 |
| Sep27-2014 - Dap Ba 4, Dap 9 ginra hta kani nanghpam wan nat poi galaw nga yang |
Wunpawng Mungdan Shanglawt Hpung (KIO) a kani nanghpam nat jahten lamang e rim da ai kani nanghpam tsi mawan ni hpe wan nat jahten ai hpawng de sa du shanglawm ai mare masha ni hte mare salang ni hpe Myen asuya dap kawn san jep ai lam galaw nga ai nga pat jasan komiti ni kawn chye lu ai.
Lai wa sai September 30 ya shani e Ta Mu Nye maga kawn lung wa ai asuya hpyen hpung langai gaw Hu Hpyet mare, Ja Chyai Yang mare de shang wa nna mare salang hte kahtawng masha ni hpe san jep jahkrit shama ai lam ni galaw ai nga nanghpam nat jahten lamang galaw ai shanglawt salang langai tsun ai.
“Mani gaw Myen hpyen la ni shang wa nna mare masha ni hte mare salang wa hpe san jep jahkrit shama ai lam ni galaw ai. Shanglawt ni hpa majaw galaw ai i? Nanhte hpa majaw sa ai? Ndai lamang hta hpabaw ni tsun mat ai? Nanghpam tsi mawan nat jahten ai kaw mare masha ni hpa majaw shanglawm ra ai? Shanglawt ni kaning nga tsun mat ai nga ai ni san ai. Kadai ni lawm ai? Hpa hpe yaw shada nna galaw ai nga san ai” nga tsun ai.
Asuya dap kawn mare masha ni hpe sa jep ai lam gaw KIO hte mung shawa ni pat jasan masing galaw ai lam hpe n ra sharawng ai majaw re nga maram lu ai lam Lahta Sam Mung pat jasan komiti malawm Slg. Zau Ba kawn tsun ai.
“Sa jep nga ai gaw rai sa. Rai tim, gara dap kawn sa jep ai ngu hpe anhte naw sagawn taw ai. Pat jasan lam hpe gaw asuya galaw ra ai. Shanhte n galaw ai majaw KIO galaw ai hpe n ra nna, KIO hte mung shawa pawng nna hkrang shapraw wa ai hpe n ra sharawng nna galaw ai lam re” nga matut tsun ai.
Lai wa sai September 27 ya shani Lahta Sam Mung KIO Dap Ba 4 npu Dap Dung 19 ginra Kuthkai buga Hu Hpyet mare makau hta KIO kawn lu rim ai kani hpraw kilu 26, kani chyang joi 13 jan hte ya-ma tsi hkyep mun 6 jan (ya yang na manu kyat sen 2,000 jan) hpe nat jahten ai lamang galaw ma ai. Dai lamang hta Hu Hpyet mare, Ja Chyai Yang mare hte hpawn kahtawng 10 jan na mare masha 800 hkawt mung sa du shajang ai nga matut tsun ai.
Sa san jep ai asuya hpyen hpung gaw Ta Mu Nye maga kawn lung wa ai rai nna KIO hku na pat jasan masing galaw nga ai hpe n ra sharawng ai lam re nga dai shalawt salang wa kawn tsun ai.
“KIO hte pawng nna kani nat poi galaw ai hpe n ra nna san ai. Dai kaw na mare salang ni gaw maga mi hta asuya bungli gaw galaw ra. Shaga yang mung sa ra. Shanglawt ni shaga yang mung n sa yang n manu. Dai zawn re lapran hta nga nna grai yak ai. Asuya gaw kani pat jasan lam hpe n ra sharawng ai.. shanhte a masa hpe madun nga ai ga re” nga KIO salang ni maram tsun wa ai.
2014 ning, February shata kawn KIO hte Jinghpaw Wunpawng shawa masha ni lata gindun let kani nanghpam pat jasan na matu dawdan sa wa nhtawm Jinghpaw Mungdaw hte Lahta Sam Mung ni hta Hkristan nawku hpawng ni yawng pawng let mung shawa hte rau pat jasan masing hpe hkrang shapraw nga sai rai nga ai.
2011 ning asuya hte KIO lapran majan kalang bai byin hpang wa ai majaw pat jasan masing hpe hkrang shapraw na matu gan jahkring da ai hta ya mung shawa hte pawng nna galaw wa ai lam mung rai nga ai.
September 29 ya shani e Jinghpaw Mungdaw, Hpakan ginwang Kamai ginwang daw, Gwihka, Seng Tawng, Lawng Hkang mare ni hta mung pat jasan masing n-gun madun lamang hpe Hkristan nawku hpung shagu kawn shanglawm woi awn nhtawm n-gun madun wa sai rai nga ai.
0 comments:
Post a Comment