NCCT hte Myen asuya NCA bawngban na lam December shata laman masat

Shawng e NCCT hte asuya UPWC ni Yangung kaw bawngban nga yang

Munghpawm Simsa Lam Hkrang Shapraw Komiti (UPWC) hte du na December 22, 23 ya shani ni hta hkrum shaga bawngban na matu Mungdan Ting Madang Gap Hkat Jahkring Bawngban Hpung (NCCT) Ningtau Ningbaw Badu Koi Htu Win woi awn ai marai 8 shang lawm ai dat kasa ni sa du na matu December 16 ya shani dawdan da sai nga NCCT malawm Dkb. Hkun Uk Ka tsun ai.

“Ya sa ai hkrun lam gaw bungli jahkrup ai zuphpawng re. Mahtai gaw NCA hpe kahtap bawngban mat na matu dawdan da ma ai. Dai majaw makam kalang bai ngang kang wa na matu, hkyen lajang ai lam galaw na matu gan sa jahkrup ai lam re. Ngut yang she hkrang nhprang hpe bawngban na” nga tsun ai.

NCCT bawngban ai lam hta mungdan ting gap hkat jahkring hkrang nhprang hpe dinglik yu mat nna Yangung hta hkrum shaga bawngban ai lam hpe “bungli bawngban jahkrup hpawng” ngu masat ai bawngban hpawng hta makam gawgap la nhtawm mungdan ting gap hkat jahkring hkrang nhprang hpe kahtap bawngban jahkrup mat  na re lam matut tsun ai.

UPWC hte NCCT ni daining laman mungdan ting gap hkat jahkring lam myit hkrum lata masat htu lu na n re lam Dkb. Hkun Uk Ka kawn tsun ai. Du na December 20 ya shani NCCT dat kasa ni gaw Yangung de sa du sana rai nga ai.

Lai wa sai November 19 ya shani Myen asuya dap laknak kaba gap ai majaw Wunpawng Mundan Shanglawt Hpyen Dap (KIA) Du Jawngma 23 si mat ai manghkang ntsa hparan jasan ya na matu hte hpawn lawnglam 5 hpe mung December praw 2 ya shani NCCT maga kawn san da ai lam hpe UPWC maga kawn htai ya sai raitim lawnglam nkau hta myit dik n-gun lu ai lam rai n lu la ai majaw Yangung bawngban hpawng hta kahtap bawngban mat na matu myit hkum da ma ai.

Lai wa sai September shata UPWC hte NCCT ni 6 lang ngu na du hkra hkrum shaga bawngban mat sai raitim amyu sha laknak hpai rawt malan hpung nkau hte majan kahtap nna bai byin mat ai majaw mungdan ting shadang gap hkat jahkring lakmat htu lu ai lam n nga ai re.

December 15 ya shani UPWC a Myanmar Peace Center (PMC) bungli hpung hte NCCT ni Htai Mungdan Chiang Mai mare hta hkrum shaga bawngban mat nhtawm du na Hkrismat rai n du yang kalang bai hkrum shaga bawngban na matu myit hkrum da ai lam rai malu ai.

Posted in: SHIGA