UNFC ntsa ningmu yu shut ai lam hpe asan sha sanglang dan

UNFC Daphpawm a N/T Nai Han Ta

Amyu Sha Hpyen Masa Mungmasa Daphpawm (UNFC) hte Munghpawm Simsa Lam Hkrang Shapraw Komiti (UPWC) ni Ne Pyi Daw hta ntsa lam hkrum shaga mat ai shaloi UNFC ntsa ningmu yu shut ai lam hpe asan sha hparan jasan la lu sai nga UNFC Ningtau Amu Madu (1) Slg. Nai Han Ta kawn tsun ai.

November praw 9 ya shani UPWC Ningbaw Slg. Awng Min hte UNFC Ningtau Ningbaw Slg. Nai Han Ta, Ningtau Amu Madu (1) Dukaba Hkun Uk Ka, Ningtau Amu Madu (2) Slg. Salai Htala He ni hte rau marai mali gaw Ne Pyi Daw e ntsa lam hkrum shaga bawngban ai lam hte seng nna November 15 ya shani ndau laika shale da ai.

Lai wa sai September shata asuya hpyen dap Dap Awn Daju Dukaba Min Awng Lai gaw UNFC ntsa mungdan ting gap hkat jahkring lam, simsa lam gawgap nga ai aten ladaw e UNFC a shamu shamawt lam ni n galaw ging ai lam dinglun ai lam a ntsa sa du sanglang dan lu ai re nga Slg. Nai Han Ta tsun ai.

“UNFC ntsa e jahpoi ahpyak dinglun ai lam ni hte seng nna UNFC ntsa gara hku mu ai ngu san yu yang Slg. Awng Min tsun ai; Federal hpyen dap hpaw shabawn lam hte seng ai ni, NCCT gaw UNFC a jasat jasa lamyan kata e shamu shamawt nga ai ngu ai lawnglam ni ntsa shi hku na amyu mi shadu ai. Anhte chyawm gaw mungmasa hku na htap htuk wa hkra ladat shaw bawngban ai ladaw kaw ndai zawn galaw wa ai gaw ntsen hpa re. Simsa lam hpe madung n dat ai ngu ai masa daw hku she tsun wa ai, daini hpe hparan mat ai” nga shi kawn tsun ai.

Federal Munghpawm Hpyen Dap hpaw shabawn lam hte seng nna UNFC gaw mungmasa hta la-kap nna hpaw shabawn lam nga ai zawn, maga mi de mung hpyen masa hku tinang a uhpung masha ni tinang tinang makawp maga na matu ngu ai yaw shada lam hte Federal Munghpawm Hpyen Dap hpe hpaw shabawn ai lam re nga tsun ai.

“Gap hkat jahkring myit hkrum lam lu mat wa jang UNFC hpung shang ni yawng, NCCT hpung shang ni yawng gaw ndai myit hkrum da ai lam hpe yawng gawnhkang sa wa na matu ngang hta hpa-ra tai ya lu ai. Bai nna mungmasa hku bawngban hparan jasan lu mat wa jang anhte ni gaw mungdan hpe Dimokaresi mungdan, maga mi de Federal Munghpawm hkrang hte mungdan hpe mung jet ai munghpawm hkrang zawn hkrang shapraw sa wa ra ai re nga yang… anhte ni hpyen dap hpe mung munghpawm hpyen dap hkrang hku nna maga mi de Dimokaresi ladat hpe hkap la hkan sa ra ai. Lani mi hta munghpawm hpyen dap hpe hpaw shabawn wa ai shaloi hpa-dip hpadaw tai na matu yaw shada lam re nga sanglang dan ai” nga matut tsun ai.

Ndai hkrunlam gaw Asian Hkrumra Hpawng hte wa kapyawn mat nhtawm kasa ni hte mungdan gadaga maram yu ai ni gaw UNFC hte hpawn Amyu Sha Laknak Hpai Rawt Malan Uhpung Uhpawng ni ntsa ningmu yu shut ai ni, mungdan ting madang gap hkat jahkring ga shaka (NCA) hpe aten garawt nga ai ni hku nna ningmu yu shut htang maram nga ai lam ni hpe hparan jasan dan lu ai lam ndau laika hta shaleng da ai.

Mungdan ting madang gap hkat jahkring ga shaka Single Text ntsa bawngban jahkrup sa wa na matu du na November shata htum maga snr December shata praw de kahtap nna hkrum shaga na matu myit hkrum da sai nga Slg. Nai Han Ta tsun ai.

Kasa ni hte mungdan gadaga maram yu ai ni a UNFC hte amyu sha laknak hpai rawt malan uhpung uhpawng ni ntsa n ju n dawng nga ai lam ni, mungdan ting gap hkat jahkring lam a matu aten garawt taw ai ni nga ningmu yu shut htang maram nga ai lam ni hpe mung hparan jasan dan ai lam ndau laika hta shaleng da ai.

UNFC hpe Nai Han Ta hte Dukaba. Hkun Uk Ka ni woi awn nga dingyang mungdan ting gap hkat jahkring lam mai byin na n re lam laika ngau nkau hkan hte hpu nau nkau dinglun tawn ai lam hte seng nna mung sanglang dan mat ai nga Slg. Nai Hkan Ta kawn tsun ai.

Anhte ni gaw baw ja ai n re. Jet ai simsa lam hpe hkrang shapraw wa lu hkra. Maga mi hta Amyu Bawsang ni a hkam la lam, tsap nga jasat jasa ai lam ni hpe brang-brang lang-lang tang madun dan ai ga re. Malawng maga dawdan da ai lam ntsa, conference kawn masat jahkrat da ai masa ntsa hta mung dawn rai nga taw ai hpe mu mada wa hkra mungdan ting gap hkat jahkring na hta mungmasa bawngban lam de mahtang lawan ladan lahkam wa lu na matu ra sharawng ai lam hpe anhte ta tut galaw dan ai lam re nga tsun ai.

UNFC ningbaw ningla ni gaw Yangung Myu e Amyu Sha Hpawngchyawm (UNA) hte 8 mali jawngma hpung ni hte hkrum shaga mat ai hta lai wa sai October 31 ya shaloi Gumsan Magam Slg. Ting Tsing hte hpawn mungmasa pati rap daw dat kasa ni hkrum shaga ai lam hte seng nna sanglang dan mat ai zawn, UNFC maga kawn Ne Pyi Daw hta hkrum shaga bawngban ai lam ni hpe kalang bai bawngban mat nhtawm matut nna shawnglam simsa lam jasat jasa hpe la-kap nna bawngban maram mat wa ai nga Slg. Nai Han Ta kawn tsun ai.

Dai hkrunlam hta e UNFC dat kasa marai 4 hte hpawn Japan asuya a Nippon Foundation kawn lit nga ai ni November praw 9 ya shani kawn 13 ya du hkra manga ya tup Ne Pyi Daw hte Yangung ga de sa du ai re lam chye lu ai.

Posted in: SHIGA