NDF pati Bawk Ja a manghkang hpe lang hte lang jep joi

Hpakan asuya tara rung de mare jep hkam na du wa ai, NDF pati Jinghpaw Mungdaw ningbaw Labyawng Bawk Ja

Jinghpaw mungdaw Hpakan myu-ne pyada dap hta manghkang lawnglam daw (3) hte rim ahkyak la hkrum ai National Democratic Force (NDF) pati a Jinghpaw mungdaw ningbaw Labyawng Bawk Ja hpe ndai shata du hkra sakse ni hpe lang hte lang shaw jep nga ai lam NDF pati ningtau ningbaw Slg. Tan U,  KNG Jinghpaw Shiga Dap de tsun ai.

“Rung dung ai (20) lang daram rai sai. Manghkang ginrawn ai yawng rai n lu ngut ai. Dai ngut ai hpang she tara hte hkrak jeyang dawdan na re. Daw (3) nga ai daw langai hta sakse sakgan marai (7, 8) nga ai. Dai daw (3) ting a sakse yawng hpe jep joi ngut yang she Jan. Bawk Ja hpe jeyang na re.”

Dai hpang Bawk Ja a manghkang hte seng nna ya hte Myitkyina bawngban hpawng hta asuya salang ni du ai ten upadi salang ni hpe sa hkrum shaga nna Mungdaw kawn myu-ne de dantawk tak jum na htawt shalai dat ya ai lam mung chye lu ai.

“Jeyang dawdan na matu bat (2, 3) daram rung naw dung ra na re. Anhte gaw lawt na re ngu myit mada da ai. Rai tim n lu tsun ai. Shinggan masha ni hkrum shaga mai ai. Hkam ja lam mung kaja ai” nga NDF Mungdaw zinlum komiti amu madu Slg. Myat Mu Myit, KNG Jinghpaw Shiga Dap de tsun ai.

October praw (8, 9, 10) lapran galaw mat wa ai Myitkyina bawngban hpawng de du lung wa ai asuya simsa lam dat kasa ni kawn NDF pati ningtau ningbaw Slg. Tan U hpung hte Hkringmang Slg. Awng Min, Hkringmang Slg. Ung Myin ni mungdaw tara rung salang ni hte sa du hkrum shaga ai re lam chye lu ai.

Hpakan myu-ne tara rung kawn Jan. Bawk Ja hpe masha si manghkang daw 304 (a), tsi htu samyit lang ai manghkang daw (33) hte Myen mungdan tsi mawan alak mi upadi daw (41) hpe pyada dap up Chyaw Mya Win kawn shawk shawn da ai lam rai nga ai.

Jan. Bawk Ja hpe July shata (18) ya shani Myitkyina dum n’ta kawn rim la mat nna Hpakan pyada dap hta ya ten du hkra sharen da ai lam rai nga ai.

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: SHIGA