Jinghpaw Mungdaw sinna daw Kamai myu-ne garan Wunpawng Mungdan Shanglawt Hpung (KIO) Gau Ri Ninghtawn Ningtau Uphkang Du Maran La Hkawng hte rung ma 2 hpe Kamai byuha asuya dap kawn rim mat ai lam chye lu ai.
Kamai ginwang, Gau Ri Ninghtawn N/T Uphkang Du. Maran La Hkawng, Mangshang Ying Bawm hte Naw Seng ni hpe September 20 ya shani Kamai, Htoi San Yang nta langai kaw wang rim nna Kamai byuha kawng hpyendap de rim majaw mat ai re nga Kamai ginra na mying n tsun mayu ai wa tsun ai.
“Shan lahkawng kaw laga arai hpa gaw n lawm ai da. Anhte Kamai kaw gaw hkangshan hkwi sha ai ni nga ai. Dai hkangshan hkwi ni kawn akawk hta nga ten rim la ai re nga na ai. Salang wa kaw gaw kyat mun mi jan ram lawm ai nga na lu ai.”
Asuya Dapnu Masat 66 n-pu Hk.L.Y – 11 kawn Dukaba G3 Tan Tsin Awng, Ts.Y.Hp kawn Awng Hkai Hpyu hte hpang lam na Chyaw Tsawa Awng shanhte yawng 11 gaw hpyen hkying hte hkak sinat kalang kapaw nna wang rim la ai re lam KIA salang langai Jinghpaw Shiga Dap de shateng tsun wa ai.
Gau Ri Ninghtawn gaw Wunpawng Mundan Shanglawt Hpyen Dap (KIA) Dap Dung 6 Kung 1 ginra rai nna dai ni hpe hpa mara hte rim kau ai hpe atsawm n chye lu ai lam, buga masha ni gaw hkangshan hkwi ai ni kawn ahkun hkanse hta ai majaw re nga sha shadu ai lam chye lu ai.
Dai rim hkrum ai lam hte seng nna Simsa Lam Akyu Galaw Hpung (PCG) kawn Slg. Lamai Gum Ja hpe san yu yang “asuya dap kawn KIO N/T Uphkang Du hpe rim la ai sha na ai lam, hpa majaw rim ai lam hpe n chye shi ai lam, naw gyit da ai lam” Jinghpaw Shiga Dap de tsun ai.
KIO gaw Jinghpaw mungdaw kata ahkun hkanse hta ai lam gaw tara shang re lam, asuya maga lam amyu myu hte rim hkrum mat ai shanglawt magam gun ni hpe dat ya na matu jahkrup ai lam galaw yu tim, n mai byin ai lam KIO Manghkang Hparan Masit Komiti malawm Dkb. Nhpang Naw Bu tsun ai.
“Rim hkrum ai KIO magam gun manghkang, bai dat ya na matu anhte zuphpawng kaw mung tsun yu sai. Rai timung shanhte maga kawn manghkang galai kau ai nga yang KIO magam gun hpe rim ai n re sha nanghpam tsi mawan manghkang law.. hpa law nga nna n dat ya ai.”
Ndai rim la ai lam gaw asuya dap Kamai byuha a matsun hte rim ai re lam, hte ya ten laga shanglawt magam gun nkau mung hprawng yen hkawm nga ai lam chye lu ai.
Maga mi de mungdan ting gap hkat jahkring lam a matu Munghpawm Simsa Lam Hkrang Shapraw Komiti (UPWC) hte Mungdan Ting Madang Gap Hkat Jahkring Bawngban Jahkrup Hpung (NCCT) ni 6 lang ngu na bawngban hpawng galaw nga ten dai zawn shanglawt magam gun ni hpe rim la ai manghkang byin wa ai lam mung rai nga ai.
0 comments:
Post a Comment