Hpakan hta asuya dap hte KIA Dap 6 lapran gap hkat na ri ri byin nga

Shawng lam ginra shara mi na KIA Dap 6 hpyenla langai

SHIGA KAHTET

Jinghpaw mungdaw Hpakan lungseng maw hta Myen hpyen asuya dap hte Wunpawng Mungdan Shanglawt Hpyendap (KIA) Dap 6 lapran gap hkat na ri ri byin nga ai lam chye lu ai.

Dap 6 uphkang shara Awng Ba Li Maw kaw nna KIA dap ni hpe October 14, mana de hkying 6 pm hpang jahtum tawn sit kau na matu Hpakan Myen hpyendap byu-ha-mu wa sadi jaw wa ai lam, dai hpe KIO ginjaw gaw n sit na matsun da ai majaw, uhpung lahkawng dap lapran gap hkat na ri ri masa re lam, Laiza ginjaw na KIO Manghkang Hparan Masit Komiti malawm Dukaba Nhpang Naw Bu tsun ai.

Ndai KIA dap sit ya na sadi jaw ai hte seng nna ‘Myen ginjaw asuya hku nna KIO hpe hpa shiga shana ai lam n nga ai lam, bai KIO ginjaw hku nna Myitkyina daju Myen hpyendap dingdung daw daju (M.P.Hk) de san yu ai shaloi mung, shanhte n matsun ai’ nga nna sha htang shana wa ai hpe Dukaba Naw Bu tsun ai re.

Dai re majaw Awng Ba Li Maw na tinang KIA dap ni hpe n sit na ginjaw matsun da ten, Myen hpyendap ni gap hpang wa yang gaw majan byin na re nga, Dukaba Naw Bu kawn KNG Jinghpaw Shiga Dap de tsun ai re.

Laja lana gap hkat wa na masa nga ai majaw Lawng Hkang Hkalup Nawku Hpung na mawdaw 5 gaw Awng Ba Li mare masha ni hpe woi na matu dai hpawt hkying 8 hta rawt mat sai lam, nawku hpung sara ni kawn chye lu ai.

Maw mare Awng Ba Li gaw Ginsi Hkaw makau kaw nga ai rai nna masha htinggaw tsa lam nga ai hpe chye lu ai.

Myen ginjaw asuya hte uhpung 18 shanglawm ai amyu shara rawt malan hpung ni a Mungdan Ting Madang Gap Hkat Jahkring Bawngban Hpung (NCCT) lapran mungdan ting madang gap hkat jahkring ga sadi lakmat htu na lam hte seng nna, 6 lang du hkra bawngban sai raitim myit hkrum ai lam n lu shi ai re.

Ndai ten Myen hpyen dap hte gasat gala lam ni gaw Sam hte Karen mungdaw lahkawng hta mung grau grau byin nga sai re.

Posted in: SHIGA