Hpakan e Myen asuya dap hte KIA majan laja lana byin nga

Dap 6 makau Awng Ba Le kaw shara la tawn ai Myen asuya Dapnu 66 hpyenla ni

Wunpawng Mungdan Shanglawt Hpyen Dap (KIA) Dap Ba (2) npu Masat (6) Dap Dung hte Myen asuya hpyen dap ni January 15 ya jahpawt hkying 6:00 kawn majan laja lana byin nga ai lam KIA Dung (6) kawn Du kaba Tang San tsun ai.

“Majan gaw daihpawt manap hkying 6:30 kawn hpang ai. Awng Ba Le mare maga hku shang wa nna majan byin wa ai kun? Yawng 300 hkawt rai na re. Anhte gaw daihpawt kawn ya du hkra hkap hkan ninghkap gasat nga ai. Laknak kaba 81 hte 105 MM mung gap ai. 81 gap ai gaw grau law ai. (U Ru Hka) awra hkran Ginsi kawn ndai hkan de gap ai. 105 MM hte Sang Hka hpyen dap kawng kawn mung gap ai” nga Dkb. Tang San kawn tsun ai.

Myen asuya dap Dapnu Masat (66) npu Hk.M.Y Masat (1) dap dung hte hpawn dap dung 3 kawn hpyen n-gun 300 daram shamu shamawt bang wa ai majaw gasat poi byin mat ai hta Myen asuya dap maga kawn 81 MM hte 105 MM laknak kaba ni hte 60 lang n yawm gap bun mat ai nga shi kawn tsun ai.

Lahkawng maga majan poi laja lana byin nga dingyang rai nna ya yang Awng Ba Le mare masha ni, jawngma ni kawn kawt marai 1,000 mi daram pat shingdang hkrum nga ai lam buga ginra masha ni hte Jinghpaw Wunpawng Bawngring Mahkri Shawn Hpung (KDNG) N/T Ningbaw Slg Tsa Ji kawn Kachinnews Jinghpaw Shiga Dap de tsun ai.

Shingrai, pat shingdang hkrum ai mare masha ni gaw mare kata na nawku jawng hta gan shingbyin nga nhtawm Hpakan ginra kawn mare kanu kawa ni, nawku hpung salang ni gaw shaga la na matu sa tau ai raitim Myen asuya dap kawn laiwa laisa ahkang pat shingdang da ai majaw mare masha ni n lu shamawt mat nna tsang ra ai masa pru nga ai lam shi kawn tsun ai.

“Lam dingyang hpyen la jahkrat da ai. Tang Hkawng mare na masha ni mung Hpakan de yu wa n mai ai. Yawng pat da ai. Dai mare grup grup Myen hpyen la ni wang da ai. Ya gaw laknak kaba hte chyan gap taw ai. Jawngma ni hpaji hparat lam hta machyi sum sana. Sinat nsen, bawm nsen npu grai hkrit ra ai madang de du taw sai” nga shi kawn tsun ai.

Shana daw hkying 2:00 du hkra majan matut manoi byin nga nhtawm Awng Ba Le mare ngu ai Tang Hkawng mare hta nta htinggaw 400 jan nga nna mare kahtawng masha 1,000 hkawt gaw jawngma 200 hte sara/saranum 21 ni hpe mung pat shingdang hkrum nga ai majaw tsang ra ai masa re nga tsun ai.

January 14 ya shani Mugawng-Kamai-Hpakan lam dingdung jep joi yu reng nga ai Jinghpaw Mungdaw asuya hpung kawn Hkrun Lam Matut Mahkai Hkringmang Slg. Kaman Du Naw hte arau hkan hkrat wa ai shim lam hpung marai (3) hpe Hpakan ginwang Hu Lung mare makau hta KIA dap ni rim mat ai.

KIA hte Pyada hpung ni man ap hkrum ai majaw gan hkang zing da ai lam rai nna dai ni hpe January 15 ya shani bai dat ya na ngu Jinghpaw Mungdaw Dingdung Daw Daju Hpyen Dap hte Hpakan Dap Up ni hpe mung shana da sai re lam, raitim Myen asuya hpyen dap gaw htim lung shamu shamawt bang wa ai majaw ya du hkra majan naw byin nga dingyang re nga Dkb. Tang San tsun ai.

Ya yang asuya shim lam hpung na marai (3) hpe Hpakan ginra Gwi Hka na KIA Dung (6) npu Mungshawa Hpyen Hpung ni hte arau hkang zing da nhtawm KIA ginjaw matsun hta hkan nna bai dat ya na raitim ya yang majan byin taw nga ai re nga shi kawn tsun ai.

KIA ni rim da ai pyada 3 hpe bai dat ya na matu KIO a Machyoi Hpung Rap Daw hte Manghkang Hparan Masit Rung hpe shana da nhtawm ru di hpyen dap ni gaw ginra jasan jaseng hkawm taw ai nga asuya n sen shapraw makan dap kawn January 14 ya shani ndau laika shale da ai.

Lai wa sai 2014 ning October 14 hta Hpakan na Dapnu Masat (66) Dap Up gaw KIA Dap Dung (6) hpe shara htawt ya na matu lang hte lang tsun wa ai raitim KIA maga kawn htingnut ya ai lam n nga ai sha hpyen masa chya hkat ai lam ni nga wa sai re.

Amyu sha laknak hpai uhpung ni hte mungdan ting gap hkat jahkring lata masat ka na lam hpe February 12 ya Munghpawm Nhtoi hta lata masat ka na matu Ne Pyi Daw sa ai amyu sha laknak hpai uhpung 12 hte hkrum shaga ai ten e Gumsan Magam Slg. Ting Tsing kawn January praw 5 ya shani tsun shadut mat wa sai rai nga ai.

Posted in: SHIGA