Jinghpaw Mungdaw, Daw Hpum Yang ginwang daw Munglai Hka awra hkan yang na Wunpawng Mungdan Shanglawt Hpyen Dap (KIA) Masat (5) Dap Ba npu shawnglam dap langai hpe Myen asuya hpyen hpung ni sa htim gap ai lam a majaw Shanglawt hpyenla 2 hkrat sum mat nna marai 1 rim hkrum mat ai nga KIO a tsun shaga ahkang nga ai Slg. Lah Nan tsun ai.
Ya yang, Myen asuya dap gaw hpyen n-gun jat bang nga dingyang rai nna December shata 19 ya shani kaang hkying 1:00 jan ten e Daw Hpum Yang ginwang daw Au Sa Chyun mare makau na KIA shawnglam dap hpe Myen asuya dap Hk.M.Y Masat 602 hpyen hpung ni n-gun 20 daram hte sa wang gap ai lam rai nga ai.
“Shanhte (Myen asuya dap) gaw dingyang shamu shamawt taw ai. Shanhte hpyen n-gun jat bang ai lam ni mung dingyang galaw nga ai re. Anhte nga ai shawnglam dap ni hpe sa wang gap ai lam ni gawlaw ai. Anhte maga na gap na aten hpyi n lu dat ai. Shanhte dasang sa gap ai lam le… dai kaw anhte maga na hpyenla 2 hkrat sum mat ai” nga Slg. Lah Nan tsun ai.
Lai wa sai November 19 ya e KIA Hpyen Du Shalat Jawng hta Myen asuya dap kawn laknak kaba gap ai lam a majaw Du Jawngma 23 si ru mat ai shata mi hpring ai shani hte wa ang katut taw ai zawn, asuya maga kawn Jinghpaw Mungdaw hta n sim sa ai majaw shimlam rai n nga ai ngu hpe gyin shalat taw ai lam re nga Slg. Lah Nan tsun ai.
“Ya byin ai gasat gala lam ni yawng gaw asuya maga na anhte a dap ni hpe sa gap ai zawn re ni, laknak kaba ni hte gap ai zawn re ni dingyang galaw nga ai re. Dai majaw shanhte Jinghpaw ginra ni hta majan byin nga ai re. Sim sa ai lam n nga shi ai. Dai majaw mungdan gadaga garum ntum hpung ni mung ya ten hta tsin-yam masha ni hpe sa garum madi shadaw la na matu rai n mai sa ai nga ga shajan tsun wa ai. Teng sha nga yang ndai gaw ang katut gasat gala lam mung n re. Anhte maga na dap ni hpe azim sha sa wang nna gap gasat ai masa re. Ndai hpe ang katut ai lam ngu tsun ra na i” nga shi kawn tsun ai.
Dai hpang, December 20 ya shani e mung dai KIA a shawnglam dap makau yang na Au Sa Chyun mare masha 4 hpe KIA hpe shara jahkrat ahkang jaw ai ngu tsun nhtawm Myen asuya dap ni rim woi mat ai nga matut tsun ai.
2011 ning kawn Myen asuya hte KIA lapran majan rai n byin hpang ai ten kawn dai shara hta KIA dap ni shara jahkrat dap jung nga ai rai nna asuya dap ni rim mat ai KIA hpyenla langai hte mare masha marai 4 ni hpe daini du hkra dat ya ai lam n nga ai.
Myen asuya dap ni sa gap ai lam hte mare masha ni hpe sa rim la ai lam hte seng nna KIO gaw asuya maga na Manghkang Hparan Masit Hpung ningbaw Dukaba. Tan Awng hpung ni hpe ninghkap laika shana da sai lam matut tsun ai.
KIA Dap Ba (3) ginra Manmaw hte Nmawk ginwang daw Kai Htik , Sinlum ginra ni hta mung myen asuya ni hpyen n-gun yawm dik hpyen man 5 hkawt shamu shamawt nga ai lam KIA Dap
Ba (3) npu Dap Dung (27) kawn Dukaba Jawn Awng tsun ai.
Ya ten, Mungdan Ting Madang Gap Hkat Jahkring Bawngban Jahkrup Hpung (NCCT) hte Munghpawm Simsa Lam Hkrang Shapraw Komiti (UPWC) ni 7 lang ngu na Yangung Myu hta hkrum shaga bawngban nga ma ai.
0 comments:
Post a Comment