Kyat sen 200 jan dan ai Lungseng N-gang gawdin ginsup poi KBC galaw

Kyat sen 200 jan dan ai KBC La Magam Dap a Gawdin Ginsup Poi Lungseng N-gang

Jinghpaw Wunpawng Hkalup Hpung Ginjaw (KBC) woi awn ai Jinghpaw Mungdaw Myitkyina mare hta kani nanghpam ninghkap masing hpe madi shadaw ai let, Hkamja Zet Let Ai Wa La Ni ngu ai gabaw hte ginwang 15 shang lawm ai Lungseng N-Gang Gawdin Ginsup Poi hpe September 15 ya shani kawn shingjawng hpang nga sai rai nga ai.

KBC gaw, madung yaw shada lam rai nga ai kani nanghpam ninghkap ai lam hte Jinghpaw Wunpawng amyu sha ni a kahkyin gumdin lam hpe madun mayu ai lam mung re lam KBC Amu Madu Rev. Dr. Sam Sun Jinghpaw Shiga Dap de tsun ai.

“Dinghku La ni pyi ya na zawn shakut nga ten Ramma ni mung hkamja zet let ai hte kani nanghpam kawn lawt kawt wa na hpe myit mada let galaw ai lam re. Ya ten anhte Jinghpaw kasha ni nanghpam lu sha ai ni law ai. Hkamja lam, amyu sha lam ni hta grai hkra wa ai majaw ramma ni hkamja zet let nna amyu sha lamyan hte nawku hpung ni hta shanglawm wa lu hkra yaw shada let ga-saw ai lam re” nga tsun ai.

KBC La Magam Dap Komiti kawn galaw ai gawdin ginsup poi N-Gang gaw ya yang na manu hku nga yang Myen kyat sen 200 lahta dan ai lungseng n-gang rai nna, dai n-gang hpe Hpakan U Ru Seng Maw Hkalup Nawku Hpung kawn hpung masha langai a lu jaw ai re lam chye lu ai.

September 25 ya shani du hkra galaw na dai shing jawng poi hpe Nawng Nang, Jinghpaw Wunpawng Chyum Hkawlik (KTC) jawng wang hta hpaw poi lamang galaw nhtawm Jaw Bum lagaw, deng 8 snr Behtani shara 3 hta KBC kawn hpung sara ni hte hpawn wa la ni shing jawng shajang nga ai lam KBC shiga lawk kawn chye lu ai.

Lungseng hpe Jinghpaw Mungdaw mung shawa ni madu ai lam hpe shadawng dan ai re lam hte ya ten shawng nnan lang galaw ai gawdin n-gang kumhpa gaw sinpraw dingda asha dan hta manu law dik mung re lam chye lu ai.

Lamang hta shanglawm ai wa la ni hpe Chyum laika sharin achyin ya ai lam ni mung galaw nhtawm jahpawt daw hte shana daw hta ginsup lamang galaw nga ai re lam chye lu ai. Gawdin ginsup ai ni gaw asak 35 ning lahta na ni rai nna yawng marai 350 jan rai malu ai.

KBC hta ginwang 15 nga nna dai ni gaw Myitkyina ginwang, Putau ginwang, Naw Mung ginwang, Hka Hku ginwang, Chyi Hpwi ginwang, Wai Maw ginwawng, Keng Tung ginwang, Mung Mau ginwang, Kuthkai ginwang, U Ru Seng Maw Ginwang, Manmaw ginwang, Hting Nai ginwang, Sama ginwang, Sam Mung ginwang hte Lawu Ga ginwang ni re lam chye lu ai.

Du na shaning ni hta mung matut nna gawdin ginsup lamang hpe Jinghpaw Wunpawng Hkalup Hpung Ginjaw (KBC) kawn galaw sa mat na re lam chye lu ai.

Posted in: SHIGA