Kachin Democratic Party hpat wat ra lata poi ginra 3 hta shing jawng na

KDP pati a Mungshawa Gannawn Mazup Rung, Jinghpaw mungdaw mare daju Myitkyina

Myitkyina - Kachin Democratic Party (KDP) gaw 2014 ning du na October shata hpat wat ra lata poi hta ginra 3 hta shing jawng mat na re lam chye lu ai.

KDP pati kawn mungdaw rapdaw Wai Maw ginwang, mungshawa rapdaw Man Maw, Mu Gawng hte Hpakan ginra ni hta shang shing jawng mat na matu hkyen lajang nga ai lam KDP Ningbaw Duwa Gumgrawng Awng Hkam KNG Jinghpaw Shiga Dap de tsun ai.

“Amyu sha dap hpawm ni hte arau mungdan ting hte seng ai mungmasa bawngban hpawng ni hta mung shanglawm mat na re. Bai nna, madu gam maka madu hpajang mai ai, madu uphkang ahkang aya lu ai mungdan byin wa hkra jet ai Federal munghpawm byin wa hkra jawm shakut mat na re. Jet ai Federal munghpawm n byin wa yang tinang a ginra hta gara hku mung simsa lam lu wa na n re. Dai majaw tara rap ra ai ahkaw ahkang lu hkra mungshawa ni hte lata gindun let arau jawm shakut sa wa na re”

KDP pati a masa gaw rapra ai madu uphkang ahkang aya nga ai Federal mungdan gawgap na lam hpe madung dat nhtawm hkrang shala mat na rai nna dai hta hkam ja lam, hpaji hparat lam, hpaga yumga lam hte alak mi polisi mung nga ai lam chye lu ai.

September praw 1 bat langai ya shani mung Jinghpaw Mungdaw Myitkyina Myu KDP pati a mungshawa ganawn mazum rung pyendau jun ai lamang hpe Myitkyina-Sumprabum Lam, Dap Kawng (Htoi San) lam numshe kaw masat 221 nta wa hta galaw ma ai.

Matut nna KDP rung hpe Jinghpaw Mungdaw shara shagu hta mung hpaw sa mat na re lam chye lu ai.

KDP dawng hkawn na tsit ai nsam gaw Jinghpaw mung hta pru ai manu dan ai lungseng hpe shala tawn ai rai nna, maw ai nsam gaw simsa lam hpe hkrang shala nhtawm hkyeng nsam ai gaw Jinghpaw amyu sha ni htoi kabrim ai shara (Jan Ga) na yu hkrat wa ai re nga lachyum shaleng da ai lam chye lu ai.

Du na November shata galaw na hpat wat ra lata poi gaw lai wa sai ten majan a majaw rai n lu galaw ai ginra hta galaw mat na rai nna Wai Maw myu-ne hta mungdaw rapdaw salang ni n nga ai majaw ngam nga ai Man Maw, Mu Gawng hte Hpakan mungdaw rapdaw salang shara kaw matut nna hpat wat ra lata poi galaw na re lam chye lu ai.

Laksan n galaw lu ai ginra ni gaw Sumprabum myu-ne kawn mungdaw rapdaw hte N’Jang Yang myu-ne kawn mungdaw rapdaw ni re lam chye lu ai.

KDP pati kawn yawm dik ginra 3 hta shang shing jawng mat na rai nna asuya komishin kawn tara shang shadum da ai lam rai n nga ai lam chye lu ai.

Kachin Democratic Party hpe Myitkyina, Wai Maw hte Hpakan ginra hkan law malawng madi shadaw da ai lam chye lu ai.

Ya ten KDP pati kawn asuya komishin de pati shang masha jahpan marai 1,000 mara da sai rai nna pati rung ni hpe hpaw ngut ai hpang she pati shang masha jahpan kalang bai hta shinggyin mat na re lam chye lu ai.

Posted in: SHIGA