Dingbai dingna lapran KIA du jawngma yawn hkyen hpawng galaw

 Nov 22-2014 hkrat sum ai KIA du jawngma 23 a yawn hkyen hpawng galaw nga yang, Shatapru Manau Wang, Myitkyina

Jinghpaw Mungdaw Myitkyina ginwang Shata Pru Manau Wang e KIA Du jawngma ni hkrat sum ai lam myit dum akyu hpyi hpawng 2 ya galaw wa ai hta Myen asuya daru magam manat ai ni kawn Amyu Sha Dawnghkawn hpe raw kau na matu tsun nga ai lapran galaw mat wa ai re nga akyu hpyi hpawng shanglawm ai ni tsun ai.

Manau wang kata nawku dawjau ai lamang galaw nga ai maga mi hta kaang hkup shalun da ai dawnghkawn hpe raw kau na matu mani kaw nna lang hte lang tsun wa ai lam akyu hpyi hpawng woi awn ai ni kawn tsun ai.

Daini na lamang hta mung daru magam manat ai ni kawn jahpawt kaw na Jinghpaw Wunpawng Htunghkying Hpung Ginjaw de amyu sha dawnghkawn hpe raw kau na matu 10 lang hta n yawm tsun taw nga ai lapran shana maga ten du hkra n raw sai sha matut galaw mat wa ai nga htunghking hpung ginjaw kawn Slg. Gum Ja Naw KNG Jinghpaw Shiga Dap de tsun ai.

“Ya yang simsa lam hpe ra sharawng nna makam gawgap nga ten n myit mada ai yawn hpa mabyin hpe hkum sha ra mat ai. Ya na zawn anhte hpe n tara ai masa hte hkrat sum mat wa sai ni hpe myit dum let shanhte hpe hkungga ai hku nna makawn shakawn ai lam, hkungga jaw ai lam hte shagrau sha-a ai lam ni hpe mungkan ting chye hkra hkristan nawku htung lai hte akyu jawm hpyi ai lam re. Ngam nga ai dum nta masha ni a matu mung akyu hpyi ya ai. Hkrat sum mat ai ni a asak wenyi gaw Karai Kasang hte seng ai re majaw akyu hpyi ai lamang galaw ai lam re” nga tsun ai.

Sa sadi jaw ai ni gaw Myitkyina Balik Dap gawnhkang du, ginwang Municipal hte ginwang uphkang du ni re lam chye lu ai.

Myit dum akyu hpyi lamang de sa du ai ni gaw yawn hpyen ai masat dingsat hku nna sumpan achyang hpe ta lahpum hta gyit shakap nna wunpawng htunghking bunghkaw hte hpajet ni lawai rai yawn hkyen ai masat masa ni galaw let bu hpun sumraw ma ai.

Daini na akyu hpyi hpawng hta Waimaw ginwang hpyen yen tsin-yam dabang kawn marai 1,000 mi jan sa du nhtawm Jinghpaw Mungdaw hkristan nawku hpung shagu kawn shawa masha yawng 10,000 mi hkawt sha du shang lawm mat ai nga woi awn ai Myitkyina Hkristan Kongsi (MCC) kawn chye lu ai.

Myitkyina ginwang Shata Pru Manau Wang kata akyu hpyi ai lam hpe mani November 21 ya kawn 22 ya du hkra galaw mat ai lam rai nga ai.

Jinghpaw Mung shawa masha ni gaw November 19 ya shani Laiza Muklum Wunpawng Mungdan Shanglawt Hpyen Dap KIA Hpyen Du Shalat Jawng de Myen asuya dap a laknak kaba 105 MM gap bun ai lam a majaw hkrat sum mat wa sai share shagan 23 hte hkala nba hkrum ai ni a matu yawn hkyen ai lam hte akyu hpyi n-gun madun ai lam mung re nga sa du ai ni kawn chye lu ga ai.

Posted in: SHIGA