Lahta Sam mung Wunpawng Mungdan Shanglawt Hpung (KIA) Dap Ba (4) npu Dap Dung 2, 36, 38 ginra ni hta Myen asuya dap hte majan kalang bai byin nga ai lam KIA Dap Ba (4) kawn Dukaba Zau La tsun ai.
Muse ginwang hte Kuthkai ginwang lapran asuya dap ni 2015 shaning nnan kawn hpyen n-gun jat bang ai lam ni nga ai hte maren January 12 ya shani gasat poi bai byin mat ai re nga shi kawn tsun ai. Dai shara hta asuya maga na D.K.Ts (10) kawn dap ni shamu shamawt taw ai re nga tsun ai.
“Shaning nnan kawn Kuthkai lam, Sinli lam, Muse Lam maga hku na kahtap jat bang wa ai hpe mu lu ai. Majan gaw mani byin hpang ai. Shanhte asuya maga na hpyen hpung ni htim lung shamu shamawt wa ai majaw gasat hkat ai. Shanhte gaw laknak kaba ni hte gap ai” nga Dkb. Zau La tsun ai.
January shata 13 ya jahpawt daw hta gasat poi byin mat wa nna shana daw ten bai zim mat ai raitim shana maga hta Mung Gu ginwang kata de asuya dap ni n-gun jat bang wa ai lam nga ai nga matut tsun ai.
“Shana maga de laknak kaba htaw ai mawdaw ni hte n-gun bai jat wa ma ai. N-gun jat wa ai hpe yu yang majan laja wa na masa nga ai” nga shi kawn tsun ai.
Majan bai byin wa ai lam gaw KIO hku nna daining shaning nnan kawn nanghpam tsi mawan pat jasan na matu ka-ni ni jahten ai lam, nanghpam tsi mawan jep joi ai lam ni grau grau galaw wa ai lam hpe Myen asuya dap kawn n ra sharawng ai majaw re nga Dkb Zau La tsun ai.
Daining shaning nnan kawn Muse, Kuthkai mawdaw lam dingyang Myen asuya dap ni n-gun jat bang ai lam nga nhtawm ndai laman majan bai byin wa ai re nga tsun ai.
Lahkawng maga si hkala ai lam hpe rai n lu shagrin da ai. Bai nna, Myen asuya hte KIA lapran daining laman shawng ningnan lang gasat ai majan mung rai nga mali ai.
0 comments:
Post a Comment