Asuya hte n jahta shi yang NCCT kata hpawng

NCCT ningbaw Slg. Nai Han Ta

Mungdan ting shadang gap hkat jahkring lam bawngban ai lam ni hpe kalang bai sawn maram na matu Mungdan Ting Madang Gap Hkat Jahkring Bawngban Jahkrup Hpung (NCCT) a tauhkrau bawngban hpawng hpe daini September praw 9 ya shani Htai-Myen ga jarit shara mi hta galaw hpang nga masai.

13 lang ngu na NCCT a bangban hpawng hta lai wa sai August 15-17 ya shani ni na Munghpawm Simsa Lam Hkrang Shapraw Komiti (UPWC) hte NCCT ni a mungdan ting gap hkat jahkring myit hkrum lam bawngban hpawng a ntsa kalang bai sawn maram ai lam re nga NCCT a Ningbaw Slg. Nai Han Ta kawn tsun ai.

“Lai wa sai bawngban hpawng a hkrang ni hpe bai maram yu ai. Hkrang nhprang 2 a ntsa rai loi li n manu ai lam ni hpe masing hta gara hku lawm ai kun ngu ai lam ni. N sanglang ai dawdan lam ni, code of conduct hte hpyen hte seng ai masa lam ni hpe jahkrup ai” nga tsun ai.

Bawngban hpawng hta hpyendap hte seng ai masa, Ginrun Yu Reng Komiti (Joint Monitoring Committee) hte arawn alai tara (code of conduct) ni hte seng ai bawngban nhtawm shawnglam magam bungli yi-ngam ni hpe masat jahkrat mat na re lam chye lu ai.

“Bawngban hpawng hta, hkrang nhprang 2 ntsa n manu ai lam ni hpe masing hta maga mi hte maga mi loi li shai hkat ai lam ni gaw nga ai. Dai hpe jahkrup taw ai. Du na hkrum shaga bawngban hpawng hta code of conduct hte Joint Monitoring hpe gara hku bawngban sa wa na ngu ai lam ni jahkrup ai” nga Nai Han Ta kawn tsun ai.

NCCT gaw mungdan ting shadang gap hkat jahkring myit hkrum lam lu la na matu matut hkrang shapraw sa wa ai lam rai nna dap hte seng ai lam, ginrun yu reng komiti hpaw shabawn na lam hte arawn alai tara ni hte seng nna bawngban jahkrup taw ai nga NCCT Ningtau Ningbaw Badu Koi Htu Win tsun ai.

Hpung shang rai nga ai Karenni Amyu Sha Rawt Jat Pati (KNPP) kawn Amu Madu (2) Slg. Shwi Myu Tan shara hta ginjaw komiti malawm Slg. Hku Taw Ye hpe bai galai bang bungli shatsam ai lam NCCT zuphpung hpang ai shani masat shagrin dat ai hpe mung chye lu ai.

NCCT hte UPWC ni bawngban na matu naw ngam ai gap hkat jahkring ai hpang daw na pran-wan ladaw hta dap shara jahkrat ai masa, kalang bai gap hkat ai lam n nga hkra arawn alai tarawng tara ni hte ginrun yu reng komiti hpaw shabawn ai lam ni re lam chye lu ai.

“Dai pran-wan ladaw hta majan n byin hkra gara hku gawn hkang da na, dap shara jahkrat ai lam hte code of conduct gara hku nga ra ai. Pran-wan ladaw hta gawn hkang lu na matu re” nga Nai Han Ta kawn tsun ai.

Asuya maga, du na September 22, 23, 24 ya shani ni Yangung mare kaba hta hkrum shaga na matu ga shawn da ai lam ntsa NCCT kawn nhtoi hpe hkrak dawdan masat lu ai lam rai n nga ai nga matut tsun ai.

NCCT zuphpawng hpe du na September 11 ya shani du hkra masum ya tup hpawng mat na rai nna mungdan ting madang gap hkat jahkring hkrang nhprang 3 a ntsa kalang bai sawn maram shagrin mat na re lam chye lu ai.

Lai wa sai 2013 ning November praw 2 ya shani kawn amyu sha laknak hpai rawt malan hpung 16 hte hpaw shabawn da ai NCCT hpe hpaw shabawn hpang wa nhtawm asuya hte mungdan ting madang gap hkat jahkring hkrang nhprang 2 ntsa bawngban jahkrup nga ai rai nga ai.

Posted in: SHIGA