 |
| Sept, 3 shiga dap sanglang hpawng hta UNFC Ningtau Ningbaw Slg. Nai Han Ta |
Myen mung amyu sha demokresi daphpawm MNDAA Kukang hpung hpe Amyu Sha Hpyen Masa Mungmasa Daphpawm UNFC a tara shang hpung shang uhpung hku masat jahkrat dat sai hte maren lawnglam 6 hpe mung masat jahkrat da sai nga UNFC ningbaw ni tsun ai.
Htai mungdan Chiang Mai mare kaw galaw ai shawg nnan lang na UNFC hkrumra hpawng hpe August 25 ya kawn September praw 2 ya du hkra sanit ya tup galaw ai hpang, daini September praw 3 ya shani shiga dap sanglang hpawng galaw ai lam rai nga ai.
Masun ning jan ladaw hta shamu shamawt ai sumtang ni hpe dinglun nna shagrin ai lam, malawm hku hkap la da ai MNDAA hpe tara shang uhpung hku hkap la dat ai lam, NCCT hku nna mungdan ting madang gap hkat jahkring lam hpe matut galaw na lam, KNU kawn daphpawm kawn hkringhkra le sai lam hkrumra hpawng de tang shawn wa ai laika ntsa UNFC kawn tara shang laika bai htang na lam hte hpawn lawnglam 6 hpe dawdan ai da ai lam rai malu ai.
“Hkrumra hpawng hta mungdan ting gap hkat jahkring hte seng ai hpe lakmat htu n htu hte seng nna bawngban ai. Rai timung tuphkrak dawdan ai lam rai n jahkrat ai. Mungmasa hku nga yang UNFC langai hkrai sa na lam gaw n nga ai. Raitim ntsa lam yaw shada ai lam hta masum brum bawnban ai masa maga de shayawn taw ai” nga UNFC Amu Madu Slg. Hku U Ye kawn tsun ai.
Raitim, UNFC hpung shang na shawk shawn da ai, Myen mung ting hte seng ai jawng ma dap ABSDF hpe hkap la ai lam rai n nga ai.
Dai hpang KNU hku na ginjaw komiti hte jahkrup let daphpawm de bai hkyawm wa na matu myit mada nga ai lam hte Jan. Awng San Tsu Chyi a hkumra hpawng de shagun dat ai num htet ga hpe masat masa galaw da ai lam matut tsun ai.
“Shanhte ginjaw komiti zuphpawng ngut yang UNFC hpung shang hku nna bai shang wa lu hkra anhte galoi mung hkap tau la ga ai. Dai hku mung galaw na re ngu myit mada ai lam hpe dawdan sa wa ai lam ni nga ai” nga Hku U Ye kawn tsun ai.
UNFC gaw Federal Munghpawm gawgap sa wa na lamyan hta shakut mat na, kahkyin gumdin lam hpe ngang kang wa lu hkra ga shaka tawn nna hpung shang uhpawng ni yawng shanglawm wa lu hkra alak mi galaw nga ai zawn, hpung shang ai ni hte ginrawn ai uhpung uhpawng ni hte mung grau nna ta gindun sa wa mai ai shawnglam magam bungli ni hpe masat jahkrat da sai nga September praw 2 ya shani na ndau hta shaleng da ai.
Mungdan ting shadang gap hkat jahkring bawngban jahkrup hpung NCCT gaw UNFC kaw shang lawm ai uhpung uhpawng hte seng ang ai uhpung uhpawng ni sha hpaw shabawn da ai bungli uhpung rai nna UNFC a masat jahkrat da ai masa lamyan hte maren, mungdan ting madang gap hkat jahkring ga saka NCA byin tai lu na matu matut nna hkrang shapraw sa wa nga ai lam, dawdan ma ai.
Shawng nnan galaw ai hkrumra hpawng hta asuya hte amuyu sha laknak hpai rawt malan hpung ni lapran ya yang jahkrup nga ai lam hpe madung bawngban dawdan ai lam ni hta myit hkrum mangrum hte masat jahkrat da lu sai nga UNFC ningtau ningbaw (1) Slg. Nai Han Ta tsun ai.
“Anhte mungdan hte seng ai mungdan gadaga a masa hpe maram yu ai. De ntsa mahku mara nhtawm shawnglam magam bungli ni masat jahkrat ai shaloi tengman ai hku rai wa hkra, daphpawm hte seng ai hpe dinglik yu ai. Madung gaw amyu sha rawt malan hpung ni hte asuya lapran bawngban nga ai lamyan ni hpe la-kap nna tang madun bawngban ga ai. Du na ten na magam bungli yi-ngam ni hta grau nna mangan nga wa na re ngu mu mada ai” nga tsun ai.
UNFC hpe 2011 ning February shata hta hpaw hpang ai re. Shawng nnan lang ngu na amyu sha rawt malan hpung ni a hkrumra hpawng hta; Wunpawng Mundan Shanglawt Hpung (KIO), Karen Amyu Sha Uhpung Uhpawng (KNU), Hkang Amyu Sha Hpyen Dap (CNF), Karinni Amyu Sha Rawt Jat Pati (KNPP), Mun Mungdan Nnan Pati (MNSP) Sam Mung Rawt Jat Pati (SSPP/SSA), Pa-u Amyu Shalawt Hpung (PNLO), Lah Hu Democratic Uhpung (LDU), Balawng (Ta-awng) Amyu Shalawt Hpung (PSLF/TNLA), Wa Amyu Sha Uhpung Uhpawng (WNO) ni hte Myen mung Amyu Sha Dap Hpawm (MNDAA) Kukang hpung ni sa du ma ai.
Matut manoi ai uhpung ni rai nga ai Myen Mung Ting Hte Seng Ai Jawng Ma Dap (ABSDF), Democracy Akyu Jaw Kayin Hpyen Dap (DKBA), Rahkai Mung Shalawt Pati (ALP), Rahkai Hpyen Dap (AA) hte Kayin Simsa Lam Kongsi (KNU-KNLA-PC) kawn dat kasa ni mung sa du ma ai.
Dai sanit ya galaw ai hkrumra hpawng hta dat kasa marai 90 sa du bawngban lawm nna August 29 hte 30 ya laman Myen mungdan kata na mungmasa democracy uhpung uhpawng ni hte hkrum shaga nhtawm mungdan kata mungmasa uhpung uhpawng ni hte lata gindun let hkrang shapraw sa wa na lam dawdan da ma ai.
0 comments:
Post a Comment