 |
KIO Ningbaw Kaba Lanyaw Zawng Hra (ka-ang) hte KNU Ningbaw Mutu Tse Pu |
Mungdan ting madang gap hkat jahkring bawngban ai lam rai n ngut kre lu ai majaw du na February 12 ya shani (Munghpawm Nhtoi) shani lakmat htu na matu n mai byin shi ai lam Myanmar Peace Center (MPC) hte Mungdan Ting Madang Gap Hkat Jahkring Bawngban Jahkrup Hpung (NCCT) dat kasa ni kawn tsun ai.
Munghpawm Simsa Lam Hkrang Shapraw Komiti (UPWC) hte NCCT ni 7 lang ngu na kalang bai hkrum shaga bawngban na matu tau hkrau hkrum shaga ai lamang hpe January 21 ya shani Htai Mungdan Chiang Mai mare e lahkawng maga na dat kasa ni hkrum shaga bawngban ai lam rai nga ai.
“Bawngban n kre lu shi ai majaw sen htu na rai n mai ai. Bawngban myit hkrum ai lam lu jang she htu mai ai baw rai yang, ya chyawm malawng maga gaw jahkrup ngut magang sai. Nkau daw ni naw ngam ai le i. Dai shani htu lu na gaw mai byin na masa n nga ai” nga NCCT salang Badu Koi Htu Win tsun ai.
Dai bawngban ai lam hta NCCT maga kawn UPWC hpe Laiza kaw byin mat ai manghkang hparan na matu, lahkawng maga hkan sa ai tarawng tara hte ginrun yungreng gawnhkang komiti hpe hpaw shabawn na ngu ai daw 3 hpe madung tang madun mat ai nga Badu Koi Htu Win kawn tsun ai.
Mungdan ting gap hkat jahkring lam a matu lahkawng maga bawngban jahkrup na matu naw ra rawng ai majaw Munghpawm Nhtoi hta lakmat htu na matu rai n mai byin ai lam MPC kawn Slg. Aung Min tsun ai.
“Asuya maga gaw December na numshawn shaw da ai lam hpe NCCT maga kawn naw bawngban ra ai ngu ai lam sha naw re. Munghpawm Nhtoi shani lakmat htu na matu aten grai kahtep ai ten. Hkrang nhprang hta ra rawng ai lam ni hpe bai jahkrup ai masa hku le i, (7) lang ngu na hkrum shaga bawngban na matu ninghtoi n lu masat shi ai” nga shi kawn tsun ai.
Lai wa sai December 22, 23 ya shani ni hta UPWC hte hkrum shaga bawngban mat ai mungdan ting madang gap hkat jahkring lam hkrang nhprang ntsa kalang bai sawn dinglik yu ai lamang hpe January shata 19 hte 20 ya shani hta galaw mat ai rai nga ai.
0 comments:
Post a Comment