Nanghpam tsi mawan dut mari masha marai 7 hpe rim sadi jaw

 Myitkyina shara mi kaw mu lu ai kani nanghpam shalawt gaiwang ndau

Jinghpaw Mungdaw Myitkyina ginwang Kachin Tsu, La Hpa jakli daru mayan shanu nga ai nta ni kawn nanghpam tsi mawan dut mari ai masha marai 7 hpe nawku hpung Nanghpam Tsi Mawan Pat Jasan Hpung kawn November 15 ya shani rim jep nhtawm sadi jaw mat wa sai lam chye lu ai.

Rim hkrum ai ni gaw Slg. Chyaw Tin Ko (ngu ai) Mawng Chyaw 34 ning, Jan Hkyin Chyi 54 ning, Jan. Ah Shwi (ngu ai) Hkawn Shawng 34 ning, Jan. Ah Li 31 ning, Jan. Ja Roi 54 ning, Slg. Min Htai 31 ning hte Slg. Awng Nai Lin 29 ning ni hpe rim ai lam re nga Nanghpam Tsi Mawan Pat Jasan Hpung kawn KNG Jinghpaw Shiga Dap de tsun ai.

Rim da ai ni hpe Jinghpaw Wunpawng Hkalup Hpung (madung) Mai Sak Wang nawku jawng wang hta jep joi ai ten “dut mari ai ni re nga hkam la ai lam” pat jasan hpung Awng Min Ta Roman Hkatawlik Jau Ginwang kawn Sr. Myu Seng Awng KNG Jinghpaw Shiga Dap de tsun ai.

Dai masha ni hpe jahpawt hkying 4:00 ten e rim la ai lam rai nna nanghpam tsi mawan hte seng ai; yama bang ai palin ni, pipe ni, tsi htu samyit ni, hka yawm maisau ni hte ginrawn ai arai ni hpe mu sawk ai lam chye lu ai.

Pat Jasan Hpung ni gaw shingrai La Hpa jakli daru hta nanghpam tsi mawan dut mari lam mying gumhkawng taw nga ai majaw dai zawn nta di di sa rim ai lam re nga chye lu ai.

Shanhte hpe nawku hpung nanghpam tsi mawan pat jasan hpung kawn jep la ngut ai hpang nanghpam tsi mawan bai dut mari jang yawng hpe hkyuk de sa na re lam hte tara masan hte maren je yang dawdan hkum na re lam hkam la ga sadi lata masat htu shangun nhtawm bai dat dat ai nga pat jasan shiga lawk kawn matut tsun ai.

Nanghpam tsi mawan pat jasan hpung gaw rim ahkyak la ai lam ni hpe Man Hkring, Shwi Tset, Shatapru, N’Jang Dung, Mai Sak Wang Jinghpaw Wunpawng Hkalup Hpung, Mai Sak Wang Jinghpaw Wunpawng Hkalup Hpung (madung), Jinghpaw Wunpawng Hkalup Hpung Myitkyina Mare Hpung, Tang Hpre Hkatawlik Jau Ginwang ni hta hpung masha n-gun marai 100 jan hte rim ai lam re hpe chye lu ai.

Myitkyina ginwang hta nanghpam tsi mawan pat jasan komiti rung lakying 80 jan hpaw da nna nawku hpung shagu hta mung pat jasan komiti ni nga nhtawm dai ni gaw nanghpam tsi mawan dut mari mying pru ai shara ni, uhpung kaba ni nga ai shara hkan e mung shada da shiga htinglet hkat let rim ai lam re nga pat jasan komiti Amu Madu Sr. Tang Gun KNG Jinghpaw Shiga Dap de tsun ai.

Ya aten nanghpam tsi mawan shiga gumhkawng nga ai Myitkyina ginwang Shata Pru, Man Hkring, Shwi Tset, N’Jang Dung, Kachin Tsu, Mai Sak Wang, Maw Hpawng, Ake, Loi Hkaw mare ni hte Mali-Nmai Hka Mazup Tang Hpre, Awng Min Ta Tsan Pya mare ni hta matut nna rim ahkyak la ai lam ni galaw nga ai lam chye lu ai.

Makam masham nawku hpung ni pawng nna Nanghpam Tsi Mawan Pat Jasan Hpung hpe 2014 ning kawn hpaw shabawn dat ai lam rai nna komiti rung lakying ni hpaw ninghtan da nhtawm nanghpam tsi mawan dut mari hpaga galaw nga ai Jinghpaw Mungdaw shara shagu hta rim shajang nga ai lam rai mali ai.

Posted in: SHIGA