Mung Nyang mare hta kani nanghpam pat jasan lam n-gun madun

Dec-201-2014 Mung Nyang mare hta nawku hpung ni woi awn nna kani nanghpam ninghkap shawa n-gun madun nga yang

Jinghpaw mungdaw Mung Nyang Ginwang hta hkristan nawku hpung ningbaw ni woi awn nna nanghpam tsi mawan pat jasan lam a matu December 20 ya jahpawt hkying 10:00 kawn shana daw hkying 2:00 ten du hkra n-gun madun mat ai nga n-gun madun lamang hta woi awn lawm ai Slg. Seng Naw kawn tsun ai.

Mung Nyang ginra nanghpam tsi mawan pat jasan hpung kawn woi awn let ginra buga masha amyu bawsang n gin hka hte dakkasu jawng ma ni mung shanglawm nna shawa masha 300 jan gaw Mung Nyang ginwang Awng Dabe mare nawku jawng kawn Mung Nyang ginwang kata ningwan shing grup nhtawm Shanglawt Hkristan nawku jawng hta ginchyum wa dat ai re nga tsun ai.

“Anhte daihpawt e nawku hpung shagu na ningbaw ningla ni, dakkasu jawngma ni, ginra kata na amyu sha bawsang hkrum hkra rai marai 300 jan shang lawm ai hku re. Anhte pyen dau ni hte marawn jahtau let galaw mat ai re” nga Slg. Seng Naw kawn tsun ai.

“Mungshawa yawng shang lawm let jawm gasat ga”, “mungshawa n-gun hte lata gindun let arau sha jawm gasat ga”, Karai Kasang a hpung shingkang hte gumlang gasat kau ga” ngu lawnglam 3 hpe jahtau mat nna pyen dau ni lang mat wa ai nga shi kawn tsun ai.

Mung Nyang ginwang kata nanghpam tsi mawan pat jasan ai lam hta shawa masha yawng pawng let nanghpam tsi mawan hpyen hpe jawm ninghkap sa wa na matu hte Myen asuya lit nga ai ni hku nna mung nanghpam tsi mawan hte seng nna ahkyak la hkrang shapraw sa wa ai lam hta n-gun yawm ai majaw dip n-gun jaw ai lam re nga Slg. Seng Naw kawn tsun ai.

“Anhte mare kahtawng ni hkan shawa ningmu jahpaw ai lam ni gaw galaw sai. Ya ndai lang n-gun madun ai ngu gaw mungshawa ji nban yawng nanghpam tsi mawan hpe pat jasan ninghkap na matu yaw shada ai lam mung lawm ai. Seng ang ai daru magam manat ai maga mung nanghpam tsi mawan hte seng nna ahkyak la sa wa ai hta shatang du du galaw lu ai lam n nga ai majaw n-gun yawm ai lam ni hpe dip n-gun jaw ai masa mung lawm ai” nga tsun ai.

Mung Nyang ginwang hta nanghpam tsi mawan dut mari hpaga ga sha ai ni law htam wa ai lam hte nanghpam tsi mawan lu sha jai lang ai ramma ni grau grau hten za wa ai majaw nanghpam tsi hpyen a lam hpe ya na zawn mu mada wa hkra n-gun madun ai lam mung re nga shi kawn tsun ai.

2014 ning shaning nnan kawn nawku hpung shagu na myit su salang ni, dakkasu jawngma ni hte ginra buga amyu sha bawsang hkum hkra shang lawm ai Mung Nyang nanghpam tsi mawan pat jasan hpung hpe hpaw shabawn hpang nhtawm pat jasan lam hte seng ai hpaji jaw ai lam ni galaw sa mat nhtawm du na 2015 ning shaning nnan hta mung ginra na asuya magam gun ai ni hte pawng nna ahkyak la galaw sa na lam hta jawm galaw sa mat wa na matu hpyen lajang da ai nga matut tsun ai. Nanghpam tsi mawan pat jasan n-gun madun ai lam hta seng ang ai asuya daru magam manat ai ni a dingbai dingna jaw ai lam laga n nga ai hpe mung matut chye lu ai.

Lai wa sai September 29 ya shani mung Jinghpaw Mungdaw Hpakan ginwang hta hkristan nawku hpung shagu hte Jinghpaw Laili Laika hte Htunghking Hpung ni woi awn let nanghpam tsi mawan pat jasan lam shawa n-gun madun lamang galaw mat wa masai rai nga ai.

Posted in: SHIGA