Jinghpaw nawku hpung ni ka-ni nanghpam pat jasan masing galaw

Jaw Masat Buga Hkalup Hpung nawku jawng shawng kaw sharawt da ai Kani nanghpam pat jasan Pyendau.

Jinghpaw ginra hta ka-ni nanghpam hpyen gasat samyit na masing kata, Jinghpaw Wunpawng Hkalup Hpung Ginjaw (KBC), Jaw Masat Nawku Hpung gaw pyendau ni jun nhtawm August 22 ya shani kawn ka-ni lu sha ai ni hte dut mari hpaga galaw ai ni hpe sadi jaw ai hpaji jaw akyu hpyi lamang galaw hpang wa masai.

Myitkyina a dingdung de Jaw Rap, Jaw Masat Buga Hkalup Hpung hta Maw Tawng mare, Gaw Nan mare hte Hkatawlik nawku hpung ni mung shanglawm nna mare kahtawng shagu hta ka-ni pat jasan komiti rung lakying ni hpaw nhtan da nna nanghpam tsi mawan lu sha jai lang ai ni hpe ta-tut rim ahkyak la mat na re lam chye lu ai.

Nawku hpung kawn hpaw shabawn da ai Jaw Masat Buga Pat Jasan Komiti kawn ka-ni nanghpam dut mari hpaga galaw ai ni hpe sagawn nga dingyang rai nna rim ahkyak la ai lam gaw rai n nga shi ai lam komiti malawm hpung sara langai tsun ai.

Dai hpang Jaw Masat lawu Man Hkring Buga Hkalup Hpung nawku hpung ni kawn mung May shata ka-ang kawn ka-ni nanghpam shalawt gaiwang galaw ai hta lu sha ai ni hte dut mari hpaga galaw ai ni hpe jahpan hta la nhtawm dai ni hpe nawku hpung de shaga la nna sadi jaw ai lamang galaw ai lam chye lu ai.

Dai zawn sadi jaw ai lam ni galaw nga ai raitim matut lu sha jai lang nga dingyang rai nga ai asak 20 ning jan re ramma 2 hte Shwi Zet mare na ramma 2, dai marai 4 hpe Man Hkring Buga Hkalup Hpung Pat Jasan Komiti kawn rim la ai lam komiti malawm Sr. Yaw Sep KNG Jinghpaw Shiga Dap de tsun ai.

“Sara nkau gaw yup jang she jang hkra rai, mare kata nhtoi brat brat kawan hkawm ma ai. Madung gaw phone hte shiga la ai lam galaw nna ka-ni ya ni gara kaw nga ai, gara kaw majaw ai.. e..shanhte majaw ai shara hkan kawan hkawm ai, shana shagu gawan ai”

Ya ten nanghpam tsi mawan hte tsi htu samit ni hte hpawn rim ahkyak la hkrum ai Man Hkring jawng shawng nta kawn marai 2 hte Shwi Zet mare lapran na marai 2 hpe asuya de ap kau sai lam matut tsun wa ai.

Dai ni hpe rim la ngut ai hpang lu sha jai lang ai ni hpe bai lu rim ai lam laga mi n nga ai raitim nanghpam tsi mawan lu sha jai lang ai ni naw nga nga ai lam chye lu ai.

Dai zawn Jinghpaw Mungdaw hta nanghpam tsi mawan hkoi san wa lu hkra Jinghpaw Wunpawng nawku hpung ni kawn pat jasan sa wa ai hta nanghpam tsi mawan lu sha jai lang ai ni hpe rim jep ai lam ni dam lada hkra hkrang shapraw wa ai hta dawn dabang ni mung ra kadawn nga ai lam chye lu ai.

Ka-ni nanghpam chyambra nga ai Jinghpaw Mungdaw hta asuya kawn atsawm pat jasan ahkyak la ai lam n lu galaw ai majaw, nawku hpung ni jawm pawng nna nanghpam tsi mawan shalawt gaiwang hku masat nhtawm ahkyak la hkrang shapraw sa wa ai rai nna Wunpawng Mungdan Shanglawt Hpung (KIO) kawn mung madi shadaw ai nga lam chye lu ai.

Nanghpam tsi mawan pat jasan Pendau hta mung ‘nanghpam tsi mawan hpyen hpe Karai Kasang a chyalai n-gun hte kasat shamyit kau ga, nanghpam tsi mawan hpyen hpe ninggawn mungshawa n-gun hte kasat shamyit kau ga’ ngu ai hpe Jinghpaw laika, Myen laika lahkawng hte ka shaleng da ma ai.

Myen laika hte ka da ai ndau laika nkau hpe seng ang ai buga ginra kata na daru magam manat ai salang ni pat shingdang da ai lam ni hpe mung chye lu ai.

Dai ning April shata laman KIO ginjaw Laiza kaw galaw ai Jinghpaw mungmasa, nawku hpung hte htunghking uhpung uhpawng ni a zuphpawng kaw nna April 25 ya hpe ‘Jinghpaw Wunpawng Ka-ni Nanghpam Pat Jasan Nhtoi’ hku na masat dat ai lam rai nga ai.

Posted in: SHIGA