Yuzana htawt sit dabang salang wa hpe ntsa matsun hte akajawng bungli hkring shangun

Jinghpaw Mungdaw, Danai myu-ne Hugawng Pa ginra hta Yuzana Company a majaw htawt sit shara jahkrat hkum ai shara Tsan Pya mare kawn mare salang Slg. Ah Hpu Dui hpe akajawng sha, Hpakan myu-ne Ningtau Uphkang Du a matsun hte mare salang lit kawn hkring na matu matsun wa ai lam chye lu ai.

N/T Uphkang Du Slg. Chyaw Myin gaw Slg. Ah Hpu Dui hpe September 16 ya shani Shahtu Zup rung de jahpawt hkying 8:00 hta dinghkrai shaga la nna Tsan Pya mare salang lit kawn jahkring kau sai lam tsun wa ai rai nna, hpa majaw dai zawn hkring shangun ai hpe n chye na ai lam mare salang Slg. Ah Hpu Dui kawn tsun ai.

“Jinghpaw Mungdaw Hkringmang Daju a matsun hte mare salang lit kawn jahkring kau sai. Daini mare kanu kawa ni mung yawng hkum ai, dai majaw ndai kaw nan mare salang lata na nga tsun wa ai. Nang mung shingjawng ahkang gaw lu ai nga tsun ai. Hpa mara nga nna jahkring kau ai kun..madi madun na gaw nga ai kun. Mare kawn shawk ai lam mung n nga ai, ngai hpe shana wa ai lam mung n nga ai” nga tsun ai.

Shahtu Zup mare uphkang rung de Tsan Pya mare salang Slg. Ah Hpu Dui hte mare masha marai 4 sa du ai lam rai nna Democracy manaw de hkawm nga ten ya na zawn dawm kau hkum ai lam gaw ginjaw jum tek ladat jasat jasa re nga mu mada ai lam tsun wa ai.

Myu-ne kawn kalang dat masha lata na amying hkrat wa ai majaw September 18 ya shani hta kalang bai lata hkrum sana raitim Wa Ra Zup mare kawn mare salang Slg. Naw La hte jahpan jum chyare Slg. Nyi Nyi Awng ni du wa nna Tsan Pya mare, mare salang hku na kalang bai shang shingjawng ahkang nga na n re lam tsun wa ai nga Slg. Ah Hpu Dui kawn matut tsun ai.

“Mare masha ni shingjawng ahkang n jaw yang ngai n shingjawng sai ngu tsun yang mare masha ni gaw Slg. Ah Hpu Dui n lawm yang ndai ra lata hpawng hpe n ra sharawng ai nga manghkang byin wa na zawn rai wa nna mare masha ni gaw mare salang dingsa hpe sha ra sharawng ai nga..yawng sen jawm htu nna nhtang wa mat ma ai”

Tsan Pya mare hta Yuzana company kawn hpaji jawng gap da ya ai rai tim Sara ni nga na nta n nga ai majaw jawng komiti hte mare masha ni yawng myit hkrum ta masat htu let, lamu ga dut ai lam hte shang gumhparaw tam nhtawm ya yang jawng nta 2 kahtap shachyaw jat nga sai lam chye lu ai.

Mare kahtawng bawngring lam a matu galaw nga ai wa mung re nhtawm shi a ladaw mung n hpring shi ai majaw Tsan Pya mare salang hpe matut nna naw ra sharawng ai lam jahkring kau n hkam ai lam mare masha langai Jinghpaw Shiga Dap de tsun ai.

“Mare salang wa galaw ai bungli ni jaw ang ai re, kahtawng a bawngring lam galaw ai she re. Shi matu dinghkai akyu ara langai mung n lawm ai. Mare a matu bawngring lam hpe madung dat galaw nga ai she re. Shanhte masa hte shanhte dawm kau ai anhte ni mung tsepkawp jahkring n hkam ai. Mare salang galaw ai 5 ning hta she htum na, ya shi 2 ning sha naw galaw shi ai. N ju n dawng hkat ai masa hte dawm kau na hpe anhte mare masha ni tsepkawp n hkapla lu ai” nga Tsan Pya mare masha langai Jinghpaw Shiga Dap de tsun ai.

Dai zawn Tsan Pya mare Uphkang Du. Ah Hpu Dui gaw magam lit kawn tara shang hkring mat ai lam rai n nga ai rai tim, ya ten Hpakan myu-ne N/T Uphkang Du Slg. Chyaw Myin kawn kahtap shaga da ai majaw Tsan Pya mare uphkang du gaw mare masha 2 hte hpawn September 21 ya shani kawn Hpakan kaw du nga sai lam chye lu ai.

Yuzana company majaw htawt sit hkrum ai mare masha 1,000 jan nga nna 2009-2010 ladaw kawn htawt sit shara jahkrat masing shara hta Tsan Pya mare hku nna de nga nhtawm Slg. Ah Hpu Dui hpe 2013 ning kawn mare salang hku lit jaw shatsam da ai re lam mare masha ni kawn chye lu ai.

Posted in: SHIGA