Manau poi de saw shaga da ai hta nkau sa du na n re nga htang shana

Manau wang shang chyinghka, Shatapru, Myitkyina

Jinghpaw Wunpawng amyu sha shagu kawn htunghking komiti ni hpang de manau nau na matu amyu lakung mi hta masha n-gun 100 hking hku hte hkrak nau na matu ga saw da ai raitim Jinghpaw Wunpawng Laili Laika hte Htunghking Hpung Ginjaw, Ramma Dap kawn gaw sa du na n re lam htang shana dat ai nga Ramma Dap komiti malawm Shd. Yaw Sam tsun ai.

“Anhte htunghking hpung ni hpe mung saw shaga ma ai. Anhte hpe amyu lakung mi hta marai 100 shaw ya marit nga tsun ai. Raitim anhte n lung sai ngu tsun dat sai. Sa mung n sa ai. Anhte gaw manau poi hpe lani mi gaw galaw ga, rai timung ndai zawn 6 ya 7 ya hkik hkik hkam hkam n kam galaw ai. Hpyen yen tsin-yam masha ni naw nga ai. Simsa lam n lu shi ai majaw manau poi rai n galaw ga ngu bai n htang tsun dat sai” nga shi kawn tsun ai.

Dai komiti ni hku nna Myitkyina, Hpakan, Manmaw, Danai ginra hkan na Jinghpaw Wunpawng Laili Laika hte Htunghking Hpung Ginjaw Ramma Komiti malawm ni gaw zuphpawng galaw nhtawm tsin-yam masha ni nga nna mungdaw kata simsa lam rai n nga ai majaw ten galu manau poi n galaw na matu ninghkap laika hpe Jinghpaw Mungdaw Hkringmang Daju hte Htunghking hte seng ai Hkringmang ni hpang de laika ka tang da chyalu re nga matut tsun ai.

Manau nau na matu Jinghpaw, Maru (Lawwaw), Lachik, Azi (Zaiwa), Rawang, Lisu amyu lakung langai hta yawm dik marai 100 hpra htunghking hkinghku sumraw nna ka madun mat na matu hte yu maya hking hte hpawn nga yang manau nau pa pa ai masha yawng 1,500 hkawt nau dan na matu hkyen lajang da ai nga Manau Shabyin Shatai Komiti Ningbaw Slg. Lahkri La Awng kawn tsun ai.

Jinghpaw Mungdaw Asuya woi awn galaw ai Manau Poi de lung na matu hpyen yen tsin-yam masha ni hpe sa tau la na nga poi shabyin shatai komiti kawn saw shaga da ai raitim sa du na n re lam Waimaw Ginwang Mungna Tsin-yam Dabang kawn lit nga ai Sr. La Rip tsun ai.

“Manau poi ngu gaw ga baw nga ra ai. Ga baw n nga ai sha manau nau ai baw n re. Anhte hpyen yen tsin-yam masha ni yawn hkyen hkrum nga ai ten anhte hpe roi ai she re. Modaw hte shaga tim n sa ai. Shanhte gaw galoi raitim mai sa ai nga shaga da ai. Raitim anhte n sa ai. Gara hku mung n lu sa ka ai” nga shi kawn tsun ai.

Mungdaw asuya gaw mare langai hta marai 50 shadang manau poi de sa du na matu shaga da ai nga Facebook laika man ni hkan chyam bra nga ai lam shi matut tsun ai.

“Jinghpaw Mungdaw Nhtoi lamang de mare uphkang du ni, madi shadaw lawm ai ni hku nna sa na matu Makan Dap ni hku nna mung saga ai zawn re gaw nga ai. Jinghpaw Mungdaw Nhtoi lamang lung na matu gaw she shaga ra le. Hkringmang Daju hku nna gadai hpe mung n shaga gaw hkum mai u ga le. Uphkang Du chyawm gaw sa mu nga sha tsun na re” nga tsun ai.

Du na January praw 8 kawn 11 ya du hkra manau nau mat na rai nna January 10 ya Jinghpaw Mungdaw Nhtoi shani e Hkringmang Daju Lajawn Ngan Seng hku nna mungga shaga na re lam chye lu ai.

January praw 5 ya kawn Manau Poi galaw hpang na matu manau wang hpaw poi lamang galaw mat ai rai nga ai. Dai lamang hta mung Jinghpaw mungdaw kata na ginra masha ni hte Jinghpaw shinggyim uhpung uhpawng nkau sa du ai lam n nga ai zawn, Wunpawng Mungdan Shanglawt Hpung (KIO) mung sa du ai lam n nga ai.

Posted in: SHIGA