Myen asuya gap ai laknak kaba a majaw KIA hpyen du jawng na marai 20 rap si

KIA hpyendu shalat jawng, Woi Chyai Bum

Wunpawng Mungdan Shanglawt Hpung (KIO) Ginjaw Laiza de Hka Ya Bum daju Myen asuya Hk.M.Y Masat (389) dap dung kawn gap bang dat ai 105 MM myawk si kaba Hpyen Du Shalat Jawng ang ang kaw hkrat kapaw nna Du Jawngma marai 20 kalang dat rap si mat nhtawm marai 16 ningma sawng hkala nba hkrum mat ai nga KIO a tsun shaga ahkang lu ai Slg. Lah Nan tsun ai.

November 19 ya shani hkying 12 minit 36 ten e myawk si gaw ningpawt ninghpang hpyen shaman shakyang nga ten hkrat ang nna si hkala law mat ai lam rai nga ai.

“Asuya Hk.M.Y Masat (389) kawn anhte ni a Hpyen Du Shalat Jawng nga ai kaw nan atsawm ang ang shada nna 105 MM hte gap dat ai. Dai aten yawng chyawm nga ai lam mung shani kaang ten hta Du Jawngma ni gaw ningpawt ninghpang hpyen shaman shakyang nga ai aten kaw hpyen sharin shakyang pa e nan wa hkrat ang ai majaw si hkala law mat ai ngu mai tsun ai” nga Slg. Lah Nan kawn tsun ai.

Daini si mat ai Du Jawngma ni gaw asak 18 ning kawn 21 ning grupyin na ramma ni rai nhtawm hpawt de KIO Dap Ba shagu hta Yawn Hkyen Masat Ninghtoi hku masat nna yawn hkyen lam masat masa nawku dawjau ai lam galaw na matu amying jahkrat dat sai lam matut tsun ai.

Jahpawt daw hkying 9:00 grup yin hta KIO Ginjaw kawn deng 6 gang ai shara kaw dung ai KIA Dap Dung (253) dap hpung ni hte Myen asuya HK.M.Y Masat (384) ni hkying hkum chyen mi daram gap hkat ngut ai hpang hkying 12 minit 15 ten Man Maw ginwang Gang Dau Yang daju Myen asuya Hk.M.Y Masat (390) kawn majan byin mat ai shara de 105 MM laknak kaba hte gap bang wa ai nga tsun ai.

Dai hpang daihpawt manap hkying 4 grup yin ten hta Jinghpaw Mungdaw Hu Pin ginwang daw Lai Nawng ginra KIA Dap Ba (2) npu Dap Dung (26) shawnglam dap dabang hpe mung Myen asuya Hk.L.Y Masat (6) Dap Dung kawn shang gasat ai hta KIA Hpyenma langai hkrat sum mat ai zawn, jahpawt hkying 7:00 grup yin hta Namti ginra na KIA Dap Ba (2) npu Dap Dung (11) kawn Hpyenma lahkawng hpe Myen asuya dap ni jaugawng gasat ai majaw KIA Hpyenma langai hkrat sum mat nhtawm Hpyenma marai 2 hkrat sum mat ai nga Slg. Lah Nan tsun ai.

Myen asuya gaw simsa lam galaw ai nga tsun taw ai raitim ta tut hta hpyen masa hku hparan nga ai majaw ya yang asuya ntsa mai kam/n mai kam mahtai gaw pru wa sana sha rai nga ai nga Slg. Lah Nan kawn sawn maram dat ai.

“Moi kawn nga ai yaw shada lam hpe hkrang shapraw dat ai ga rai nga ai. Asuya gaw simsa lam wa anga tim ta tut e bawngban jahkrup ai lam hpe pyi ahkyak madung n shatai yang me. Shamyit kau na lam de sha sa taw ai ngu ai hpe htawng madun dan ai re. Ngam ai amyu sha bawsang ni hpe mung ndai ladat hku sha galaw na ra ai” nga shi kawn tsun ai.

Shani kaang ten hta mung Laja Yang a dingda daw Daw Hpum Yang mare maga kawn Myen asuya hpyen hpung ni KIA shawnglam dap dabang nga ai Laiza maga de htu lung shamu shamawt wa ai nga shiga lu ai lam matut tsun ai.

Daini gap ai lam hte seng nna Munghpawm Simsa Lam Hkrang Shapraw Komiti (UPWC) Ningbaw Slg. Awng Min, Jinghpaw Mungdaw Asuya Uhpung Uhpawng, Manghkang Hparan Masit Hpung hte Simsa lam bawngban jahkrup ai lam hta shanglawm wa ai Mungkan Wunpawng Hpung kawn dat kasa Slg. Nambiar, Jan. Marrian, Miwa Mung na Kasa ni hpang de mung shana da sai lam shi kawn tsun ai.

Dai zawn gap ai lam hte seng nna Jinghpaw Mungdaw asuya rung de san yu mat wa ai shaloi gap ai lam hte seng nna chye tim azin ayang n chye shi ai lam lit nga ai salang langai tsun ai.

Ya na zawn asuya maga kawn gap wa ai majaw simsa lam bawngban jahkrup ai lam ni byin wa sana n re lam Simsa Lam Akyu Galaw Hpung (PCG) kawn Slg. Lamai Gum Ja KNG Jinghpaw Shiga Dap de tsun ai.

“Laknak kaba 105 MM hte gap ai. Myihtawn hte yu nna gap ai. Hka Ya Bum kawn yawng mu lu ai nga yang masha kahkyin nga ten kaw nan da-sang shada nna gap dat ai” nga shi kawn tsun ai. Ya yang Hka Ya Bum hta Myen asuya a hpyen n-gun marai 400 jan nga taw ai nga KIA shawnglam shiga lawk kawn chye lu ai.

Ya yang hkala ai marai 16 hpe Laiza Tsi Rung hta tsi tsi da nna dai ni kawn marai 1 gaw tsi rung de sa ai aten kahtap si mat nhtawm yawng marai 21 si mat sai re lam shi kawn tsun ai.

November 16 hte 17 ya shani hta mung Man Maw ginwang Manje ginwang daw kata KIA Dap Ba (3) npu Dap Dung (12) hte (27) ginra ni hta mung Myen asuya dap hte majan byin mat wa nhtawm KIA maga langai hkrat sum mat sai rai nga ai.

Posted in: SHIGA