Nawku hpung ni woi awn nna Jinghpaw ginra hta kani nanghpam hpyen ninghkap

Sept 27-2014 ya shani kani nanghpam wan nat jahten lamang galaw nga yang, Hu Hpyet Pa, Dap Dung 9 ginra, Lahta Sam mung

Jinghpaw mungdaw Hpakan ginwang Sikmu kahtawng kawn buga masha ni kani nanghpam pat jasan lam n-gun madun ai lamang hpe September 29 daini bat Langai Ya shani galaw ai lam n-gun madun ai ni kawn
chye lu ai.

Dai hpawt daw hkying 8:00 kawn 12:00 du hkra Hkristan nawku hpung shagu hte Jinghpaw laili laika hte htunghking hpung ni woi awn nna Sikmu ginwang daw kata na Gwihka mare kawn Maga Pa, Sap Pya Chyawng, Maw Kalung, Jam Ga mare du hkra deng 12 ram lam hkawm n-gun madun ai lam rai nga ai.

“Anhte kani nanghpam ninghkap na matu n-gun madun ai re. Anhte Gwi Hka ginra kaw nanghpam lu sha dut mari ai ni grai law wa ai majaw hpyen madung hku masat nna gasat ai rai nga ai” nga n-gun madun ai lam hta shanglawm ai Salang Brang Mai kawn tsun ai.

“Kani nanghpam hpyen hpe mung shawa n-gun hte gasat shamyit kau ga” ngu ka shakap da ai ndau laika ni lang let modaw 15 hte sengke 60 daram hta hkan nang ai masha ni hte hpawn lam hkawm n-gun madun ai ni yawng marai 600 jan re nga matut tsun ai.

Daini na n-gun madun lamang hta asuya kawn pat shingdang ai lam n nga ai hta sha n ga, n-gun madun hkawm ai lam mayan yu reng gawnhkang ya ai nga tsun ai. September 27 ya hta Gwi Hka hte Jam Ga hta pat jasan pyendau ni jung da nna ya yang Sap Pya Chyawng, Hkalup Hkristan Nawku Hpung ni kawn nanghpam tsi mawan lu sha ai marai 16 hpe dawn dabang de sa dat sai lam chye lu ai.

Dai hte maren, daini September 29 ya shani hta mung Hpakan, Seng Tawng, Lawng Hkang, Ta Mahkan, Lung Hka hte Kamai ginra ni hta nanghpam tsi mawan pat jasan lam n-gun madun lamang galaw ai nga chye lu ai.

“Karai jaw ai atsam hte gasat shamyit kau ga, Mung shawa ni yawng shanglawm saga” ngu ai ga yan kap ai Vinyl pyendau hpe Kamai mare ka-ang hta September 29 ya shani jung tawn nna hpaji jaw hkaw tsun ai lam ni galaw ai nga Kamai pat jasan komiti a hpaji jaw salang mung rai, hkalup hpung na Hpung Up Sara Seng Awng kawn tsun ai.

“Yawng mu lu ai shara kaw pyendau kaba 2 jung dat sai. Dai hpang anhte ni hte mare kanu kawa ni uhpung garan nna nta shagu hpaji jaw hkaw tsun ai lam galaw ai.”

Asuya maga kawn pat shingdang ai lam n nga ai rai tim pat jasan komiti hpe kadai woi awn nna kaning re masing ni galaw hkyen ai ngu hpe san ai lam ni gaw nga ai nga tsun ai.

Pat jasan komiti malawm ni hte mare kanu kawa ni pawng nna Kamai, Kawng Ra, Htoi San Yang mare ni hta nta langai hpang langai nanghpam tsi mawan hpaji jaw hkaw tsun ai lam ni galaw hkawm ai nga Rev. Seng Awng kawn tsun ai.

Ya yang, Kamai mare kawn nanghpam tsi mawan lu sha ai marai 20 jan hpe Myitkyina ginwang Awng Min Ta Tsan Pya htawt sit dabang kawn Hkatawlik nawku hpung ni a dawn dabang hta sa da nhtawm tsi mawan dawn jasan nga ai lam tsun ai.

2014 ning April shata kawn Wunpawng Mungdan Shanglawt Hpung KIO hte mung shawa ni pawng nna kani nanghpam hpyen ninghkap hpaji jaw hkaw tsun lamang ni galaw na matu dawdan sa wa ai lam rai nga ai.

Lahta Sam Mung KIO Dap Ba 4 npu, Dung 9 ginra Kuthkai ginwang Hu Pyet mare makau kahtawng 40 jan kawn mung masha ni hpe shaga la nhtawm rim da ai kani hpraw kilu 26, kani chyang joi 13 hte ya-ma hkyep Mun 6 jan (ya yang na manu kyat Sen 2,000 jan) nat jahten ai lamang hpe September 27 ya shani galaw ai re nga KIO pat jasan lit nga ai salang langai tsun ai.

“Anhte kani nanghpam dut mari ai ni kawn lu rim ai nanghpam tsi mawan ni hpe mare masha ni hpe shaga la nna shawa man hta nat jahten ga ai. Asuya maga na nanghpam tsi mawan pat jasan lam hpe shingdu shayawn da ai. Dai majaw KIO kawn mai byin ai hku pat jasan nga ai ngu hpe chye shangun mayu ai nna galaw ai rai nga ai” nga tsun ai.

Myen mungdan gaw Mungkan hta nambat lahkawng kani hkai dik ai mungdan rai nna mungdan ting hta kani hkai dik tsa lam shadang 90 gaw Sam Mungdaw hta e re nga Mungkan Wunpawng Hpung UNODC a sumtang ni hta shaleng da ai.

Posted in: SHIGA