KIA dap langai hpe Myen asuya dap gasat zing

Hpakan KIA Dap 6 a Ginsi shagyi hta galai hkap sin nga ai Myen asuya dap ni

Jinghpaw Mungdaw Hpakan daju Wunpawng Mungdan Shanglawt Hpyen Dap (KIA) Dap Ba (2) npu Dap Dung (6) kata na Dap Kung (2) Mungshawa Hpyen Hpung a shawnglam dap langai hpe Myen asuya Dap Nu Masat (66) npu hpyen hpung ni kawn sa htim gasat zing madu la kau ai lam chye lu ai.

December 28 ya shana daw hkying 4:00 daram hta Ka Mai ginwang daw KIA Dap Kung (2) Mungshawa Hpyen Hpung a Gwi Chya shawnglam dap dabang hpe Myen asuya dap Dap Nu (66) npu Hk.M.Y Masat (5) dap dung ni kawn hpyen n-gun (60) daram gaw sa htim gasat wan nat jahten kau nhtawm bai nhtang wa mat ai nga KIA Dap Dung (6) kawn Dung Up Dukaba Tang San tsun ai.

“Mani hkying 4 minit 10 daram kaw anhte dap hpe sa gasat zing kau ai. Anhte shawnglam dap hta n-gun marai 10 ram sha nga ai. Shanhte ni n-gun kaba hte re nga yang anhte dap hpe wan nat kau nna nhtang mat wa ai” nga shi kawn tsun ai.

KIA maga si hkala ai lam n nga ai lam, ya yang asuya maga kawn KIA ginra kata matut shamu shamawt htu lung wa yang majan bai byin na masa pru taw nga ai majaw KIA maga mung hpyen masa hkyen maren da ai nga matut tsun ai.

Myen asuya dap ni gaw Hpakan ginwang kata KIA a Dap Dung (6) jung ai ginra mayan asuya Dap Nu (66) npu na dap dung 10 hkawt shara jahkrat let dingyang shamu shamawt taw nga ai zawn, mani majan byin mat ai Ka Mai ginwang daw kata e mung Myen asuya dap a dap dung lahkawng shamu shamawt nga ai lam shi kawn tsun ai.

KIA Dap Dung (6) dap jung da ai Hpakan ginra Ginsi, Awng Bali, Seng Ra, Gwi Hka mare ni de Hpakan ginra masha ni hte nawku hpung woi sara ni a hkawmsa hkawmwa ahkang hpe lai wa sai shani hkan e pat shingdang da ai raitim ndai laman gaw ginra buga masha ni hpe hkawmsa ahkang bai jaw wa sai nga Dkb. Tang San kawn tsun ai.

Asuya dap hte KIA dap ni ndai laman majan byin mat ai lam chye lu ai raitim azin ayang rai n lu shateng ai lam Jinghpaw Mungdaw Simsa lam Akyu Galaw Hpung (PCG) kawn Slg. San Awng tsun wa ai. Raitim Hpakan Myu Ma pyada dap chyawm gaw Hpakan Ginwang hta majan byin ai lam n nga sha simsa nga ai lam lit nga ai wa langai kawn tsun ai.

Lai wa sai October shata bat lahkawng hta Myen asuya dap Dap Nu (66) npu Hk.L.Y Dap Dung (1) Up gaw KIA Dap Dung (6) dap jung da ai shara kawn htawt ya na matu tsun wa ai lam hpe KIA ningdang kau dat ai hpang Myen asuya maga kawn hpyen masa jat bang ai lam ni galaw nna lahkawng maga hpyen masa chya hkat nga ai lam re.

Ya yang, Jinghpaw Mungdaw kata e hpyen masa shayawm na matu Myen asuya dap hte KIO jawm hpaw shabawn da ai Ginrun Manghkang Hparan masit Hpung ni dingyang hkrum shaga bawngban nga ai lam hpe mung KIO maga kawn n sa du mat nna hkring taw sai rai nga ai.

Lai wa sai November 22, 23 ya shani hta KIO hte rau amyu sha laknak hpai uhpung uhpawng kawn dat kasa ni shanglawm ai Mungdan Ting Gap Hkat Jahkring Bawngban Jahkrup Hpung (NCCT) gaw Munghpawm Simsa Lam Hkrang Shapraw Komiti (UPWC) hte hkrum shaga bawngban ai lam hta Laiza hta byin mat ai mabyin zawn re ai kahtap n byin na lam zuphpawng galaw na matu hte hpawn lawnglam 4 hpe tang madun bawngban mat ai.

Posted in: SHIGA