 |
| Nam Gut na num sha ma hpe roi rip ai Hk.M.Y Masat 567 na hpyenma gaw lashu daju Y.M.Hk na re. |
Lahta Sam Mung Kuthkai myu-ne Namgut kahtawng kawn sak 15 ning re num sha ma langai hpe roi rip ai Myen asuya hpyenma Kawng Bu Bu a manghkang hpe ndai September 19 ya shani hta Muse ginwang tara rung e shawng ningnan lang jep joi ai lam galaw sai.
Muse-Kuthkai lam lapran Namgut kahtawng masha rai nga ai num sha ma langai hpe Myen asuya dap Hk.M.Y Masat 567 dap dung kawn Hpm. Kawng Bu Bu ngu ai wa roi rip ai mahkang hpe Kuthkai byuhka hpyen tara rung kawn jep joi nna htawng dam laning mi jahkrat sai raitim hpyen tara rung kawn mungchying tara rung de bai shalai ap ya na lam, num sha ma a kanu kawa hte Sam Mungdaw htunghking hte laili laika amyu shayi hpung kawn hpyi shawn ai majaw mani Muse ginwang tara rung hta jep joi hpang wa ai lam rai nga ai.
“Daini num kasha hte kanu kawa yan hpe mung langai hpang langai san jep ai. Dai hpawng mare salang hte kamoi hpe mung san jep ai. Tara hkam wa hpe jaw n jaw madat shangun ai. Shi gaw n-gup n pat ai nga ngyeng ai. Laga gaw shi shut sai nga hkamla ai” nga Sam Mungdaw Jinghpaw Htunghking hte Laili Laika Amyu Shayi Hpung a ginrun amu madu (1) Jan. Zadawng Lum Nyoi kawn tsun ai.
Lai wa sai May shata 16 ya shani a manghkang shata 4 jan sai hpe daini shani ka-ang 1:00 kawn hkying 3:00 du hkra Muse ginwang tara agyi Slg. Hkyin Mawng Win kawn rung shawk dinghku masha ni hpe san jep nhtawm du na September 24 ya hta rung bai dung na masat dat ai lam hpe chye lu ai.
Hpm. Kawng Bu Bu hpe Kuthkai hpyen tara rung kawn tara tawt lai shut shai ai manghkang hte htawng dam laning mi jahkrat ngut ai hpang rung shawk ni hpyi shawn ai majaw mungchying tara rung de ap dat ya ai hta tara hkam Hpm. Kawng Bu Bu hpe mara tawt lai tara roi rip lam daw; 376 hte myit n hkrum kanawn mazum lam daw; 363 ni hte tara jawat da ai nga Jan. Zadawng Lum Nyoi tsun ai.
“Ndai manghkang hpe branglang mu mada lu hkra galaw ya rit. Tara upadi hte maren hkrat hkrang hkra, je pat ahkyak la ya rit. Dai rai yang she anhte mung masha ni hte hpyen dap ni myit hkut ai lam lu na re. Dai kawn she shanhte hpyenla hpe jep wa ai. Dap up hpe san yu yang hpyen tara rung kaw gaw laning mi jahkrat sai. Shi gaw mung masha hte manghkang wa byin ai wa re majaw mung shawa jaw ai dam mung hkam ging ai ngu nnan kawn hpyi shawn da ai” nga matut tsun ai.
Lai wa sai May 16 ya shana daw e dai num sha ma gaw nta kawn gat sa mari nna bai wa ai lam shara mi hta tara hkam Kawng Bu Bu gaw nam de rim dun mat nhtawm roi rip hkrum ai majaw hpang shani May 17 ya hta num sha a kanu kawa ni hku nna Sam Mungdaw Jinghpaw Htunghking hte Laili Laika Amyu Shayi Hpung de sa garum hpyi ai hte Kuthkai pyada dap de rung shawk da ai lam rai nga ai.
Shawng daw hta, dai asuya dap kawn dung up wa gaw manghkang hpe gumhpraw jaw nna jasim kau na lam tsun wa ai raitim, kanu kawa ni hku nna htawm hpang de ndai zawn re manghkang n byin hkra Kuthkai ginwang amyu shayi hpung de garum sa hpyi ai re nga num sha ma a kawa Slg. Gam Gam (mying galai) kawn tsun ai.
“Shawng daw asuya dap ni gaw anhte hpyi ai daram jaw na. Jasim lu hkra galaw ga nga tsun ai. Anhte gaw yawng yawng chye nna gaya hkrum nga ai nga yang amyu shayi hpung ni hpe garum hpyi dat ai. Ngai tsun mayu ai gaw ndai mabyin zawn n byin wa na matu galaw ai re” nga Slg. Gam Gam tsun ai.
Mani tara rung kaw manghkang lam hpe tara agyi kawn jep joi hkam ngut nhtawm num kasha ma wa gaw hkam kaja lam nga taw ai raitim myit masa ahtu hkra ai lam nga ai majaw hkrit kajawng nga ai nga kawa rai nga ai Slg. Gam Gam tsun ai.
“Ma gaw hkam kaja ai. Myit masa ningma nga taw ai. Shawoi na hte n bung ai. Daini tara hkam hpyenla hpe mu ai majaw grau hkrit mat sam ai” nga tsun ai. Asuya hpyen dap kawn tara upadi hte maren ahkyak la ya na matu hpyi shawn ai lam gaw htawm de amyu shayi ni a ntsa roi rip ai manghkang n byin na matu galaw ai lam re nga tsun ai.
Dai hte maren tara hkam Hpm. Kawng Bu Bu gaw mung masha hpe shut shai ai re majaw mungchying tara upadi hte maren dam jaw ging ai wa re nga tsun ai a marang shanhte hku na galaw sa wa ai lam re nga Jan. Zadawng Lum Nyoi tsun ai.
“Ndai manghkang gaw n ju n dawng ai myit hte galaw ai n re. Ahkyak ai gaw mare hkan nga nga ai amyu shayi ni shim lam nga wa hkra, htawm hpang de amyu shayi ni shim lam lu wa hkra ngu shakut nga ai rai re. N ju ai myit gaw n rawng ai. Anhte amyu shayi ni hpe makawp lu wa hkra galaw ai lam re” nga matut tsun ai.
Num sha ni ntsa roi rip hkrum ai lam hte seng nna asuya hpyen dap gaw mungchying tara rung de ap ya ai lam gaw shawng nnan lang re lam hpe mung chye lu ai.
0 comments:
Post a Comment