Jinghpaw pati 2 pawnghpawm nhtawm Pati langai hpaw

Jan 2-2015 Myitkyina, Shatapru St Patrick gawknu zuphpawng kaw nna KDP hte KNCD pati yan hpe Kachin National Congress (KNC) hku hpaw dat ai

Kachin Democratic Party (KDP) hte Kachin State National Congress for Democracy (KNCD) pati yan pawnghpawm nhtawm Kachin National Congress (KNC) pati shingteng hte du na 2015 ning ra lata poi a matu jahpan bang mat na re lam KDP pati ningbaw Slg. Gumgrawng Awng Hkam tsun ai.

2015 ning January praw 2 ya shani Myitkyina ginwang Shata Pru mare na St Patrick gawknu hta galaw mat wa ai Jinghpaw mungmasa pati ni pawnghpawm lam bawngban jahkrup hpawng hta mungshawa myit-ra hte maren pawnghpawm kau dat ai lam re nga shi kawn tsun ai.

“Jinghpaw mungshawa gaw anhte pati ni jawm galaw sa wa nna pati langai hku sha mu mayu ma ai. Jinghpaw mungshawa akyu ara hpe gunhpai na matu pati ni pawnghpawm ai lam rai nga ai. Anhte mung, shawa masha hte lata gindin let pati langai hku sha sa wa yang grau manu na re ngu shadu ai majaw pawnghpawm ai lam re” nga matut tsun ai.

Dai pati hkawng yan gaw tinang pati kata dinghkrai masa hpe madung n tawn ai sha Jinghpaw mungshawa ni a myit-ra hkam la lam ajet rai nga ai pati pawnghpawm lam hpe sha namnak da let Kachin National Congress (KNC) pati amying shingteng ningnan hpe awng awng dang dang gaw de da lu sai nga shawa masha yawng hpe chye na shangun mayu ai hte hpawn lawnglam 4 lawm ai ndau laika hpe January praw 2 ya shani ndau shabra dat ai lam rai nga ai.

January shawng na bat hta Ne Pyi Daw munghpawm ra lata poi komishin de Kachin National Congress mying hte pati mying jahpan bang mat na rai nga ai. Dai hpang pati a shawnglam magam bungli jasan jasa ni hpe masat jahkrat mat nhtawm du na 2015 ra lata poi hta Jinghpaw Mungdaw ting hta shang shingjawng mat na re lam Slg. Gumgawng Awng Hkam kawn tsun ai.

Jinghpaw Mungdaw Myitkyina ginwang Kachin Democratic Party (KDP) Kachin State National Congress for Democracy Party (KNCD), Kachin State Democracy Party (KSDP) hte Lisu Nantional Development Party (LNDP) ni hpe pawnghpawm na matu lai wa sai 2014 ning January shata Hpakan ginwang Jinghpaw Wunpawng Mungshawa Nsen Shapraw Komiti kawn shawng ningnan lang shakut shaja sa wa ai lam hta ya ten mungmasa pati 2 pawnghpawm lu wa ai majaw grai myit dik n-gun lu ai nga komiti ningbaw Sara Lamawng La Tawng kawn tsun ai.

“Anhte Jinghpaw pati ni yawng pawng na matu shakut shaja sa wa ai rai nga ai. Jahtum gaw pati 2 sha pawng mat wa ai. Hpa mi rai rai pawnghpawm mat ai majaw myit dik ai. Anhte yaw shada ai lam awngdang ai ngu sha masat la ai” nga shi kawn tsun ai.

Raitim Lisu National Development Party (LNDP) pati gaw mungdan ting madang hku hpaw shabawn da ai re majaw pati ni pawnghpawm na matu myit n hkrum ai zawn, Wunpawng Mungdan Shanglawt Hpung (KIO) Tingyang Up Malai (hkring sa) Dr. Manam Tu Ja woi awn ai Jinghpaw Mungdaw Dimokaresi Pati (KSDP) mung pawnghpawm na matu aten grai gahtep mat ai majaw du na 2015 ra lata poi ngut ai hpang daw she pati pawnghpawm na lam matut nna galaw sa mat na re nga December 24 ya shani ndau laika shale dat ai.

Jinghpaw mungmasa pati ni langai sha byin hkra shakut na lam Wunpawng amyu sha ni rai nga ai Jinghpaw, Maru (Lawwaw), Rawang, Lachyik, Zaiwa, Lisu amyu lakung ni kawn komiti malawm 11 lawm ai Jinghpaw Wunpawng Mungshawa Nsen Shapraw Komiti hpe lai wa sai 2013 ning December shata e hpawng shabawn dat ai rai nga ai.

Jinghpaw Mungdaw kata dai Jinghpaw pati mali hte Tai Leng ngu ai Sam Hkyeng Amyu Sha Rawt Jat Pati; pati manga ni gaw tara shang hpaw shabawn ahkang lu da chyalu rai nga ai.

Posted in: SHIGA