Yuzana company hpe n ra sharawng ai lam ginra masha ni myit-ra me bang

 Hugawn Pa sharaw madat gaiwang kata du hkra Yuzana company ganaw shakrin nga ai lam

Jinghpaw Mungdaw Hugawng Pa Danai myu-ne Lidu lam mayan na kahtawng ningchyawng hkan shanu nga ai yi sun hkauna galaw masha ni gaw, tinang a ginra kata Yuzana Company nga taw ai lam a marang akyu yawm wa ai majaw ‘ra/n ra’ myit-ra me jaw ai shamu shamawt lam ni hpe galaw nga ai hta mani kahtawng 2 bai madu myit-ra me bang ai lamang galaw ai lam chye lu ai.

Lai wa sai October 21 ya shani Lidu lam mayan na Nawnglung Kawng Ra mare hte Namhpat Ting Kawk mare 2 kawn yi sun masha ni myit-ra me hta shinggyin ai lam shara lahkawng hta galaw mat ai hta Company hpe n ra sharawng ai mahtai tsa htam shadang grau law ai nga shamu shamawt masing hta shanglawm ai yi sun galaw masha; Slg. Lakawng Tang Gun KNG Jinghpaw Shiga Dap de tsun ai.

Htinggaw yawng 100 jan nga ai Nawnglung Kawng Ra mare hta galaw mat ai myit-ra me bang ai lamang hpe jahpawt hkying 9:00 kawn shana daw hkying 2:00 du hkra aten masat da ai hta me jaw ai masha yawng hpawn marai 376 tup nga nhtawm, dai kata kaw n ra sharawng ai ninghkap me -359, madi shadaw me -11 hte shaprai me -6 ni hte maren ninghkap me 96.12 tsa htam shadang shinggyin la lu ai nga tsun ai.

Namhpat Ting Kawk mare hta galaw ai myit-ra me hta ai lamang hpe mung jahpawt hkying 8:00 kawn hkying 11:00 du hkra aten masat da ai hta me yawng 403 hta n ra sharawng ai ninghkap me -402, madi shadaw me -8 hte shaprai me -3 ni hte maren ninghkap me hpe 99 tsa htam shadang lu la ai lam chye lu ai.

Hugawng Pa ginra hta Yuzana company nga taw ai lam hpe yi sun hkauna machyi sum mat ai chyauman buga masha ni kawn myit-ra me bang ai ladat hte galaw nga ai hta, ya ndai lang gaw masum lang ngu na hkam la ai lam rai nga ai.

Ya na zawn hta shinggyin ai a marang chyauman masha ni Yuzana company hpe ‘ra/ n ra’ hkam la lam ajet hpe asan sha htawng madun lu na rai nga ai nga Nawnglung Kawng Ra kawn Rev. U Ra Naw KNG Jinghpaw Shiga Dap de tsun ai.

“Yi sun hkauna galaw masha ni a yi sun ni hpe n tara ai hku zing madu da ai. Company bungli masha ni chyauman masha ni a Dusat Yam Nga ni hpe lagu ai, sat ai. Shanhte htu da ai nhkun hkan anhte yi sun hkauna masha ni a Dumsu, Wuloi ni hkrat si ai tsa lam rai sai. Anhte myit grai n pyaw ai” nga tsun ai.

Bai nna, yi sun hkauna masha ni tinang a myit-ra me bang ai lam ni galaw ai shaloi mung Namhpat Ting Kawk hkamja dap na Slg. Zeya Hpyu ngu ai wa gaw “Nanhte hpa baw na matu galaw ai i. Kadai woi awn nna galaw ai i” nga san nna sumla ni dem mat wa ai lam me bang ai ni kawn tsun ai.

Lai wa sai 2006 ning kawn Yuzana company du shang wa nna Lidu lam mayan na kahtawng ningchyawng ni a yi sun hkauna ni hpe atik anang zing madu la nhtawm Nai Gadung ni hkai nga nna, yi sun hkauna masha ni gaw dum nta ni ginlut mat let yi sun ni sum machyi sum mat nhtawm mayak mahkak hkrum shajang nga ai majaw Company hpe n ra sharawng ai lam rai mali ai.

Machyi sum mat ai kahtawng masha ni gaw Yuzana company hpe n ra sharawng ai lam matut nna myit-ra me hta shinggyin sa wa let htawng madun sa mat wa na re lam mare kawn tsun shaga ahkang lu ai ni tsun ai.

Posted in: SHIGA