Mungdaw ni hta shinggyim ahkaw ahkang tawt lai lam ni naw nga nga

Myen hpyendap hte DKBA majan a majaw hprawng yen ai Kayin mare masha ni

Amyu sha bawsang ginra Jinghpaw, Kayin hte Sam Mungdaw kata shinggyim ahkaw ahkang tawt lai lam ni naw nga nga ai masa hpe “Attacks on Peace” ga baw hte Htai Mungdan nga shinggyim ahkaw ahkang shamu shamawt ai ni kawn bawngban hpawng hpe Htai Mungdan Chiang Mai Dakkasu hta November 12 ya shani galaw mat wa sai rai nga ai.

Mungdan gadaga gaw ya yang amyu sha bawsang ginra kata ni hta shinggyim ahkaw ahkang tawt lai lam mabyin masa hpe chye wa lu na matu yaw shada let bawngban hpawng galaw ai lam re nga shinggyim ahkaw ahkang uhpung kawn tsun shaga ahkang lu ai wa; Nan Hkun Lik kawn KNG Jinghpaw Shiga Dap de tsun ai.

“Jinghpaw hte Lahta Sam Mung maga hkan hpyen n-gun jat bang wa ai. Kayin Mungdaw kata hta mung majan bai kahtap byin ai. Shinggyim ahkaw ahkang tawt lai ai lam ni mung byin taw nga ai. Mungdan gadaga a ningmu gaw asuya kawn awngdang ai daram rai sai ngu mu mada ai. Mungdan gadaga gaw ‘sanction’ ni mung nkau dawm kau ai. Asuya shada da mahku mara lam ‘engagement’ ni grau law wa ai. Mungdan gadaga garum ntum lam ni mung Ne Pyi Daw de sa ai ni malawng mat wa ai. Amyu sha bawsang ginra kata ni hta kaja wa byin hkum hkra taw ai lam ni hpe n tsun mat wa masai. Ya ya hpabaw byin taw ai ngu hpe la-kap nna tsun dan ai rai nga ai” nga shi kawn tsun ai.

Shingrai bawngban hpawng hta Chiang Mai Dakkasu kawn Dr. Chayan Vaddhanaphuti, Jinghpaw Wunpawng Amyu Shayi Hpung (KWAT) kawn Shingtau Amu Madu Jessica Nhkrum, Sam Shinggyim Ahkaw Ahkang Uhpung (SHRF) kawn tsun shaga ahkang lu ai Nan Hkun Lik hte Kayin Shingra Makau Grupyin hte Shinggyim Ahkaw Ahkang Shamu Shamawt Zinghkri Hpung (KESAN) a ningbaw Paul Sein Twa hte The School for Shan State Nationalities Youth (SSSNY) a ningbaw Nang Charm Tong ni kawn bawngban ai lam rai nga ai. Asuya hte laknak hpai amyu sha rawt malan hpung ni mungdan ting gap hkat jahkring lam bawngban nga ai raitim asuya maga kawn hpyen n-gun maden jat bang ai lam ni, htim gasat ai lam ni hpe jahkring na matu hpyi shawn mayu ai lam tsun ai.

“Asuya gaw galai shai lam hpe kaja ai hku sha madun na. Rai timung anhte tsang ai gaw kaja wa teng sha ginra buga masha ni hta byin taw ai manghkang ni, majan ni, shara htawt sit ai ni hpe chye hkra anhte ni htawng madun mayu ai. Anhte htawng madun ai ginra kaw e shinggyim ahkaw ahkang tawt lai lam tsep kawp n nga ai ngu mung anhte n lu tsun ai. Malu masha garum ntum lam gaw ya du hkra naw lu taw ai kun. N lu ai kun mung n chye” nga KESAN ningbaw Paul Sein Twa tsun ai.

Dai hpang November praw (7) ya shani Karen River Watch (KRW) kawn shapraw dat ai “Afraid to Go Home” ngu shamying ai ndau shabra laika hpe mung bawngban mat nhtawm ndau laika malawm September shata 26 ya kawn October 17 ya du hkra Kayin Mungdaw Hpa-an hte Hpapun ginwang hte Mun Mungdaw kata asuya uphkang ai BGF jarit sin dap hte Dimokaresi Akyu Jaw Kayin Hpyen Dap (DKBA) ni lapran majan a majaw hpyen hprawng masha ni hpawng yen hkawm ra mat ai sumla hkrung masat masa hpe madun dan ai.

Bawngban hpawng hpe Chiang Mai Dakkasu wang kata ‘Faculty of Social Sciences’ zuphpawng gawknu e November shata shani kaang hkying 1:00 kawn hkying 4:00 du hkra galaw ai hta mungdan kata/shinggan Shi Htawn ni hte Myen mung a masa hkaja ai ni hte rau yawng marai 100 jan sa du ma ai.

Posted in: SHIGA