Asuya woi awn galaw na Manau poi hpe Jinghpaw ramma komiti ninghkap

KIO hte mung masa nhtan shai wa ai kaw na '62' lang na Mungdaw Nhtoi Manau Poi hpe Myen asuya woi awn ai hku galaw wa sai re.

Jinghpaw Mungdaw asuya kawn woi awn galaw na rai nga ai Jinghpaw Mungdaw Nhtoi masat dingsat Manau poi kaba hpe Jinghpaw Wunpawng Htunghking hte Laili Laika Hpung Ginjaw, Ramma Komiti kawn ninghkap kau dat ai lam chye lu ai.

Jinghpaw Mungdaw hta 2011 June shta praw 9 ya shani kawn asuya hte Wunpawng Mungdan Shanglawt Hpung (KIO) lapran majan byin hpang ai rai nna ya du hkra mung matut manoi naw kasat gala nga nhtawm, hpyen yen masha Sen 2 hkawt tsin-yam hkrum sha nga ten Manau poi kaba galaw na matu n mai byin ai lam Ramma Komiti ningbaw Sara Gum Ja Naw KNG Jinghpaw Shiga Dap de tsun ai.

“Simsa lam bawngban ai mung rai n ngut shi ai.. majan nhpan mung rai n dawm ai sha lahkawng maga naw shachyen hkat nga ai ten, nkau mi gaw maga mi de ya na zawn poi lamang kaba galaw na gaw n manu ai.. ahtu hkra wa chye ai” nga tsun ai.

Du na 2015, January 10 ya shani wa ang ai ‘67’ lang ngu na Jinghpaw Mungdaw Nhtoi hta mung jinghpaw mungdaw asuya kawn tara shang woi awn galaw na matu hkyen lajang nga ai lam rai nna poi lamang hpe January praw 5 kawn 11 ya du hkra sanit ya tup galaw mat na re lam asuya uhpung maga kawn chye lu ai.

Dai Manau poi kaba shabyin shatai komiti malawm ni gaw asuya kawn hpaw shabawn ya ai lai sai ‘63’ lang na Manau poi shabyin shatai komiti malawm ni sha rai nna Ningbaw gaw Slg. Lahkri La Awng re lam chye lu ai.

Raitim, Ne Pyi Daw asuya kawn Jinghpaw Mungdaw Nhtoi Manau poi lamang kaba byin tai wa lu hkra ganing re ai daw hkan shanglawm mat na hpe gaw rai n chye lu ai.

Htunghking hte Laili Laika Hpung Ginjaw Komiti a ningmu gaw 2015 ning January shata hta galaw na Manau poi kaba kaw hkrat ang ai kyat sen hkying 6, 7 hpe hpyen yen ni hpe garum yang grau kaja ai lam tsun wa ai.

Jinghpaw Mung mungshawa ni a nsen hte ya yang byin nga ai mung masa, sut masa, hpyen masa yawng hpe maram yu nhtawm du na shaning Jinghpaw Mungdaw Nhtoi Manau poi galaw na hpe ninghkap ai lam Jinghpaw Wunpawng Htunghking hte Laili Laika Hpung Ginjaw kawn tsun wa ai.

Myitkyina daju Jinghpaw Wunpawng Htunghking hte Laili Laika Hpung Ginjaw hpe 1997 ning May shata kawn hpaw hpang wa ai rai nna Jinghpaw Mungdaw Nhtoi Manau poi galaw shagu woi awn ai daw hta shanglawm wa sai lam chye lu ai.

Posted in: SHIGA