Saranum yan hpe roi rip sat ai manghkang asuya ntsa lit nga ai ngu tsun

Ko Mya Ae, Jan 23-2015 AD 2000 Gawknu yawn hkyen poi lamang de sa du ai 88 Myen jawngma ningbaw

Jinghpaw Wunpawng Hkalup Hpung Ginjaw (KBC), laika sasana apnawng saranum 2 ntsa roirip nna sat hkum ai manghkang hpe tara rap-ra lam hte mabyin teng sawk shapraw nhtawm hkrat hkrang hkra ahkyak la ya na lam hte ya byin ai manghkang Myen asuya ntsa lit nga ai ngu 88 jawngma ningbaw Ko Mya Ae tsun ai.


Jawng Saranum yan roirip sat hkrum ai lam hte seng nna Jinghpaw Wunpawng shawa masha ni hte arau nga nga ai lam hpe madun ai hku nna January 23 ya shani galaw ai makoi mayang hpawng sa du ai 88 jawngma ningbaw Ko Mya Ae ning nga tsun dat ai re.

“Anhte sa ai gaw ndai saranum yan sat hkrum ai manghkang hte seng nna Jinghpaw Wunpawng shawa masha hte maren nga nga ai lam hpe madun mayu nna sa ai re. Myen asuya gaw mungchying sha ni hpe sim sim sa sa nga pra lu na lam ngu ai prat a pahkam, prat a shim lam n lu jaw sai nga jang ndai asuya gaw asuya langai hku n tsap sai. Dai majaw ndai manghkang hte seng nna asuya kaw madung lit nga ai ngu tsun mayu ai” nga shi kawn tsun ai.

“Ngai yu yang masha mun 6, mun 7 hkawt rai na re ngu shadu ai. Grai law ai. Shanhte yawng hpe yu jang myit pyaw na lam langai pyi n mu ai. Yawng ni yawn hkyen hkrum nga ai masa, maroi n ni masin n si taw nga ai majaw dai manghkang hte seng nna ngai mu mada ai lam gaw mabyin teng sawk shapraw ya nna hkrat hkrang hkra ahkyak la ya na matu asuya kaw lit nga ai ngu mu mada ai” nga matut tsu ai.

Makoi mayang hpawng de Ko Mya Ae hte rau Ko Pyung Chyu, Ma Nyila Ting, Ma Tsan Tsan Maw, Ma Tinza Hkai ni sa du nhtawm Yangung daju shinggyim uhpung uhpawng kawn amyu shayi hpung dat kasa Naw Tsu Tsanna Lha Lha Tsu ni mung sa du ai lam chye lu ai.

Daini January 23 ya jahpawt hkying 9:00 ten mungshawa n-gun mun 5 jan gaw Myitkyina ginwang Dingda Shanzu mare na KBC Rung kawn Dap Kawng mare du hkra Saranum yan a moi mang du-u hpe hpai lung wa nhtawm dai kawn Nawng Nang mare na AD-2000 gawknu du hkra mawdaw hte htaw sa nna AD-2000 gawknu kata akyu hpyi hpawng lamang galaw nhtawm KBC nawku hpung masha ni a labau shang share shagan ni hpe lup ai Jaw Bum Lupding Lura e makoi mayang dat sai rai nga ai.

Dai hte maren Yangung, Sam Mungdaw, Laiza, Mai Ja Yang ginra ni hta sha n ga shara magup na KBC hpung masha ni mung yawn hkyen ai lam masat dingsat akyu hpawng lamang galaw ma ai.

Dai amyu shayi yan roirip sat hkrum ai lam ntsa yawn hkyen ai lam masat dingsat hku nna January 23 ya jahpawt hkying 9:00 hta Maha Bandula Nam Pan Sun hta shawa masha marai 30 hkawt myit dum nampan shanghkawng sa tawn ai nga Facebook laika man ni hta shaleng da ai.

January 19 ya shana Lahta Sam Mung Muse ginwang Nam Tau ginwang daw Kawng Hka mare na KBC nawku jawng wang hta Apnawng Jawng Saranum Maran Lu Ra hte Tangbau Hkawn Nan Tsin yan shanu nga ai dum nta kata e nan roirip nhtawm zingri sat kau ai lam rai nga ai.

January 20 ya shani hta si mat sai jawng saranum yan a moi mang hpe Sam Mungdaw Muse Tsi Rung e jep malu ni la nhtawm January 21 ya shani Jinghpaw Mungdaw Myitkyina ginwang de htaw wa ai shaloi lam dingyang mungshawa ni kawn wan shadaw ni shatu let hkap hkalum la nhtawm yawn hkyen hpawng akyu hpyi lamang galaw ai hta shawa masha hkying kaba hkan sa dat ma ai.

Dai Kawng Hka mare kata Myen asuya dap Hk.M.Y Masat (503) dap shara jahkrat da nna manghkang byin ai shara grup yin e hpyen hkyepdin hkang ni, hpyen shingkyit zawn re ni hpe mu lu ai majaw mare masha ni gaw hpyen dap re ngu jawat da ai lam ni gaw nga ai.

Saranum yan gaw galun anyaw ai ningma, gadoi ashin ai ningma hte baw je ga mat ai ningma ni hte si taw nga ai hpe mu lu nna manghkang byin ai shara hta sai hkang kap ai sati nhtu langai, hpun tawng langai hte laga ginrawn ai hpe mu lu ai majaw Mungdaw Asuya kawn Muse ginwang Pyada Dap Up woi awn ai Jep Sagawn Hpung hpaw nhtawm jep sagawn taw ai nga Saranum yan sat hkum ai manghkang hte seng nna nsen shapraw hkringmang dap kawn January 22 ya shani ndau shapraw da ai.

Posted in: SHIGA