‘Lamu ga madu gaw mungdan re’ ngu ai tara hpe yisun galaw ni ninghkap

Nov-28-2014 asuya a lamu ga madu tara nhprang hpe Myitkyina kaw ya na zawn ninghkap n-gun madun nga yang

Jinghpaw Mungdaw Myitkyina ginwang hta mungshawa ningpawt uhpung uhpawng ni, yisun hkauna masha ni hte hpawn shawa masha marai 150 jan gaw amyu sha lamu ga akyu jashawn hkrang nhprang ntsa sawn maram ai bawngban hpawng galaw nhtawm ninghkap n-gun madun mat ai nga n-gun madun mat ai ni kawn tsun ai.

November 28, bat Manga Ya jahpawt hkying 9:00 kawn 11:30 du hkra Myitkyina ginwang na Mandalay Hpungkyi Jawng kawn Shatapru mahkrai makau du hkra lam hkawm n-gun madun ai lam re nga n-gun madun ai kaw mung lawm Myitkyina ginwang kanoi bungli madu ni hte seng ai Ningbaw Dr. Mawng Mawng Ta kawn tsun ai.

“Mungdan asuya ya shapraw ai amyu sha lamu ga akyu jashawn hkrang nhprang laika buk gaw laika man 90 lawm ai re. Dai hpe mani gaw bawngban hpawng galaw ai. Kadun dawk tsun ga nga yang mungshawa akyu n jaw! ngu nna n-gun madun ai masa re” nga tsun ai.

Jinghpaw Mungdaw kata na Myitkyina, Hpakan, Mu Nyang, Mu Gawng, Danai, Waimaw, Namti zawn re ai ginra ni kawn yisun hkauna masha dat kasa ni hku nna lamu ga akyu jashawn hkrang ntsa ninghkap ai lam laika pa ni lang nhtawm n-gun madun mat ai nga shi kawn tsun ai.

Dai hkrang nhprang gaw mungshawa ni a matu hpa akyu ara n lawm ai hta sha n ga lu tawn ai lamu ga ginra ni hpyi gin lut hpa shara re majaw ninghkap ai lam re nga Jinghpaw mungdaw NDF pati ningbaw yisun hkauna masha ni maga tsap ai Jan. Bawk Ja KNG Jinghpaw Shiga Dap de tsun ai.

“Ndai hkrang nhprang hpe n ra sharawng ai.. ndai hkrang ka ai aten mungshawa ni n chye kau dat ai, yisun hkauna sum machyi mat ai yisun masa ni hpa mung n chye kau dat ai. Mungshawa ni hpa akyu hkam sha lu ai lam n nga ai. Anhte ginra hpe zing la na matu ndai hkrang nhprang kaw mu lu nga ai. Dai majaw tsep kawp n lu hkap la ai” nga tsun ai.

Dai hkrang nhprang kaw lawm ai Myanmar Mungdan na nhprang sut rai yawng a madu gaw mungdan re nga shaleng da ai majaw ganing re lamu ga hpan hta galaw lu galaw sha ahkang lu taw chyalu gadai hpe rai timung mungdan asuya tara shang zing la na ahkang nga ai ngu ai tara daw hpe mung ninghkap ai lam tsun ai.

Lamu ga ni maling mala ni hpe jak shagan hte yu shadawn mat na re majaw lamu ga maling mala ni gaw moi kaw na ji woi ji wa ni madu ai lamu ga ni hkrai re lam tsun mat ai.

N-gun madun ai ni gaw palawng shawng maga de Sara Tsan a sumla hte hpang maga de gaw yisun hkauna masha ahkaw ahkang, yisun hkauna lam shamu shamawt hpung… Jinghpaw Mungdaw… ngu ai gasi ni kap ai palawng hpun nna n-gun madun mat ai re nga Hpakan ginwang na yisun hkauna masha uhpung kawn Slg. La Seng tsun ai.

“Lamu ga zing yisun zing ai hpe anhte n ra sharawng ai. Shadip jahpang daru magam hpe ginjaw jum tek ai ladat n ra sharawng ai ngu ka da ai laika lang ai. Yisun hkauna masha ahkaw ahkang lu na lam ngu ai ni ka da ai. Pyen dau ni sharawt let ginwang kata kalang shinggrup ai” nga tsun ai.

November 27 ya shani Jinghpaw Mungdaw kata na yisun hkauna hte hkai sun lamu ga sum machyi mat ai yisun hkauna masha ni, ginwang shagu kawn yisun hkauna zinghkri hpung ni, mungshawa madung dat uhpung uhpawng ni, mungshawa uhpung uhpung ni kawn dat kasa marai 150 hkawt amyu sha lamu ga akyu jashawn hkrang nhprang ntsa sawn maram jep joi ai zuphpawng hpe Myitkyina ginwang Nawng Nang mare na Hkatawlik nawku jawng gawknu hta galaw nhtawm n-gun madun ai lam ni mung galaw mat ai lam rai nga ai.

Ginjaw jum tek ladat hpe shayawm na nga ai raitim ginwang ginjaw uphkang du, ginwang uphkang du ni gaw ntsa kawn shatsam da ai majaw n lu hkapla ai zawn, ginra chyauman amyu sha ni a ginru ginsa lamu ga akyu jashawn lam ni hpe makawp maga mat na re nga shaleng da ai raitim tara shang shagrin da ai lam hte wanglu wanglang akyu jashawn jai lang jum hpajang na ahkaw ahkang hpe pahkam hkam da ai lam n nga ai lam madi madun ai.

Myen Mungdan lamu ga gam garan akyu jashawn lam komiti ni ka shaleng da ai amyu sha lamu ga akyu jashawn hkrang nhprang hpe ka shaleng mat ai lam daw hte daw hta mungshawa teng sha machyi sum ai yisun hkauna masha, amyu sha bawsang, amyu shayi, mungshawa maga tsap ai myit su salang ni hte arau jawm ka shaleng da ai hkrang n re majaw n lu hkap la ai lam ndau laika hta ka da ai.

Amyu sha bawsang ni a lamu ga madu lu ai lam hte jum hpajang dawdan lu ai ahkang aya hpe hpahkam hkam ya lu ai dawshan ni lawm ai lam n nga ai majaw simsa lam hte amyu sha gahkyin gumdin lam gawgap sa wa ai lam hpe gau nna ten garawt shangun nga ai zawn, hpyen asuya a lakhtak hta zing madu da ai lamu ga hte ya yang byin taw nga ai lamu ga mahkang ni hpe hparan ya lu ai daw shaleng da ai lam n lawm ai lam tsun da ai.

Dai hkrang nhprang hpe mungshawa masha lapran hpyan dan na matu Ne Pyi Daw hte hpawn ginra 17 kaw sha 15 ya laman mungdan ting madang galaw ai lam gaw mungchying mungshawa hte yisun hkauna masha ni a hkamla lam jasat jasa hpe n chye masu su taw ai re nga madi madun da ai.

Mungshawa hte yisun hkauna masha ni, rapdaw dat kasa ni, mungshawa madung dat uhpung uhpawng ni, amyu sha bawsang ningbaw ningla ni, amyu shayi ni, ramma ni, wanglu wanglang re nna myi man n lata ai tara kasa ninghkring ni, shanglawm ging ai myit su ni hte sang sang lang lang hte hkrang nhprang nnan kalang bai ka shaleng na matu ra gadawn nga ai lam shadut dat ai.

Posted in: SHIGA