Jinghpaw Mungdaw kata simsa lam rai n nga ai majaw Manau poi galaw na matu ninghkap nga ai lapran 67 ning hpring Jinghpaw Mungdaw nhtoi manau poi hpe galaw na matu January praw 5 ya shani hpaw poi galaw sai lam manau shabyin shatai komiti ningbaw Slg. Lahkri La Awng tsun ai.
Jinghpaw Mungdaw Myitkyina Ginwang Shata Pru mare na manau wang shawng e jahpawt hkying 8:00 ten hta makam masham nawku hpung shagu na hpung salang ni kawn manau wang hpaw sumri rep di nna nawku dawjau akyu hpyi ai lam galaw mat ai rai nga ai.
“Manau poi galaw sana re majaw Karai Kasang kaw akyu hpyi ap ai. MCC (Myitkyina Hkristan Kongsi) kawn woi awn nna Majoi Gawknu kata nawku dawjau ai lamang galaw ai. Dai ni na hpaw poi lamang kaw Miwa Mung na gunrai madun poi galaw ai. Gawdin shingjawng poi, ta din shingjawng poi ni mung galaw taw nga sai” nga Slg. Lahkri La Awng kawn tsun ai.
Raitim manau wang hpaw ai lam sha rai nna manau rai n nau ai sha du na January praw 8 ya shani hta she manau nau mat na re lam tsun ai. Hpaw poi lamang hta buga ginra masha marai 400 jan sa du ai nga shi kawn tsun ai.
Manau wang kata gat seng yawng 200 hkawt dut magang sai rai nna gawdin, ta din zawn re ai ginsup hpan ni mung lawm nhtawm shana daw hta Mali Hku Majoi Pinra hte Chyai Hku Majoi Pinra hta Wunpawng htunghking ka hkrang shingni hpung ni kawn shangwi shapyaw mat na re lam matut tsun ai.
Jinghpaw Mungdaw Nhtoi hpe shagrau ai hku nna 67 ning hpring masat dingsat shani hta Manau Poi hpe Jinghpaw Mungdaw asuya ladaw hta shawng ningnan lang galaw ai lam mung rai nga ai.
Raitim ya ten majan naw byin nga ai lam, mungshawa ni jet ai simsa lam rai n lu ai hta sha n ga shinggyim ahkaw ahkang ladu lai tawt lai hkrum nga ai lam tsun nhtawm manau poi hpe ninghkap ai lam lai wa sai November 28 ya shani Saranum Lanan Bawk Ja hte rau buga masha ni hku nna Hkringmang Daju Slg. Lajawn Ngan Seng hpang de ninghkap laika mara da ai re.
Ya ten hta manau poi galaw na matu n manu ai ngu ninghkap da ai ni gaw manau wang hpaw poi lamang hta sa du ai lam n nga ai zawn, lamang sa du ai ni mung Myen asuya kawn shaga da ai masha ni hkrai sa du ai re nga buga masha Srn. Lanan Bawk Ja kawn tsun ai.
“Daini hpaw poi hta buga ginra masha ni n sa du ai daram re. Moi hkan nga yang lam hkan poi sa yu ai masha ni she chyat ai. Daini nga yang buga masha ni mung n sa ai ngu tsun mayu ai. Ya ka taw ai masha ni mung shanhte saw da ai masha ni le. Myen asuya gaw jawngma ni hpe shaga nna ka shagun ai” nga matut tsun ai.
Ya yang tsin-yam masha ni naw nga nga ten Wunpawng Mundan Shanglawt Hpung (KIO) gaw manau poi lung na n re lam hte Simsa Lam Akyu Galaw Hpung (PCG) malawm ni yawng mung Laiza de zuphpawng lung taw ai majaw dai manau poi de n lu shang lawm mat ai lam PCG kawn Slg. San Awng tsun ai.
“KIO gaw tsin-yam hkrum taw ai hpyen yen masha ni naw nga nga ten dai zawn poi jau jau hkawm na matu n mai byin ai. Bai nna dai de sa na matu mung Myen asuya hpe ahkang naw hpyi ra ai re majaw n lu sa sai. Myitkyina rung kawn KIO magam gun ni mung n sa ai. Laiza kaw zuphpawng nga ai majaw sa mat sai. Anhte PCG mung n sa ai” nga shi kawn tsun ai.
Manau poi hpe ya yang mungdan kata Myen asuya hte KIO lapran majan dingyang byin nga nna ginra simsa ai lam n nga ai majaw manau poi galaw na hpe lai wa sai 2014 ning September kawn November shata laman Jinghpaw mungshawa ni mun mi jan lata masat jawm ka nhtawm Mungdaw asuya hpe ninghkap mat ai.
Poi shabyin shatai komiti ningbaw Slg. Lahkri La Awng chyawm gaw “ndai manau poi hpe Myen asuya n byin n mai galaw shangun ai, lauban launa na ni galaw shangun ai nga nna shiga na shut nna myit n hkrum ai nga tsun ma ai. Teng sha nga yang manau poi galaw ai ngu gaw… ngai gaw 2011 kawn poi shabyin shatai komiti ni lit nga ai majaw matut lit la sa wa ai she re. Kadai mung n byin n mai galaw ra ai nga nna tsun ai ni n nga ai. Raitim Jinghpaw Mungdaw Nhtoi Manau Poi galaw ai shaloi manau nau ai hpe shayawm ga ngu myit hkrum da ai re” nga tsun ai.
2011 ning kawn 2014 ning laman manau poi hpe 4 ning kalang n lu galaw mat ai majaw ngam ai hkrat ang na gumhpraw kyat sen 2,000 hte dai ning lu ai alu gumhpraw yawng kyat sen 4,000 jan hkrat ang na re nga maram da ai lam shi kawn matut tsun wa ai.
1948 ning January 10 ya shani kawn “Jinghpaw Mungdaw Nhtoi” hku nna Myitkyina ginwang Shata Pru mare na manau wang hta (Padang Manau) hpe nau hpang mat sai re. Raitim 2010 ning hta 63 ning hpring manau poi hpe hpang jahtum lang galaw mat nhtawm 2011 ning e Myen asuya hte KIO majan kalang bai byin hpang wa nna manau poi n lu galaw mat ai majaw ya kalang bai galaw ai lam rai nga ai.
0 comments:
Post a Comment