Ja maw de kajawng kaja shang rim ai lam ni galaw

 Mugawng Hka kaw ya na zawn ja htu sha nga ai

Jinghpaw Mungdaw Hpakan ginwang Wa Ra Zup ginwang daw Mugawng Hka hte Nam San Hka hta jahtu nga ai masha ni hpe October 24 ya shani Hpakan nga magam dap, makan dap ni pawng nna sa rim ai lam nkau galaw mat ai re nga chye lu ai.

Tatut sa jep ai lam hta Mungdaw hte Mungdaw uphkang du ni, nhprang hte seng ai salang ni, balik matsun du ni, nam kawn lit nga ai ni, wan sat dap kawn hkawt shang lawm jep joi ai hta ja htu masha ni hprawng yen mat ai majaw ja htu jak ni zing mat ai nga hkan nang lawm ai mare kanu kawa ni tsun ai.

Dai zawn Shahtu Zup mare makau na htu sha nga ai ginra masha ni a ja htu jak (Mung-sai-2) hpe sha lu rim nna ja htu masha ni gaw hprawng lawt mat ai lam Wa Ra Zup mare uphkang du Slg. Naw Lawn Jinghpaw Shiga Dap de tsun ai.

“KIA uphkang ai ginra maga gung-kalang jak, amu kaji galaw ai ni (Mung-sai jak) law malawng nga ai. Raitim ginra masha ni hpe shim lam n lu la ya ai majaw mare makau hkan htu sha ai ni hpe rim mat wa ai.”

Dai zawn asuya lit nga ai ni hku nna kajawng kaja rim jep wa ai lam gaw dai ja maw chyai ai lam hte seng nna Intenet shiga lawk hkan mawng pru wa ai majaw magam dap, makan dap ni jawm pawng nna tatut sa jep joi ai lam re nga chye lu ai.

Dai mung-sai hpe uphkang rung hta hkangzing da nna dai mung-sai man mi a manu jahpu gaw sen 45 jan re lam chye lu ai.

Ja htu ai lam a majaw Shahtu Zup mare ka-ang na mahkai npu kaw hka lam pat mat nna hka lam mannai mat nhtawm hkawmsa na yak hkak hkum nga ai hpang mare makau hku hku ja htu sha ni ni hpe rim ai re lam chye lu ai.

Wa Ra Zup mare Mugawng hka hte Nam San hka hta ja htu sha ai ni hpe 3 lang tatut sa jep joi sai lam rai nga ai nga tsun ai.

Dai zawn rim ai lam ni galaw nga ai raitim Wa Ra Zup mare hte Nam San Hka mayan jakbaw kaba hpan gung-galang jak 60 jan hte mung-sai jak 300 gaw shani shanang htu ashap sha nga dingyang re lam; asuya magam dap, makan dap shagu hpe ahkun hkanse bang let galaw sha nga ai re nga mying n tsun mayu ai ja htu masha ni kawn chye lu ai.

Ja htu masing kaba a marang madung hka lam hten za wa nhtawm bungli kri nga ai gaiwang kata nanghpam tsi mawan dut mari ai lam ni hte shinggyim akyu ara hta machyi hkra wa na hpe ginra buga masha ni hkrit tsang nga ai lam mung chye lu ai.

Dai gung-galang jak ni gaw Hugawng ginra e Yuzana company shang wa ai 2006 ning hpang daw grau jat wa ai lam re nga ginra buga masha ni tsun ai.

Posted in: SHIGA