Asuya dap ni Mung Ding Pa na htingnut tim makau kaw naw nga ai majaw buga masha ni hkrit gari nga

Myitkyina-Kambaiti lam de htu ai Myen asuya tat-ma 33 na hpyenla langai.

Jinghpaw mungdaw Manmaw ginwang Manje myu-ne Mung Ding Pa mare hta shamu shamawt nga ai Myen asuya dap ni gaw Oct. 25 bat Manga Ya jahpawt hkying 4 grupyin hta mare kawn htingnut mat ai raitim mare makau mayan hkan sha naw kasung taw nga ai majaw hkrit tsang nga dingyang re lam mare masha ni tsun ai.

Asuya dap gaw Mung Ding Pa mare masha ni hpe Oct. 22 bat Lahkawng Ya shani Nawku Jawng wang de gawt bang da ai kawn Manga Ya jahpawt manap daw mare makau htingnut mat ai rai nga ai.

“Nawku Jawng, mare makau kaw na gaw le mat wa masai. Raitimung makau kaw sha naw nga taw ai nga yang yi sun hkau-na de sa ai ten lam hkan asuya hpyenla ni grai law hkra nga taw ai hpe mu ai majaw hkrit nna bai hprawng wa ai” nga Mung Ding Pa kawn Sara Ze Htawng, KNG Jinghpaw Shiga Dap de tsun ai.

Mung Ding Pa hta shamu shamawt wa ai pawnghpawm dap ni gaw kahtawng masha ni hpe jahkrit shama gap jahkrit ai majaw sak kung langai rai nga ai Labang Jan Hpaulu Kaw kajawng minla dam si mat ai lam chye lu ai.

Dai hpang asuya dap kawn Hpungtau Mwihpu Gam Awng hte Slg. Hpauyam Hka ni hpe rim mat ai hta ya ten Hpt. Mwihpu Gam Awng sha nta de du wa ai lam mare masha ni tsun ai. Dai majaw mare masha ni gaw asuya dap ni htingnut mat ai zawn raitim makau hta matut shamu shamawt la yu nga ai majaw tinang shimlam a matu tsang nga ma ai.

Dai zawn Mung Ding Pa mare hta ja nga ai asuya dap ni hpe mare kawn yen ya na matu Wunpawng Mungdan Shanglawt Hpung (KIO) hku na seng ang ai asuya salang, Slg. Awng Min hpe tara shang tsun shana sai lam simsa lam akyu galaw hpung (PCG) kawn Slg. Lamai Gum Ja tsun ai.

“Asuya dap (10) daram dai zawn shamu shamawt nga yang mare masha ni hkrit tsang nna tsin-yam hkrum ai.  Simsa lam hkrang shapraw sa wa na lam hta makam n nga wa ai. Dai majaw tau hkrau na asuya dap ni hpe tsun da ai. Kalang ta nhtang mat wa ai kun snr dai kawn htingnut nna gara shara hkan nga hkawm ai kun gaw n chye ai.”

Mung Ding Pa mare hta shamu shamawt nga ai asuya dap gaw Ts.Hk.K Masat (21) hte dapdung yawng (10) jan nga nna Hk.L.Y Masat (69), Hk.M.Y Masat (601) n-gun 200 jan re lam chye lu ai.

Ya ten dai zawn shuk nga ai lam a majaw rim hkrum ai mare masha ni shani shagu lu hka jam jau nga nna Nawku Jawng hta namdum gaw lahkawng sha nga ai majaw yak hkak hkrum nga ai lam dabang kawn chye lu ai.

Dai asuya dap gaw Kawng Ja mare hte Mung Ding Pa kawn la sha nkau hpe mung lam madun hku na rim la woi hkawm nga ai lam chye lu ai.

Asuya maga na myit hkrum da ai hte maren du na October 28-31 ya laman amyusha laknak hpai hpung ni yawng Laiza Muklum hta hkrum shaga bawngban hpawng nga ai aten hta ya na zawn kalang bai shuk hkat wa ai majaw tsang nga nna mabyin masa hpe lahkawng maga gawnhkang yu reng sa mat na ahkyak ai lam PCG kawn Slg. Lamai Gum Ja tsun ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA