Majan shangap kau na matu N’mawk mungshawa ni n-gun madun

Majan shangap kau na matu N'mawk mungshaw ni n-gun madun (phto - Sagu Kasha Nlam)

Myen mung asuya hpyendap a Jinghpaw Ginra Majan ya jang shangap jahkring kau ya na matu hpyi ai N’mawk mare mungshawa ni a n-gun madun lamang hpe daini October 21, jahpawt daw hta galaw wa sai re.

N-sen n pru ai sha, laika poster ni lang let lam hkawm n-gun madun ai hta buga masha Jinghpaw, Sam hte hpyen yen masha yawng 500 dang shanglawm ai rai nga ai.

N-gun madun shawa ni gaw, “Jinghpaw ginra majan ya jang jahkring, simsa lam ra sharawng ai, amyu shayi shimlam lu na lam, hte mungmasa hpe hpyen masa hte hparan ai hpe n ra sharawng ai” ngu ai lam ni hpe hpyi lajin mat sai re.

IDP hpyen hprawng masha ni sha n ga mungchying mungshawa yawng a matu simsa lam n nga n mai re lam hpe ndai n-gun madun poi woi awn ai N’mawk amyu shayi hpung na Jan. Nang Bawk ya na zawn tsun ai re.

“Mungdan simsa mat wa yang she kaga hpa mung n ra sai. Ahkaw ahkang anhte law law lu wa na. Mugdan nsim sa ai majaw majan byin nga ai majaw IDP camp ni law wa ai. IDPs ni hpe mungkan kaw na garum ai lam mung n gun yawm wa sai. Ndai zawn jam jau ai lam law law a majaw simsa lam hpe shawng nnan ra sharawng nna anhte galaw ai ga re.”

Posted in: