Jinghpaw Mungdaw Man Maw ginwang Manje ginwang daw kata Wunpawng Mungdan Shanglawt Hpyen Dap (KIA) Dap Ba (3) npu Dap Dung (27) hpyen hpung ni hte asuya dap ni November 16 ya shani ang katut majan byin mat wa ai nga KIA salang langai tsun ai.
Manje ginwang daw KIA Dung (27) ginra Hka Shang, Jan Chyai Hkyet makau asuya Dap Nu Masat (88) npu hpyen hpung ni maden shang wa ai majaw shana daw hkying 12:30 kawn hkying 1:30 ten du hkra hkying hkum mi jan gap achyi hkat ai nga Dap Dung (12) kawn salang langai tsun ai.
“Jan Chyai Hkyet makau kaw gasat hkat ai. Shanhte asuya dap kawn anhte nga ai shara maga de shang bang wa ai majaw byin mat ai, si hkala ai gaw n chye ai. Ya anhte nga ai shara hte deng 3 ram gaw gang ai” nga tsun ai.
Shanglawt ni a Kachinnet.net hta mung asuya Dap Nu (88) npu Magwi daju Hk.M.Y Masat (317) n-gun 80 jan gaw KIA Dap Dung (27) ginra kata gabye shang wa ai majaw ang katut gasat gala lam byin mat ai re nga shaleng da ai.
Lai wa sai October shata laman ya yang majan byin nga ai shara makau Nam Hkam kawn Man Wing maga Gawng Run maga de asuya dap ni dap dung 4 hkawt n-gun jat bang da ai nga tsun ai.
Lai wa sai April shata laman yang Manje ginwang daw kata KIA Dap Dung (12) hte (27) ginra e asuya dap hte majan byin ai majaw hpyen yen tsin-yam masha ni hkying hku hku Miwa ga jarit Mai Ja Yang, Man Maw hte Man Wing maga de hprawng ayai hkawm mat wa sai rai nga ai.
Shingrai KIA Dap Ba (4) npu ginra ni hta mung majan byin ai lam n nga tim hpyen n-gun jan bang nga dingyang re nga Ba (4) npu Dung (9) kawn Dukaba. Zau Seng tsun ai.
“Anhte maga chyawm gaw asuya dap ni n-gun jat bang ai lam nga ai. Anhte na da ai hta dap htawt ai nga tsun ai. Rai timung hpyen hpung ni lung wa ai sha mu ai. Bai kalut mat wa ai gaw n mu ai” nga shi kawn tsun ai.
Lai wa sai October shata laman Munghpawm Simsa Lam Hkrang Shapraw Komiti (UPWC) hte Mungdan Ting Madang Gap Hkat Jahkring Bawngban Jahkrup Hpung (NCCT) ni mungdan ting gap hkat jahkring lam a matu hkrum shaga bawngban na myit hkrum da ai aten raitim KIA hta sha n ga SSPP/SSA, DKBA ni hte asuya dap ni majan nhpan kahtap nna bai byin bang wa ai majaw hkrum shaga bawngban lam hkring nga mat ai.
0 comments:
Post a Comment