Gap hkat jahkring ga sadi la na asuya hte NCCT rai n lu jahkrup

May 12-2014 NCCT Ningbaw Nai Han Ta kawn Myitkyina mungshawa mungmasa sanglang hpawng galaw nga yang

Munghpawm Simsa Lam Hkrang Shapraw Komiti UPWC hte Mungdan Ting Madang Gap Hkat Jahkring Bawngban Jahkrup Hpung NCCT ni mali ya ngu na bawngban jahkrup sai raitim myit hkrum ai lam rai n lu ai majaw mungdan ting madang gap hkat jahkring ga sadi la na matu n mai byin shi ai lam NCCT a Ningtau Ningbaw Badu Koi Htu Win tsun ai.

Daini du hkra mali ya na hkrum shaga bawngban wa tim NCCT hte UPWC lapran dap hte seng ai lam, hpaw shabawn hkrang, hpat-wat ladaw hte mung masa bawngban ai lam hta shanglawm ra ai hpaw shabawn lam ni hpe matut bawngban na matu naw ra gadawn nga ai lam matut tsun ai.

“Ndai lang ginchyum dat bawngban jahkrup na gaw n ngut shi ai. Hpang kalang she mai na re. Lakmat n htu byin ai gaw chye ai hte maren anhte ni mung tinang tsap ai lamyan, gap hkat jahkring lam kaw ngangkang ai lam lu na matu anhte bawngban na lam ra gadawn ai a ntsa kalang bai jahkrup na masa re” nga Badu Koi Htu Win kawn tsun ai.

Daini mali ya ngu na hta mungdan ting madang gap hkat jahkring hkrang nhprang daw; 6 hte daw; 7 hpe bawngban wa sai rai timung myit hkrum ai lam rai n lu ai majaw matut nna bai kahtap bawngban na hpe myit hkrum da ai nga tsun ai.

Mungdan ting gap hkat jahkring lam myit hkrum ai lam lu wa hkra dap hte seng ai lam ni hte tarawng tara ni, mung masa bawngban ai lam ni hta shanglawm ra ai hpaw shabawn hpung hte gap hkat jahkring sen htu ai lam hta e sakse sakgan hku shanglawm ra ai lawnglam ni naw jahkrup ra ai lam rai nga ai.

Dai hte maren, amyu sha laknak hpai hpung ni tang madun ai Munghpawm Hpyendap (Federal Army) hpaw shabawn lam hpe asuya maga kawn myit n hkrum ai zawn, asuya maga kawn tang madun wa ai mung masa bawngban ai lam hta ‘7 chyawm’ shanglawm lam tang madun ai hpe mung amyu sha laknak hpai hpung ni maga kawn myit n hkrum ai majaw matut bawngban na ra rawng ai lam rai nga ai.

Kru lang ngu na bawngban hpawng hta amyu sha laknak hpai rawt malan hpung ni kawn tang madun wa ai munghpawm daphpawm hpaw shabawn lam hpe matut jahkrup na lam hte mung masa bawngban hpawng hta ningpawt ninghpang mung masa manghkang bawngban na lam ngu ai myit hkrum lam sha lu ai majaw matut jahkrup na ga gadawn nga ai nga Badu Koi Htu Win kawn matut tsun ai.

“Asuya tang madun ai gaw du-ta-wun-aye tung-pa hta lai nna ngam ai lawnglam ni hpe yawng mai jahkrup ai. Anhte maga du-ta-wun-aye tung-pa hpe bawngban na. Bawngban na ngu ai gaw amyu bawsang ni n zang ayai mat hkra galaw na. Amyu sha kahkyin gumdin lam galaw ai ngu ai hpe bawngban na. Shadip jahpang ahkaw ahkang ngangkang lam bawngban ra ai” nga matut tsun ai.

UPWC hte NCCT ni mungdan ting gap hkat jahkring lam a matu daw; 7 lawm ai lawnglam 104 kawn lawnglam 5 sha bawngban na matu ngam sai lam tsun ai.

Hpawtde September 26 ya hta e mali ya bawngban wa ai jasat jasa ni hpe kalang bai dinglun yu nna shagrin mat wa sana re lam Badu Koi Htu Win kawn tsun ai.

Hkringmang Slg. Awng Min woi awn ai UPWC hte Slg. Nai Han Ta woi awn ai NCCT ni Yangung mare Myanmar Peace Center (MPC) daju hta September 22 ya kawn bawngban hpang ai rai malu ai.

Posted in: SHIGA