Hpakan KIA dap yen ya na matu Myen asuya kahtap sadi jaw

Oct-2-2014 ya shani, Hpakan Dap 6 daju hpaw poi galaw nga yang

Jinghpaw Mungdaw Hpakan daju Myen asuya dapnu masat 66 gaw Wunpawng Mungdan Shanglawt Hpyen Dap (KIA) Dap Ba 2 npu Dap Dung (6) hpe yen ya na matu sadi jaw mat ai nga Wunpawng Mungdan Shanglawt Hpung (KIO) a tsun shaga ahkang lu ai Salang Lah Nan tsun ai.

Dapnu masat 66 npu Hk.L.Y Masat 11 dap dung up Latdu Up Dukaba. Chyaw Zeya gaw October 14 ya shana daw hkying 6:00 ten jahtum da nna yen ya na matu Awng Bali mare lawk salang ni kawn KIA dap 6 de shana wa ai zawn, daini October 15 ya shani hta mung yen htingnut ya na matu kahtap shana wa ai lam rai mali ai.

“Anhte maga hku na gaw tara shang shana ai lam n galaw ai. Bawngban jahkrup ai masa hku n re sha ntsa hkrau rai la-ba ka-up yen shangun mayu ai masa re. Anhte gaw ndai lam hpe asim asa sha byin shangun mayu ai. Shanhte tsun ai lam hpe dawm kau shangun mayu ai. Dai gaw ladat jaw jaw hte hparan mayu ai jasat re” nga Slg. Lah Nan kawn tsun ai. 

Ndai laman asuya hpyendap gaw KIA a Dap Ba (2) Danai maga e mung hpyen n-gun jat bang nna shara jahkrat da ai zawn, Dap Ba (3) ginra Manje buga Kai Htik mare hta mung asuya hpyen n-gun marai 200 jan jat bang da nhtawm asuya maga kawn hpyen masa hku hparan wa na de manaw yawng taw nga ai nga Slg. Lah Nan matut tsun ai.

“Madung gaw Dap Dung 6 kaw hpyen masa hku nna hparan na ngu ai jasat hte jahkrit ai masha pru taw ai. Ngam ai ginra ni hkan mung hpyen dap n-gun jat da ai ni nga ai. Hpyen masha shamu shamawt lam chyawm gaw anhte maram yu taw nga dingyang naw re” nga shi kawn tsun wa ai.

Asuya hpyendap gaw matut nna dip n-gun jaw wa ai rai yang, asuya hte amyu sha laknak hpai rawt malan hpung ni lapran mungdan ting madang gap hkat jahkring bawngban jahkrup sa wa na mahkrun hta ahtu hkra wa mai ai nga matut tsun ai.

Dai majaw ndai manghkang hte seng nna simsa ai ladat hte hparan ya na matu simsa lam bawngban hpawng hta shanglawm ai Myen mungdan hte seng ai Mungkan Wunpawng Hpung kawn dat kasa Jan. Marian hpang de October 14 ya shani shana dat ai lam chye lu ai.

2012 ning laman byin mat wa ai majan hta e KIA a Dap Dung 6 dap hpe asuya dap ni zing la kau nhtawm ya yang asuya a Hk.L.Y Masat 11 ni kawn kalang bai shara la da ai lam rai nna ya KIA ni kalang bai shara jahkrat tawn ai Dap Dung 6 shara nnan hpe mung yen shangun ai lam gaw myit yu hpa re nga Slg. Lah Nan tsun ai.

Lahkawng maga majan bai byin wa na hpe tsang ai majaw Awng Ba Li kahtawng masha ni hprawng yen hkawm ai lam ni nga ai lam chye lu ai raitim KNG Jinghpaw Shiga Dap kawn alak mi shagrin da ai lam rai n nga ai.

KIA maga kawn mung yen ya na lam n nga ai hta sha n ga asuya maga htim gasat wa yang hkaphkan shingla gasat na matu jin jin hkyen maren da ai nga Dap Dung 6 kawn salang langai tsun ai.

Lai wa sai September praw 1 ya kawn Hpakan Lungseng Maw hpe kalang bai hpaw dat ai hpang asuya hte KIA ni ahkun hkanse hta sha ai lam a majaw lahkawng maga hpyen masha chya hkat lam mung nga ai re.

Manghkang Hparan Masit Komiti hpaw ninghtan ngut ai hpang kawn KIA hte asuya dap ni majan nhpan yawm mat wa ai nga lahkawng maga na hpung ni tsun wa sai re.

KIA gaw Munghpawm Simsa Lam Hkrang Shapraw Komiti (UPWC) hte amyu sha bawsang laknak hpai hpung 16 hte hpaw shabawn da ai Mungdan Ting Madang Gap Hkat Jahkring Bawngban Jahkrup Hpung (NCCT) hta shang lawm let simsa lam bawngban hpawng hta shanglawm nga ai rai nga ai.

Posted in: SHIGA