Tang Hpre mare shaprai kau na, shawa ara me hkam la lamang galaw

Myitkyina mare dingdung de deng 27 Mali-N'Mai Zup

Mali-N’Mai Zup hka wanjak masing a majaw htawt sit hkrum ai Tang Hpre mare hpe shaprai kau nna Awng Min Ta Tsan Pya mare mying masat na lam hte laga mying masat na lam ni hte seng nna Myitkyina mare asuya gaw 'shawa ara me' hkam la ai lamang galaw wa sai lam kahtawng masha ni kawn tsun ai.

Mali-N’Mai Zup hka wanjak masing a majaw htawt sit hkrum ai Tang Hpre mare hpe shaprai kau nna Awng Min Ta Tsan Pya mare mying masat na lam hte laga mying masat na lam ni hte seng nna Myitkyina mare asuya gaw 'shawa ara me' hkam la ai lamang galaw wa sai lam kahtawng masha ni kawn tsun ai.

Jinghpaw Mungdaw Myitkyina myu-ne asuya a matsun hte maren September 11 ya shani Awng Min Ta mare uphkang rung hta shawa ara hkam la lamang galaw ai re lam chye lu ai.

“Mare uphkang rung hpung ni woi awn nna lamang hpe myu-ne matsun hte maren shaga galaw ai. Myu-ne kawn masat jahkrat dat ai lawnglam 3 kaw na mare masha ni yawng gaw Tang Hpre mare hpe shaprai kau ai ngu ai hpe myit n hkrum ai. Tang Hpre mare hta jat bang wa ai mare hku tawn da na ngu ai hpe myit hkrum ma ai” nga Slg. Tu Hkawng kawn tsun ai.

Zuphpawng hta (1) Tang Hpre mare hpe shaprai kau nna Awng Min Ta Tsan Pya mare ngu laksan masat da na lam (2) Tang Hpre mare hpe mi na zawn sha tawn da nhtawm Awng Min Ta mare hpe Tang Hpre mare kata kaw jat bang ai mare hku na masat na lam hte (3) Awng Min Ta mare hpe ni nawn ai mare kahtawng Alam ginwang daw kata bang kau na lam ngu ai hpe ra lata ai lamang galaw ai nga Slg. Tu Hkawng kawn tsun ai.

Dai lawnglam 3 kaw na lawnglam (1) hte (3) hpe ninghkap da nna Awng Min Ta Tsan Pya mare hpe Tang Hpre a maden jat ai mare hku nna tawn da na lam myit hkrum ai nga matut tsun ai.

Awng Min Ta mare hpe Alam ginwang daw kata bang na lam ngu ai lawnglam gaw Jinghpaw Mungdaw Hkringmang Daju Slg. Lajawn Ngan Seng a yaw shada ai jasat jasa re nga tsun dan ai lam chye lu ai.

Awng Min Ta mare uphkang rung kaw galaw ai shawa ara hkam la ai lamang hta kahtawng masha 200 daram sa du nna Tang Hpre mare jahten kau na lam hpe ninghkap ai lam mare masha Slg. Tu Hkawng tsun ai.

Awng Min Ta mare masha Jan. Ja Hkawn mung shaning na na grin nga chyalu Tang Hpre mare jahten kau na hpe ninghkap ai lam “Tang Hpre mare gaw grin nga ra na re. Shaning ram ram na sai ndai mying hpe mungkan ting mung chye taw nga ai Mali-N'Mai Zup makau na mare re. Ndai Tang Hpre mare hpe gara hku mi rai rai jahten kau na ngai myit n hkrum ai” nga tsun ai.

Mali Zup hka wanjak masing pat kau na lam hte seng nna shamu shamawt ai lam hta dakring dalang shang tsap lai wa sai Jan. Ja Hkawn hte Jan. Lu Ra yan htinggaw hpe Miwa asuya CPI a n-gu garum ntum lam hpe lai wa sai June shata kawn jahkring kau ai hta ya du hkra garum ntum n lu ai re.

Dai hte maren Tang Hpre mare mying gaw moi ji woi ji wa pat kaw na ban hte ban grin nga ai mying shingteng rai nna shaprai kau na masing hpe myit n hkrum ai hte maren Jinghpaw mungshawa ni a ginra mung re majaw yawng jawm makawp maga la na lam kahtawng masha Slg. Tu Hkawng kawn ga-saw ga tsun ai.

2009 ning kawn Mali Zup hka madim masing hpe hpang wa ai majaw Tang Hpre mare a dingda de deng 9 gang ai shara hta Tang Hpre mare mung htawt sit shara jahkrat hkrum nhtawm ya yang nga ai dabang hpe Awng Min Ta Tsan Pya mare ngu nna shamying da ya ai lam rai nga ai.

Buga masha, shingra tara makawp maga hpung ni hte yu ngwi ninghkring ni hte hpawn mungdan ting ninghkap ai majaw 2011 ning September 30 ya hta gumsan magam Ting Tsing kawn Mali Zup hka madim masing hpe jahkring da ai re. Rai timung, Miwa CPI gaw matut nna hkrang shapraw lu hkra mare masha ni hpe zinlum ai lam galaw nna ndau lai ka ni garan jaw ai re.

Mihprap wan n-gun 6,000 Megawatts shapraw na rai nga ai Mali Zup hka wanjak masing hpe 2007 ning kawn galaw hpang nna mi na asuya Masat (1) Mihprap Wan Hkringmang Dap, Miwa CPI hte Asia World Company ni pawng nna gawgap ai lam rai nga ai.

Posted in: SHIGA