tsun mat wa sai re.

NCA ga sadi hta, “jet ai federal munghpawm mungdan” gaw sharawt sa wa na matu hkrak ka shaleng da ai lam n lawm ai re. Lama NCA hku sa wa yang gaw asuya hte hpyendap ra ai federal hkrang sha rai na re lam, UNFC salang ni tsun wa sai re.

Tatmadaw Myen hpyendap gaw Tsaban 21 Panglong Zuphpawng galaw nga ai aten hta Jinghpaw mungdaw hte Lahta Sam mung de hpyen masa hkyen lajang ai lam ni hte hpyen n-gun jat ai lam ni dingyang galaw nga ai rai nga ai re.

Posted in: