Duhkra ladaw dinglai katsi ai majaw tsin-yam ma kaji ni machyi sawng

Shawng de NDA-K ginjaw Pangwa

Wunpawng Mungdan Shanglawt Hpung (KIO) uphkang ginra Miwa ga jarit masat shadaw (6) Hpare Tsin-yam Dabang hta duhkra ladaw katsi dinglai ai majaw tsin-yam ma kaji ni machyi makau hkrum nga ai lam KIO hpyen yen lakawn lanawn komiti lit hkam Salang Kaba Labang Doi Pyi Sa tsun ai.

“Mani lu ai shiga hku nga yang mani shawng shani ma langai si mat ai. Mani mung 3, 4 Miwa Mung Tengchong tsi rung de bai sa dat sai nga tsun ai” lam Slkb. Doi Pyi Sa tsun ai.

KIA Dapdung (32) hte (33) makau na Hpre Tsin-yam Dabang hta shingbyi nga ai tsin-yam dabang na ma kaji 3, 4 grai machyi sawng wa ai majaw Yunnan Mungdaw Tengchong Ting Rung de sa tsi taw ai nga tsun ai. Dai tsin-yam dabang de matut mahkai lam yak hkak ai majaw kahtap matut mahkai san shateng n lu shi ai lam Slkb. Doi Pyi Sa kawn January 10 ya shani tsun ai.

Dai Hpre tsin-yam dabang hta tsin-yam masha 900 jan na nna ya yang malu masha hte hpun palawng ni hpe Jinghpaw Wunpawng Hkalup Hpung Ginjaw (KBC) kawn madi shadaw nga nhtawm malu masha a matu gaw grai yak ai lam rai n nga ai nga matut tsun ai.

KIO gaw tsi jaw gawk hte lawu tsang jawng ni hpaw da ya ai nga shi kawn tsun ai. Ya yang Hpre hta hkyen htat ai majaw lu hka yak taw ai nga tsun ai. Lai wa sai shaning ni hta mung ya na zawn duhkra ladaw katsi ai raitim daining laman duhkra ladaw grau sawng wa ai lam re nga Slkb. Doi Pyi Sa kawn matut tsun ai.

Hpare tsin-yam dabang kawn ma lahkawng Miwa tsi rung de tsi tsi na matu sa du taw sai nga duhkra ladaw katsi dinglai ai majaw tsin-yam ma kaji ni machyi makaw hkrum ai re nga Hpre tsin-yam dabang makau hta jung ai KIA Dapdung (32) hte (33) kawn Dukaba langai tsun ai.

“Ya ten grai katsi ai. Hkyen hkrat ai 2, 3 ya rai sai. Mani chyawm tsi rung de marai 2 gaw sa mat sai. Kabu ai. Kan sa yang sai lawm ai nga tsun ai. Marai langai tsi rung rawng taw nga sai. Hpa byin ai kun n chye ai” nga shi kawn Jinghpaw Shiga Dap de tsun ai.

Hpare tsin-yam dabang kawn lit nga ai ni kaw nna ma ni machyi makaw hkrum nga ai hpe KBC rung de January 10 ya shani shana da ai raitim matut mahkai yak ai majaw azin ayang san shaga lu ai lam n nga ai lam Yunnan Mungdaw Yinjiang ginwang kaw nga ai KBC hpung magam gun Saranum Jan. Kaw Nan tsun ai.

“Mani gaw hkyen grai hkrat nna ma ni grai machyi taw ai. Mani chyawm Miwa tsi rung du taw sai nga tsun wa ma ai. Azin ayang san na matu shanhte maga kawn matut mahkai yak taw ai” nga Jinghpaw Shiga Dap de tsun ai. KBC gaw dai Hpre tsin-yam dabang de malu masha ni madi shadaw nga ai raitim ya yang tsi mawan ni hkyak hkyak ra gadawn nga ai nga shi kawn tsun ai.

Dai hte maren Miwa ga jarit masat shadaw (8) hta mung ndai laman hkyen tawng ni pe 2 ram htat taw nga nna du hkra ladaw grai katsi ai majaw hkawmsa hkawmwa yak hkak taw ai nga shadaw (8) na tsin-yam dabang ni e garum nga ai KBC kawn Sr. Bawk La tsun ai.

“Anhte ndai kaw chyawm machyi makaw gaw n nga ai. Raitim hkyen grai hkrat ai majaw hka ni gye taw ai. Shinggan le hkawm mung n mai ai. Sengke, Mawdaw kawn hkawt n mai gau ai. Hka mung hka gye tawng ni hpe shadu lu ra ai” nga shi kawn tsun ai.

2012 ning KIA hte Myen asuya ni majan bai byin nna Pangwa ginra lahta daw na kahtawng ni kawn hprawng yen bang wa ai hpyen hprawng masha ni rai nhtawm dai July shata kawn dai tsin-yam masha ni hpe moi NDA-K Ningbaw Kaba ya Rap Daw Dat Kasa Slg. Zahkung Ting Ying gaw Pangwa de htawt na matu tsun wa yu sai. Raitim dai tsin-yam masha ni n htawt ai sha jarit masat shadaw (6) Hpare e matut nna shingbyi nga ai lam rai malu ai.

Posted in: SHIGA