Asuya UPWC hte NCCT hkrum shaga na lam, masa hku myit hkrum

Mungdan Ting Madang Gap Hkat Jahkring Bawngban Jahkrup Hpung (NCCT) hte Munghpawm Simsa Lam Hkrang Shapraw Komiti (UPWC) ni du na December 25 ya n du yang kalang bai hkrum shaga na matu masa hku myit hkrum da ai lam lu da sai nga Myanmar Peace Center (MPC) kawn Slg. La Mawng Shwi tsun ai.

“Daini na bawngban hpawng hta grau grau chye na hkat wa ai. Yak hkak lam ni nga ai raitim bawngban hpawng ni bai galaw lu ai. Ndai bawngban hpawng hpe anhte maga mung Hkrismat rai n du yang bai hkrum na matu masa hku na ndai maga hku myit hkrum da ga ai” nga Slg. La Mawng Shwi kawn tsun ai.

MPC hte NCCT dat kasa ni November 27 ya shani Htai Mungdan Chiang Mai mare hta hkrum shaga ten MPC maga kawn numshawn shaw da ai raitim NCCT maga hku nna zuphpawng galaw na ninghtoi hpe kalang bai htang shana mat na rai nga ai.

Bawngban hpawng hta lai wa sai September shata NCCT hte UPWC lapran mungdan ting madang gap hkrat jahkring nhprang hta chya nga ai dawshan ni hpe tau hkyen lajang ai lam re nga Slg. La Mawng Shwi tsun ai.

Lahkawng maga myit rai n hkrum lu ai dawshan 8 naw nga nhtawm du na 7 lang ngu na hkrum shaga bawngban hpawng e kalang bai bawngban jahkrup lu mat jang gaw 2014 ning laman mungdan ting madang gap hkat jahkring lakmat htu lu wa na re ngu htang maram ai lam matut tsun wa ai.

“Laiza kaw byin ai manghkang a hpang shada da makam lam hpe gingdan ai made htang ya ai. Anhte shiga sumtang ni shada da bai jaw hkat lu ai. Slg. Awng Min htet dat ai gaw zuphpawng galaw lu na matu, Slg. Nai Han Ta hte bawngban mat ai daw 8 ni hpe kahtap bawngban ai” nga shi kawn matut tsun ai.

Du na December shata Hkrismat n du shi yang NCCT hte UPWC ni kalang bai hkrum shaga na matu MPC maga kawn numshawn shaw ai lam ntsa NCCT uhpung kata ndai lapran hkrum shaga bawngban yu nhtawm asuya hpe bai htang shana mat na re lam NCCT Slg. Nai Han Ta tsun ai.

“Anhte maga mahtai rai n jaw shi ai. Anhte kata kaw atsawm sha naw jahkrup ra ai. Laiza kaw byin mat ai mabyin ntsa nkau gaw grai hkam sha taw ai. Dai ni nga taw ai majaw anhte kata kaw bawngban jasan ngut jang she mahtai lu jaw na re” nga shi kawn tsun ai.

Lai wa sai November praw 9 ya shani Ne Pyi Daw hta NCCT dat kasa nkau hte UPWC N/T Ningbaw Slg. Awng Min hte hkrum shaga bawngban ai lam ni hpe kalang bai bawngban htailai hkat ai nga matut tsun ai.

Dap hte seng nna shim lam hte seng ai hpe kalang bai jawm hpaw shabawn ai lam hpe anhte maga n lu hkap la ai mabyin masa ntsa, awra maga na bai myit sawn numshawn shaw wa ai hpe No. 3 hkrang nhprang madang kaw bai da na matu shanhte maga kawn numshawn shaw bang wa ai. Dai hku rai yang gaw kaja ai. Rai timung shanhte maga kawn ngang ngang kang kang rai n lu tsun ai. Hpyen dap a jasat jasa shanhte maga rai n lu nga malu ai” nga Nai Han Ta kawn tsun ai.

Wunpawng Mungdan Shanglawt Hpyen Dap (KIA) a Hpyen Du Shalat Jawng ntsa Myen asuya dap maga kawn laknak kaba gap ai lam majaw Du Jawngma 23 si mat ai mabyin a majaw makam yawm mat nhtawm makam bai gawgap lu na lam hte bawngban ai lam bai galaw na matu gawn lajang hkat ra mat ai nga matut tsun ai.

KIA Du Jawngma ni si mat ai lam hte seng nna daini bawngban ai lam kata bawngban shalawm ai lam nga ai raitim dawdan hparan lu na ahkang laga n nga ai sha mungmasa bawngban ai lam hta she manghkang ni hparan mat wa lu na re lam Slg. La Mawng Shwi kawn tsun ai.

Bawngban hpawng de NCCT maga kawn Slg. Nai Han Ta, Badu Koi Htu Win, Dukaba. Gun Maw, Dukaba. Hkun Uk Ka, Slg. Htun Zaw ni hte hpawn marai 6 hte MPC kawn Slg. La Mawng Shwi, Slg. Nyu Ung Myit, Slg. Min Zaw U, Slg. Awng Nai U ni hte hpawn marai 6 ni bawngban mat ai rai nga ai.

November 27 ya shana daw MPC dat kasa ni gaw Sam Dap RCSS/SSA kawn tsun shaga ahkang lu ai Tsai Lawp Sai hte Dukaba. Tsai Ngin ni hte mung hkrum shaga bawngban mat wa ai.

Posted in: SHIGA