Mung Ding Pa mare masha 700 jan hpe asuya dap kawn nawku jawng kaw rim da

Jinghpaw mungdaw Manmaw ginwang Manje buga Mung Ding Pa mare na mungshawa masha marai (700) jan hpe Myen asuya dap gaw October (22) bat Lahkawng Ya shani kawn Nawku Jawng hta shimlam la rim rawng da ai lam chye lu ai.

Hpyen n-gun (200) jan nga ai asuya dap Kawng Ja kawn laknak kaji kaba ni hte gap hkat wa nna Mung Ding Pa mare masha ni hpe gap jahkrit nhtawm nawku jawng wang de gawt bang da ai re lam Mung Ding Pa kawn Sr. Ze Htawng KNG Jinghpaw Shiga Dap de tsun ai.

“Dai hpawt gaw nkau hpe n’ta na n-gu sa la shangun nna Nawku Jawng kaw sha shadu sha shangun ai. Mare shinggan n le shangun ai shinggan le yang gap sat na nga tsun ai. Mare kata kaw shanhte ra ai rai ni hpe shanhte kam ai hku galaw nga ai. Mare grup grup shanhte nga nna kam ai hku galaw nga ma ai.

Matut nna dai hpawt du hkra asuya dap ni shamu shamawt wa ai majaw KIA Dap Dung (12) ginra Lahta Sam mung Mabing myu-ne N’mau Hka sinna maga Saga Nam Hkum mare hta majan byin mat wa ai lam KIA Dap Ba (3) shawnglam dap kawn tsun ai.

Ya ten KIA Dap Ba (3) npu Dung (12) ginra Tantada, Munggu Pa, Man Da, Kawng Ja ginra hta asuya dap hpyen n-gun 1,000 jan shamu shamawt nga nna yat hte shani Mung Ding Pa de shamu shamawt lung wa ai asuya Dap Nu Masat (99), Dap Nu Masat (88) pawng hpawm dap ni re lam chye lu ai.

Mung Ding Pa mare hta htinggaw (600) jan masha marai (2,000) jan nga ai kaw mare masha nkau mi gaw laknak kaba mare de gap bang wa ten shim ai shara yi sun hkau-na hkan hprawng ayai mat ai lam chye lu ai.

“Lu sha gaw grai wa n tsang ra ai. Yi sun hkau na nga ai shara re. Ya nga ai asuya dap ni gaw mare masha ni hpe gara hku rim da ai ngu hpe tsang ai. Bawngban hpawng hta hpyen masa shayawm na lam hte majan ni kahtap n byin hkra myit hkrum da ai. Rai timung shanhte ni shamu shamawt wa nna majan byin wa ai hta KIO ta masat n ka ai majaw mai gap ai ngu masa hte gap ai re ngu shadu ai” nga KIO lakawn lanawn hpung lithkam Salang kaba Doi Pyi Sa KNG Jinghpaw Shiga Dap de tsun ai.

Myitkyina bawngban hpawng hta hpyen masa shadang shayawm na hte majan kahtap nna n byin hkra jawm yu reng gawn hkang ai komiti (Joint Monitoring Committee) hpe manghkang byin ai shara yawng kaw akyu jashawn mai ai hpaw shabawn hkrang hte hpaw nhtan mat na myit hkrum ai raitim asuya maga kawn hpyen n-gun jat shamu shamawt lam a majaw majan matut byin wa ai lam rai nga mali ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA