Asia World kawn hkoize jak-rung kaba Awng Min Ta mare hta hpaw tawn

Myitkyina a dingdung maga deng 20 jan Awng Min Ta htawt sit dabang

Jinghpaw Mungdaw, Mali-N’Mai Zup madim gawgap masing a marang htawt sit shara jahkrat tawn ai Awng Min Ta (Tsan Pya) mare hta Asia World Company wang kata August 27 ya shani kawa hte galaw ai hkoize jak-rung hpaw akyu hpyi hpawng galaw ma ai.

Dai company kawn gawgap da ai hkoize jak-rung kaba hpaw akyu hpyi hpawng hta jak-rung nnan gawgap wa ai ten kawn mare masha ni hte lata gindun let jawm galaw gun hpai sa wa lu hkra, jak-rung kawn lit la sa wa na magam bungli yi-ngam shagu hta grau nna rawt jat wa lu hkra, bungli ntsa dingbai dingna n nga na matu ngu ai lam ni lawm malu ai.

Dai akyu hpyi lamang hta CPI Company a akyu hpyi ra ai lam ni hpe Hkatawlik Jau. Ulaw Naw Awng kawn woi awn nna akyu hpyi ya ai lam dai hpawng sa du lawm ai Sara ni kawn chye lu ai.

Ya na zawn dai Asia World Company gaw hkoize jak-rung hpaw hpawng akyu pyi lamang galaw wa sai raitim jak-rung hte seng nna arung arai lakung lakap langai mi mung rai n mu lu ai lam mare buga kawn Sara langai tsun ai.

“Dai shani hkoize jak-rung hpaw hpawng nga.. anhte hpe shaga nna akyu hpyi ai lamang woi galaw ma ai. Rai timung, dai jak rai n du ai majaw kaji kun? kaba ai kun? hkrak n chye lu ai. Galoi du na re mung n chye ai, kawa sumbum da ai mung n mu ai. Hpa mung rai n chye shi ai” nga tsun ai.

Ya na zawn dai hkoize jak-rung hta buga masha ni hte lata gindun let galaw na matu tsun nga ai raitim maga mi de shingra maka hte dusat du-myeng ni a matu tsang hpa tai wa chye ai lam Kachin Development Networking Group (KDNG) kawn Slg. Tsa Ji ya na zawn maram tsun ai.

“Shawng nnan dai ginra na shingra maka htenza mat nna, Kahtawng masha ni prat tup akyu jashawn nga ai kawa ni krin mat na. Lahkawng ngu na hta jak-rung kaw gung hte seng ai tsi hpan ni lang wa na re majaw kabai kau sai maza kaw ana lawm wa na. Dai majaw shingra maka hte dusat du-myeng ni hta hkrit tsang hpa tai wa na. Aten galu jak-rung kri wa jang kawa ni yawng krin mat na re” nga tsun ai.

Hkoize jak-rung gawgap wa ai lam a ntsa akyu kade ram jaw, n jaw ngu ai hpe rai n chye ai raitim, jauman buga masha ni chyawm gaw myit lawm nga ai zawn myit tsang ai ni mung nga shajang ai lam chye lu ai.

Ya ten, Mali Zup madim masing a majaw htawt sit shara jahkrat hkrum ai Awng Min Ta mare masha ni gaw bungli bungsi taw nna tinang ginra hte ni-nawng ai yi sun hkauna hkan nchyang chyang sha nna yak yak hkak hkak hte tam sha taw nga ai ten mung rai nga ai.

Jinghpaw Mungdaw hta hkoize hpe poi shingra hkan law malawng akyu jashawn nga ai zawn Miwa de na shapraw ai hkoize hpe law malawng jai lang nga ai ten, Awng Min Ta mare hta ya na zawn Asia World kawn jak-rung hpaw wa ai lam mung rai nga ai.

Dai lamang hpe Mali Zup madim hte seng ai CPI, THPI, Asia World kawn dat kasa ni sa du nna Awng Min Ta htawt sit mare masha marai 200 jan hte galaw ai lam rai malu ai.

Posted in: SHIGA