Sam Amyu Sha Democracy Ginjaw (SNLD) hte Amyu Sha Hpyen Masa Mungmasa Dap Hpawm (UNFC) ningbaw ni October praw 6 ya shani Htai Mungdan Chaing Mai mare hta hkrum shaga bawngban ai nga UNFC a Shingtau Amu Madu (1) Dukaba. Hkun Auk Ka tsun ai.
“Kata hte shinggan myit hkumra lam gawgap nhtawm jawm galaw sa wa na matu, bai nna gap hkat jahkring lam ni simsa lam magam bungli yi-ngyam ni hta mung awngdang hkrat hkrang hkra yawm galaw sa wa na matu le” nga Hkun Auk Ka tsun ai.
Lai wa sai September shata Yangung hta Munghpawm Simsa Lam Hkrang Shapraw Komiti (UPWC) hte Mungdan Ting Madang Gap Hkat Jahkring Bawngban Jahkrup Hpung (NCCT) ni mungdan ting gap hkat jahkring ga sadi hta myit hkrum ai lam rai n lu ai daw ni hpe UNFC hku nna bai kahtap tang madun ai nga SNLD kawn Amu Madu. Tsai Nyun Lwi tsun ai.
“Anhte maga gaw KNU hte tsun ai lam ni tsun dan ai. Shanhte maga gaw NCA lakmat htu na lam ni naw nga ai. Asuya hte bawngban ai hta jahkrup n lu ai lam ni nga ai. Rawt Malan ngu ai gasi hpe shawng e gaw myit hkrum nna bawngban taw nga ai lam ni tsun ai” nga shi kawn Mizzima de tsun ai.
Lai wa sai bat laman Bangkok mare hta galaw ai Sam laknak hpai uhpung uhpawng masum hte Sam mungmasa pati lahkawng kawn ningbaw ni hte hkrum shaga bawngban hpawng hta Kayin Amyu Sha Hpung (KNU) Ningbaw. Mudu Se Hpu gaw UNFC kawn le mat ai lam hte seng nna tsun wa ai lam hpe SNLD hku nna UNFC hpe kalang bai sanglang dan ai re nga Tsai Nyun Lwi tsun ai.
UNFC kawn le mat ai mayak mahkak, hkamla lam ni nga ai a ntsa kalang bai pawng hpawm nna hkum hkum ra ra jawm galaw na matu ra sharawng ai nga “anhte ni gaw myit hkrum ai lam gaw kaja dik re. Yawng pawng nna hkum hkum ra ra hte galaw yang gaw grau kaja ai le” nga tsun wa ai nga shi kawn tsun ai.
October praw 2 kawn 4 ya du hkra SNLD pati hpung shang Sam Amyu Sha Bawsang Dimokaretik Pati (SNDP), Sam Mung Hpyen Dap (RCSS/SSA), Sam Mung Rawt Jat Pati/ Sam Mung Hpyen Dap (SSPP/SSA) hte Sinchyaw Makan Dap na Pitutsit kawn ningbaw ni hte hkrum shaga bawngban hpawng galaw ai lam rai nga ai.
August 31 ya shani galaw ai UNFC hkrumra hpawng hta ginjaw jumtek ai ladat yawm ai hkrang hku hpaw shabawn na matu KNU a tang madun ai lam ntsa hpung shang masha ni n hkap la ya ai majaw Ginjaw hte naw bawngban jakrup yu na nga tsun nhtawm hkrumra hpawng kawn walang gale mat ai. Dai hpang September praw 1 ya hta UNFC hpung shang uhpung kawn hkring sai lam KNU kawn laika shagun ai lam rai nga ai.
Ya na bawngban hpawng hta UNFC Ningbaw. Nban La, Ninggawn Amu Madu. Hku U Re, Hkun Auk Ka, Nai Han Ta ni shanglawm nna SNLD maga kawn Slg. Hkun Htun U, Amu Madu. Tsai Nyun Lwi, Tsun Shaga Ahkang Nga Ai Slg. Tsai Lik hte SSPP/SSA Ninghpum Salang rai nga ai Dukaba. Sehtin ni gaw jahpawt hkying 9 kawn shani ka-ang hkying 12 du hkra hkrum shaga bawngban ai lam chye lu ai.
Ya na zawn hkum shaga bawngban ai lam a marang hkumra wa na lam jawm galaw sa wa na matu hkum ra ai lam hpe jawm galaw sa wa ai lam grau jat wa nna mungdan kata simsa lam hte mungmasa bawngban hpawng ni a matu mung, hkumra ai lam ni hta mung shada da chye na hkat ai lam ni lu la shajang ai nga Dukaba. Hkun Auk Ka tsun ai.
0 comments:
Post a Comment