Roirip sat hkrum ai KBC srn 2 a manghkang, pyada ni jep joi hpang

 Roirip zingri sat hkrum ai KBC laika sasana apnawng saranum 2 hpe January 22 ya shani ramma ni Myitkyina kaw ninghkap madun nga yang

Si mat ai Saranum 2 a moi mang hpe Muse Tsi Rung hta January 20 ya shani jep joi ngut sai raitim Myen asuya pyada dap gaw sawk jep malu ni hpe ndau shale ai lam n galaw ai sha Muse Hpada Dap kawn Kawnghka kahtawng masha ni hte hpyenla ni hpe shawng ningnan jep joi nga ai lam rai nga ai.

“Jep da ai lam ni n jaw shi ai. Pyadap ni zing da shangun ai masa nga ai. Daini hpyenla ni hte mare masha ni hpe jep ai. Shawng nnan lang na ninggam sha naw re. Muse laksan ginwang pyada dap matsun du kawn lit la nna du salang 4 ni jep lawm taw ai” nga Muse ginwang Jinghpaw Wunpawng Hkalup Hpung Ginjaw (KBC) kawn Amu Madu Rev. Zau La tsun ai.

Daini January 21 ya shani hta Kawnghka kahtawng hta Myen asuya Hk.M.Y Masat (503) dap dung n-gun 100 hkawt nga ai kawn 60 daram bai jat bang wa ai majaw mare buga masha ni hkrit gari nga ai lam Kawnghka kahtawng uphkang du Slg. Zinghung La kawn tsun ai.

Dai hpang Myen asuya a Muse ginwang pyada dap matsun du lit la nna Kawnghka kahtawng masha marai (27) hte Myen hpyenla 15 hkawt hpe jep joi ai lam ni galaw nga ai lam Pangsai (Chyu Kuk) Pyada Dap Up Slg. Zaw Min Htun kawn tsun ai. Si ai manghkang hte seng nna Pangsi (Chyu Kuk) pyada dap hta upadi pukma 301 hte amu hpaw da ai nga shi kawn tsun ai.

Jinghpaw Wunpawng Hkalup Hpung Ginjaw (KBC) laika sasana magam gun Jawng Saranum 2 roirip sat hkrum ai manghkang, KBC nawku hpung shawa masha ni hta sha n-ga Jinghpaw amyu sha ni yawng yawn hkyen hkrum nga ai lam, hpawng chyawm akyu hpyi ai lam snr laksan kyu hpyi ai lamang ni galaw nga ai lam KBC kawn January 21 ya shani Jinghpaw Laika hte ndau laika shapraw nhtawm shadut da ai.

KBC kawn dat dat ai jawng saranum 2 gaw roirip nna zingri sat hkrum ai lam hte dai Myen asuya Hk.M.Y Masat (503) dap hpung ni gaw January 17 ya shani kawn Kawnghka kahtawng e dap shara jahkrat mat ai lam shaleng da ai.

1995 ning kaw nna KBC hpaji jawng sharin sasana sara/saranum ni shalat mat ai gaw 20 ning hpring sai rai nhtawm, lit ang ai buga ginra hkan makam masham hpung n ginhka tsawra hku hkau ai lam ni mung lu la ai nga tsun ai.

Shan a moi mang hpe Muse Tsi Rung kawn Myitkyina ginwang de daini htaw wa sai rai nna hpawtde January 22 ya snr 23 ya shani hta KBC kawn lit la nna makoi mayang ya na re lam ndau da ai.

January 19 ya shana yuptung hpuwa aten e Kawnghka Jinghpaw Wunpawng Hkalup Hpung Ginjaw nawku jawng wang kata dum nta e asak (20) ning Maran Lu Ra hte asak 21 ning Tangbau Hkawn Nan Tsin yan gaw roi rip zingri zingrat nna sat hkrum ai lam rai nga ai.

Posted in: SHIGA